މިހަފްތާ ނިމުމުގެ ކުރިން ހަތަރު އެއަރޕޯޓެއް ޤާއިމްކުރުމަށް ކޮންޓެކްޓަރުންނާއި ހަވާލުކުރާނަން - ރައީސް
މިހަފްތާ ނިމުމުގެ ކުރިން ހަތަރު އެއަރޕޯޓެއް ޤާއިމްކުރުމަށް ކޮންޓްރެކްޓަރުންނާއި ހަވާލުކުރެވޭނެކަމަށް ރައީސުލްޖުމްހޫރިއްޔާ ޢަބްދުﷲ ޔާމީން ޢަބްދުލްޤައްޔޫމް ވިދާޅުވެއްޖެއެވެ. އެމަނިކުފާނު މިހެން ވިދާޅުވީ ޕީޕީއެމް އަލަށް ގުޅުނު މެންބަރުންގެ ފޯމުތައް ޕީޕީއެމްއާއި ހަވާލުކުރުމަށް އެ ޕާޓީގެ އޮފީހުގައި ބޭއްވި ރަސްމިއްޔާތެއްގައި ވާހަކަފުޅު ދައްކަވަމުންނެވެ.
ހއ. އަދި ށ. އަތޮޅުގެ ބައެއް ރަށްތަކުން ޕީޕީއެމް އާއި ގުޅުނު މީހުންގެ ފޯމް ހަވާލުކުރުމަށް ބޭއްވި ރަސްމިއްޔާތުގައި ރައީސުލްޖުމްހޫރިއްޔާ ޢަބްދުﷲ ޔާމީން ޢަބްދުލްޤައްޔޫމް ވަނީ، ރާއްޖޭގެ ހުރިހާ ހިސާބެއް އާރާސްތުކުރުމަށް ބޮޑެތި މަސައްކަތްތަކެއް ސަރުކާރުން ކުރައްވަމުން ގެންދަވާކަން ފާހަގަކުރައްވާ ބައެއް މަޝްރޫޢުތަކަށް އަލިއަޅުއްވާލައްވާފައެވެ.
ރައީސް ވިދާޅުވީ މުޅި ޤައުމު ބިނާކުރުމަށް ކުރާ މަސައްކަތުން ރާއްޖޭގައި މީގެ ކުރިން ނެތް މިންވަރަށް އަމާންކަން ޤާއިމުކުރެވިފައިވާކަމަށާއި، މިހާތަނަށް އުއްމީދުނުކުރާ މިންވަރުގެ ބިޔަ ބޮޑެތި މަޝްރޫޢުތަކެއް ހިންގަމުންގެންދާކަމަށެވެ.
ސަރުކާރުން ރައްޔިތުންނާއި ގުޅުން ހުރި ގިނަ މަޝްރޫއުތަކެއް ހިންގަވާކަން ފާހަގަކުރައްވަމުން ރައީސް ޔާމީން ވިދާޅުވީ މި ހަފްތާގައި ކުރިއަށް އޮތް ކޮންމެ ދުވަހަކު އެއަރޕޯޓެއް ތަރައްޤީކުރުމަށްކޮންޓްރެކްޓާރުންނާއި ހަވާލުކުރައްވާނެކަމަށެވެ. އަދި މި އެއަރޕޯޓްތަކުގެ މަސައްކަތް ކުރިއަށް ގެންދަނީ ދައުލަތުގައި ފައިސާ ހުރެގެންކަމަށްވެސް ރައީސް ޔާމީން ވިދާޅުވިއެވެ.
