ޒުވާނުންނަށް ޚާއްޞަކޮށްގެން އެއްދުވަހުން ލައިސެންސް ނެގޭ ޕްރޮގްރާމް، "އެއްލަކިން މަށަށް ލައިސަންސް" ގެ މުއްދަތު އިތުރުކޮށްފިއެވެ. މީގެކުރިން އެ ޕްރޮގްރާމް ކުރިއަށް ގެންދިއުމަށް ހަމަޖެހިފައިވަނީ މިރޭގެ ނިޔަލަށެވެ.
އިކޮނޮމިކް މިނިސްޓްރީން މިއަދު ނެރުނު ބަޔާނެއްގައި ބުނެފައިވަނީ "އެއްލަކިން މަށަށް ލައިސަންސް" ޕްރޮގްރާމް އަންނަ ބުރާސްފަތި ދުވަހުގެ ނިޔަލަށް އިތުރުކޮށްފައިވާ ކަމަށެވެ. އަދި މި މުއްދަތުގައި ޚިދުމަތް ހޯއްދަވާ ފަރާތްތަކަށް ޓޯކަން ދޫކުރުމަށް ހަމަޖެހިފައިވަނީ ކޮންމެ ދުވަހެއްގެވެސް ހަވީރު 4:00އިން 5:00ގެ ނިޔަލަށް ކަމަށެވެ. ޓޯކަން ދޫކުރާނީ ސޯޝަލް ސެންޓަރުން ކަމަށްވެސް އިކޮނޮމިކް މިނިސްޓްރީގެ ބަޔާނުގައި ބުނެފައިވެއެވެ.
އިކޮނޮމިކް މިނިސްޓްރީން ބުނީ "އެއްލަކިން މަށަށް ލައިސަންސް" ޕްރޮގްރާމް ކުރިއަށްދާ މުއްދަތުގައި އެއްގަމު ލައިސަންސްއާއި ގުޅޭ ޢާއްމު ޚިދުމަތްތައް ރަސްމީގަޑީގައި ނުލިބޭނެކަމަށެވެ.
މިދިޔަ ހުކުރު ދުވަހު ފެށި މި ޕްރޮގްރާމުގައި 3000 އަށްވުރެ ގިނަ މީހުން ބައިވެރިވެފައިވާއިރު 746 މީހަކަށް މިހާތަނަސް ލައިސަންސް ދޫކޮށްފައިވާ ކަމަށް އިކޮނޮމިކް މިނިސްޓްރީން ބުނެއެވެ.