އެއް ދުވަހުން ލައިސަންސް ލިބޭ ޚާއްޞަ ޕްރޮގްރާމް "އެއްލަކިން މަށަށް ލައިސަންސް" ޕްރޮގްރާމްގެ ދަށުން ލައިސަންސް ހޯދި ފަރާތްތަކަށް ލައިސަންސް ކާޑު ދޫކުރަން ފަށައިފިއެވެ. ހުރަވީ ބިލްޑިންގގައި ބޭއްވި ރަސްމިއްޔާތެއްގައި މި ޕްރޮގްރާމްގެ ދަށުން އެންމެ ފުރަތަމަ ލައިސަންސް ހޯދި 5 ފަރާތަކަށް ލައިސަންސް ކާޑު ހަވާލުކޮށްދެއްވީ ހޯމް މިނިސްޓަރ އަޒްލީން އަޙްމަދެވެ.
"އެއްލަކިން މަށަށް ލައިސަންސް" ނަމުގައި ކުރިއަށް ގެންދިޔަ މި ޕްރޮގްރާމަކީ ލައިސަންސް ހޯދަން ބޭނުންވާ ފަރާތްތަކަށް ވީހާވެސް ފަސޭހަކޮށް ކުޑަ ވަގުތުކޮޅެއްގެ ތެރޭގައި ލައިސަންސް ކާޑު ހެއްދުމުގެ ފުރުޞަތު ފަހިކޮށްދިނުމަށް އިކޮނޮމިކް މިނިސްޓްރީއާއި ޓްރާންސްޕޯޓް އޮތޯރިޓީ ގުޅިގެން ކުރިއަށްގެންދާ ޚާއްޞަ ޕްރޮގްރާމެކެވެ. މި ޕްރޮގްރާމް ޒުވާނުންނަށް ޚާއްޞަ ކުރިނަމަވެސް، 18 އަހަރުން މަތީގެ ކޮންމެ ދިވެއްސަކަށްވެސް މި ޕްރޮގްރާމުގައި ބައިވެރިވުމުގެ ފުރުޞަތު ވަނީ ހުޅުވާލާފައެވެ.
މިމަހުގެ 25، 26 އަދި 28 މި 3 ދުވަހު ކުރިއަށްގެންދާ މި ޕްރޮގްރާމްގެ ދަށުން ލައިސަންސް ފޯމާއެކު ހުށައަޅަންޖެހޭ ލިޔެކިއުންތަކާއި، ފައިސާ ބަލައިގަތުން، އަދި ޕްރޮގްރާމުގައި ބައިވެރިވުމަށް އެދޭ ފޯމާއި، ތިއަރީ އަދި ޕްރެކްޓިކަލް ޓެސްޓުގައި ބައިވެރިވުމަށް ބޭނުންވާ ސްލިޕް ދޫކުރުމުގެ އެންމެހާ އިންތިޒާމެއް ހުރަވީ ބިލްޑިންގައި ވަނީ ހަމަޖައްސާފައެވެ. އަދި ސައިކަލާއި ކާރުގެ ލައިސަންސްގެ އިތުރުން ޕިކަޕް ލައިސަންސް ނަގަން ބޭނުންވާ ފަރާތްތަކަށް އެފުރުޞަތު މި ޕްރޮގްރާމްގެ ތެރެއިން ލިބޭނެކަމަށް އިކޮނޮމިކް މިނިސްޓްރީން ބުނެއެވެ.