"ފަހަރަކު އެއަރޕޯޓެއް ފަހަރަކު އެއަރޕޯޓެއް 4 އެއަރޕޯޓެއްގެ މަސައްކަތް ހަވާލުކުރެވިގެންދާނެ. މާދަމާ މި މަސައްކަތް ފަށާނެ. ރާއްޖޭގެ އެކި ހިސާބުތަކުގައ ޤާއިމްކުރާ އެއަރޕޯޓްތަކެއް މިއީ. މި އެއަރޕޯޓްތައް ޤާއިމްކުރެވުމަކީ ރައްޔިތުންގެ ދަތުރުފަތުރަށް އަންނަ ފަސޭހަ އެކަންޏެއް ނޫން. އިޤުތިޞާދު ވިސްނުމާއި ޚާއްޞަކޮށް މާލެއާއި ވަކިން އޮންނަ އަތޮޅުތެރެ ތަރައްޤީކުރުމަށް ކުރެވޭ މަސައްކަތްތަކެއް. އަތޮޅުތަކުގެ ޒުވާނުންނަށް ރައްޔިތުންނަށް އެތަންތާ ތިބެގެން ވަޒީފާގެ ފުރުސަތު ލިބިގެންދާނެ." ރައީސުލްޖުމްހޫރިއްޔާ އަބްދުﷲ ޔާމީން އަބްދުލް ޤައްޔޫމް ވިދާޅުވިއެވެ.
ރައީސްގެ ވާހަކަފުޅުގައި އެމަނިކުފާނު ވަނީ ސަރުކާރުން ހިންގަވަމުން ގެންދަވާ މަޝްރޫއުތަކުން ރައްޔިތުންނަށް ލިބިގެންދާނެ ކުރިއެރުންތަކާއި ތަރައްޤީއަށްވެސް ބައްލަވާލައްވާފައެވެ.
" މިއީ ބޯހިޔާވަހިކަމާއި، ޒުވާނުންގެ އަޚްލާގު ރަނގަޅުކުރުމާއި ތަޢުލީމާއި ހޯދުމަކީ ތަރައްޤީ އާއި ތަނަވަސްކަމަށް ކުރެވޭ މަސައްކަތްތަކެއް. ދެން މި އޮންނަނީ ދިވެހި އުސޫލްތަކަށާއި، އިސްލާމްދީނަށް ކަމޭހިތާހިތުން. އަޤީދާގެ މަތީގައި ހުރުމަށް ކުރާ މަސައްކަތްތަކެއް. އެއީ މިހާރު ހަދާ އެއަރޕޯޓަށް އަށް މިލިއަން ފަސިންޖަރުން ފަސް އަހަރުތެރޭ އަންނަކަމަށްވާނަމަ އެއީ މުޅި ރާއްޖެއަށް ފަތުރުވެރިކަން އާއްމުވުން. މިއީ މުޅިރާއެްޖެއަށް އަންނަ ތަނަވަސްކަންކަމާ، ޒުވާނުންނަށް ވަޒީފާގެ ފުރުޞަތުތަކެއް. މިހާތަނަށް ހަތްދިހަ ހާހަށްވުރެ ގިނަ ވަޒީފާގެ ފުރުސަތު ޒުވާނުންނަށް ހޯދާދައިފައިވާނެ." ރައީސް ޔާމީން ވިދާޅުވިއެވެ.
ރައީސް ޔާމީން ވިދާޅުވީ ކޮންމެ ފިކުރެއްގައި ތިބިނަމަވެސް، އަދި ކިތަންމެ ކުޑަ މުޖުތަމަޢުއެއްގައިވެސް އަމާންކަމާއެކު ދިިރިއުޅެވެންޖެހޭނެކަމަށެވެ. ނަމަވެސް ރާއްޖޭގެ އިޖުތިމާއި ފޭރާން ހަލާކުވެ ބައެއް ނެދެވޭ ކަންކަން ހިގައިގެން ދިޔައީ ޑިމޮކްރަސީގެ ނަމުގައި ބަޔަކު ހިންގި ޤާނޫނާއި ހިލާފު ކަންތައްތަކެއްގެ ސަބަބުންކަމަށެވެ. އަދި މިކަންކަން ކޮށްފައިވަނީ ޕާޓީތަކުގައި އިސްކޮށްތިބޭ ފަރާތްތަކުން ހިތްވަރުދީގެން ގަސްތުގައިކަމަށްވެސް ރައީސް ޔާމީން ވިދާޅުވިއެވެ.