ޗައިނާ މޯލްޑިވްސް ފްރެންޑްޝިޕް ބްރިޖާ އެކީ ތަރައްޤީކުރާ، މާލޭ ރިންގް ރޯޑްގެ މަސައްކަތް ޖުލައިމަހުގެ ނިޔަލަށް ނިމޭނެކަމަށް މިނިސްޓަރ އޮފް ހައުސިންގ އެންޑް އިންފްރާސްޓްރަކްޗަރ ޑރ. މުޙައްމަދު މުޢިއްޒު ވިދާޅުވެއްޖެއެވެ.
ބްރިޖާއެކީ ތަރައްޤީކުރާ މަގުގެ މަސައްކަތް ބާރަށް ކުރިއަށްދާކަން ފާހަގަކުރައްވާ، ހައުސިންގ މިނިސްޓަރ ވިދާޅުވީ، ރިންގް ރޯޑްގެ މަސައްކަތް ކުރަނީ ބްރިޖްގެ މަސައްކަތްވެސްކުރާ ކުންފުނި ކަމަށްވާ ޗައިނާގެ ސީސީސީސީ ސެކަންޑް ހާރބަރ އިންޖިނިއަރިންއާ ހަވާލު ކޮށްގެންކަމަށެވެ. އަދި އެކުންފުނިން ރިންގްރޯޑުގެ މަސައްކަތް އަންނަ ޖުލައި މަހުގެ 26 ހަށް ނިންމުމަށް މަސައްކަތް ކުރަމުންދާކަމަށް މިނިސްޓަރ ވިދާޅުވިއެވެ.
ބުރިޖާއެކީ ތަރައްޤީ ކުރާ ރިންގް ރޯޑު މަޝްރޫޢުގެ ދަށުން ހުޅުމާލެ ފެރީ ޓަރމިނަލުން ފެށިގެން އިންޑަސްޓްރިއަލް ވިލެޖާހަމައަށް ތާރުއަޅައިގެން ބޭރު މަގު ތަރައްޤީ ކުރުމުގެ މަސައްކަތް ދަނީ ކުރަމުންނެވެ. އަދި މިމަގު ތަރައްޤީ ކުރަނީ ހަތަރު ލޭނަށް ދެކޮޅަށް ދުއްވޭ ގޮތަށެވެ. މީގެ އިތުރުން މަގުގެ ދުވާރު ފުޅާކޮށް 450 ހަށްވުރެ ގިނަ ގަސް މަގުގެ ދެފަރާތުގައި އިންދުމަށް ހަމަޖައްސާފައިވެއެވެ. މި މަގުގެ މަސައްކަތް ނިމި ބޭނުންކުރަން ފެށުމުން މާލެ ވަށައިގެން ފަސޭހަކަމާއެކު ވެހިކަލްތައް ދުއްވޭނެ ކަމަށް ހައުސިންގ މިނިސްޓްރީން ބުނެއެވެ.