މި ޕްރޮގްރާމްގެ ތެރެއިން އެންމެ ފުރަތަމަ ލައިސަންސް ހޯދި 5 ފަރާތަށް ލައިސަންސް ކާޑު ހަވާލުކޮށްދެއްވާފައިވަނީ ހުރަވީ ބިލްޑިންގގައި ބޭއްވި ރަސްމިއްޔާތެއްގައި ހޯމް މިނިސްޓަރ އަޒްލީން އަޙްމަދެވެ. މި ރަސްމިއްޔާތުގައި ވާހަކަފުޅު ދައްކަވަމުން މިނިސްޓަރ އަޒްލީން ވިދާޅުވީ، މިއީ ޒުވާނުން ވަރަށް އެދި އެދި ތިބި ފުރުޞަތެއްކަމަށާއި، ރައްޔިތުންނަށް ބޭނުންވާ މިފަދަ އަސާސީ ޚިދުމަތްތައް ލުއިފަސޭހައިން ލިބޭނެ އިންތިޒާމް ހަމަޖައްސައިދިނުމަކީ މި ސަރުކާރުން އަބަދުވެސް ނުހަނު ބޮޑު އިސްކަމެއްދެއްވާކަމެއްކަމަށެވެ.
"އެއްލަކިން މަށަށް ލައިސަންސް" ޕްރޮގްރާމާއި ގުޅޭގޮތުން ޕީ.އެސް.އެމް ނިއުސްއަށް މަޢުލޫމާތު ދެއްވަމުން އިކޮނޮމިކް މިނިސްޓްރީގެ ޑެޕިއުޓީ މިނިސްޓަރ ޢަބްދުﷲ މުޙައްމަދު ވިދާޅުވީ، ކަނޑައެޅިފައިވާ އުސޫލުގެ ތެރެއިން ވީހާވެސް ގިނަ ފަރާތްތަކަށް ލައިސަންސް ހަވާލުކުރުމަކީ އެ މިނިސްޓްރީގެ އަމާޒުކަމަށެވެ. އަދި ފުރަތަމަ ދުވަހު އެކަނިވެސް ޒުވާނުންގެ ފަރާތުން މިކަމަށް އޮތް ތަރުޚީބު ހާމަވެއްޖަކަން އޭނާ ފާހަގަކުރެއްވިއެވެ.
"އެއްލަކިން މަށަށް ލައިސަންސް" ޕްރޮގްރާމްގެ ފުރަތަމަ 2 ދުވަސް ޚާއްޞަ ކޮށްފައިވަނީ އަލަށް ލައިސަންސް ނަގަން ބޭނުންވާ ފަރާތްތަކަށާއި، ކެޓަގަރީ އިތުރުކުރަން ބޭނުންވާ ފަރާތްތަކަށެވެ. އަދި ޕްރޮގްރާމުގެ ތިން ވަނަ ދުވަސްކަމުގައިވާ މިމަހުގެ 28 ވާ ހޯމަ ދުވަސް ޚާއްޞަ ކޮށްފައިވަނީ ޓްރެފިކް ޤަވާއިދާ ޚިލާފުވެގެން ޖޫރިމަނާ ފައިސާ ދައްކަން ޖެހިފައިވާ ޒުވާނުންނަށެވެ. އެގޮތުން އެ ފަރާތްތަކަށް މި ޕްރޮގްރާމްގެ ދަށުން ޖޫރިމަނާއަށް އަރާފައިވާ ފައިސާ އެއް އަހަރު ދުވަހަށް ބަހާލައިގެން އިންސްޓޯލްމަންޓް އުސޫލުން ދެއްކޭނޭ އިންތިޒާމް ހަމަޖައްސާފައިވާއިރު، އެކަމަށްޓަކާ ޚާއްޞަ އެއްބަސްވުމެއްގައި ސޮއިކުރަންޖެހެއެވެ.
މި ޕްރޮގްރާމަށް އާއްމުންގެ ފަރާތުން ލިބޭ ތަރުޚީބަށް ބެލުމަށްފަހު، މުއްދަތު އިތުރުކުރަން ޖެހިއްޖެ ހާލަތެއްގައި މުއްދަތު އިތުރުކުރުމަކީވެސް މިނިސްޓްރީގެ ވިސްނުމެއްކަމަށް އިކޮނޮމިކް މިނިސްޓްރީން ބުނެއެވެ. އަދި ކުރިއަށް އޮތްތާނގައި ރާއްޖޭގެ އާބާދީ ބޮޑެތި ރަށްރަށުގައިވެސް މި ޕްރޮގްރާމް ހިންގުމަށް ސަރުކާރުންވަނީ ނިންމާފައެވެ.