ރ. ފައިނުގައި އެއާޕޯޓެއް ތަރައްޤީކުރުމަށް އައިލެންޑް އޭވިއޭޝަނާ ހަވާލުކޮށް، އެއްބަސްވުމުގައި ސޮއިކޮށްފި

ރ. ފައިނުގައި އެއާޕޯޓެއް ތަރައްޤީކުރުމަށް އައިލެންޑް އޭވިއޭޝަނާ ހަވާލުކޮށް، އެއްބަސްވުމުގައި ސޮއިކޮށްފިއެވެ.

ފައިނު އެއަރޕޯޓު މަޝްރޫޢަކީ ސިޓީ ހޮޓަލަކާއެކު ކުރިއަށް ގެންދާ ބޮޑު މަޝްރޫއެކެވެ. ޓޫރިޒަމް މިނިސްޓްރީގައި ބޭއްވި ރަސްމިއްޔާތެއްގައި މި މަޝްރޫޢުގެ އެއްބަސްވުމުގައި ޓޫރިޒަމް މިނިސްޓްރީގެ ފަރާތުން ސޮއިކުރެއްވީ މިނިސްޓަރ މޫސާ ޒަމީރުއެވެ. އައިލެންޑް އޭވިއޭޝަންގެ ފަރާތުން ސޮއިކުރެއްވީ އެކުންފުނީގެ މެނޭޖިންގ ޑިރެކްޓަރ ޢަބްދުލްހާރިސް އެވެ.

މިރަސްމިއްޔާތުގައި ވާހަކަފުޅުދައްކަވަމުން މިނިސްޓަރ މޫސާ ޒަމީރު ވިދާޅުވީ، ފައިނު އެއަރޕޯޓު މަޝްރޫޢާއެކު ދެ ސިޓީ ހޮޓަލާއި މެޑިކަލް ސެންޓަރެއް ޤާއިމުކުރާނެކަމަށެވެ. މީގެ އިތުރުން މަތިންދާބޯޓު މަރާމާތުކުރާނެ ހޭންގަރަކާއި އޭވިއޭޝަން ދާއިރާގެ މުވައްޒަފުން ތަމްރީނުކުރާ މަރުކަޒެއްވެސް އެތަނުގައި ޤާއިމުކުރާނެކަމަށް މިނިސްޓަރ ވިދާޅުވިއެވެ. މިފަދަ އެއްތައް ޚިދުމަތްތަކާއެކު ކުރިއަށްގެންދާ މިމަޝްރޫޢުގެ ސަބަބުން ރ. އަތޮޅުގެ ރައްޔިތުންނަށް ގިނަގުނަ ފައިދާތަކެއް ކުރާނެކަން މިނިސްޓަރ ފާހަގަކުރެއްވިއެވެ.

މިރަސްމިއްޔާތުގައި ވާހަކަފުޅުދައްކަވަމުން އައިލެންޑް އޭވިއޭޝަންގެ މެނޭޖިންގ ޑިރެކްޓަރ ޢަބްދުލްހާރިސް ވިދާޅުވީ، ފައިނު އެއާޕޯޓުގެ މަޝްރޫޢު ކުރިއަށްދާނީ ޖުމުލަ ތިން ފިޔަވައްސަކަށް ބަހާލައިގެންކަމަށެވެ. އެއަރޕޯޓުގެ ރަންވޭ އާއި ޓާމިނަލްގެ މަސައްކަތް ކުރިއަށްދާނީ މިމަޝްރޫޢުގެ ފުރަތަމަ ފިޔަވަހީގެދަށުންކަމަށް ހާރިސް ވިދާޅުވިއެވެ. ކުރިއަށްއޮތް އެއްމަސް ދުވަހުގެ ތެރޭގައި މިމަޝްރުޢުގެ ކޮންޓްރެކްޓަރަކު ހޯދާނެ ކަމަށާއި، ފުރަތަމަ ފިޔަވަހީގެ މަސައްކަތް އެއްއަހަރު ދުވަހުގެ ތެރޭގައި ނިންމައި އެއާޕޯޓް ހުޅުވާނެކަމަށްވެސް ޙާރިސް ވިދާޅުވިއެވެ.

ރަސްމިއްޔާތުގައި ވާހަކަފުޅުދައްކަވަމުން ރ. ފައިނަށް އުފަން ބޭފުޅެއްކަމަށްވާ، ޑިފެންސް މިނިސްޓަރ އާދަމް ޝަރީފް ޢުމަރު ވިދާޅުވީ، މިއީ ފައިނުގެ ރައްޔިތުން ދެކެމުންއައި ޒަމާންވީ ހުވަފެނެއްކަމަށެވެ. މިއަދު މިކަން ހަޤީޤަތަކަށްވެގެން ދިއުމަކީ މުޅި ރ. އަތޮޅުގެ ރައްޔިތުންނަށް ލިބިގެންދާ ވަރަށްބޮޑު އުފަލެއްކަމަށެވެ.

މިރަސްމިއްޔާތުގައި ބައިވެރިވެވަޑައިގެންނެވި މަޝްހޫރު ވިޔަފާރިވެރިޔާ އަދި ޔުނިވާސަލްގެ ޗެއާމަން މުޙައްމަދު ޢުމަރު މަނިކު ވިދާޅުވީ ސަރުކާރުން މިހާރު ކުރިއަށްގެންދާ ވެލާނާ އިންޓަނޭޝަނަލް އެއާޕޯޓުގެ މަޝްރޫޢާއެކު ރާއްޖޭގެ ޑޮމެސްޓިކް އެއާޕޯޓުތައް އިތުރުކުރުމަކީ ކުރަންޖެހޭކަމެއްކަމަށެވެ. މިކަމުގެ ސަބަބުން ރާއްޖޭގެ ފަތުރުވެރިކަމަށް އިތުރު ކުރިއެރުންތަކެއް ލިބިގެންދާކަން އެމްޔޫ މަނިކު ފާހަގަކުރެއްވިއެވެ.

ރ. ފައިނު އެއަރޕޯޓުގެ މަޝްރޫޢަކީ ޖުމުލަ އަށް މިލިޔަން ޑޮލަރު ނުވަތަ (123 މިލިޔަން ރުފިޔާ) އަށްވުރެ ބޮޑު ހޭދައެއްކޮށްގެން ކުރިއަށްގެންދާ މަޝްރޫޢެއްކަން މިމަޝްރޫޢުގެ މަސައްކަތް ކުރިއަށްގެންދާ ކުންފުނި އައިލެންޑް އޭވިއޭޝަނުން ބުނެއެވެ. މިމަޝްރޫޢަށް ބޭނުންވާ ފައިސާ ހޯދާފައިވަނީ އައިލެންޑް އޭވިއޭޝަންގެ އެއަރ ޓިކެޓް އެޑްވާންސްކޮށް ވިއްކައިގެންކަމަށާއި އެޑްވާންސްކޮށް އެއަރ ޓިކެޓް ގަނެފައިވަނީ މަޝްހޫރު ވިޔަފާރި ކުންފުނި ޔުނިވާސަލް އާއި ރ. އަތޮޅުގައި ޓުއަރިސްޓު ރިސޯޓް ހިންގާ ބައެއް ކުންފުނިތަކުންކަމަށް އައިލެންޑް އޭވިއޭޝަނުން ބުނެއެވެ.