އެއް ދުވަހުން ޑްރައިވިން ލައިސަންސް ލިބޭ "އެއްލަކިން މަށަށް ލައިސަންސް" ޕްރޮގްރާމް މިރޭ އޮންނާނެއެވެ. ޒުވާނުންނަށް އަމާޒުކޮށްގެން ކުރިއަށްގެންދާ މި ޕްރޮގްރާމް މާލޭގައި ބޭއްވުމަށް ނިންމާފައިވަނީ މިއަދާއި، މާދަމާގެ އިތުރުން، އަންނަ ހޯމަ ދުވަހުގެ ރެއެވެ.
މި ލައިސަންސް ޕްރޮގްރާމް ކުރިޔަށްދާނީ ރޭގަނޑު ނުވައަކުން ބާރައަށް ކަމަށާ، ޕްރޮގްރާމްގައި ބައިވެރިވާން އެދޭ ފަރާތްތަކުން ހުށަހަޅާ ފޯމްތައް ބަލައިގަތުން އޮންނަނީ ރޭގަނޑު ނުވައަކުން އެގާރަގަޑި ބަޔަށްކަމަށް އިކޮނޮމިކް މިނިސްޓްރީން ބުނެއެވެ. އަދި މިފޯމްތަކުގައި ޖަހަން ބޭނުންވާ ފޮޓޯއާއި، ސްޓޭމްޕާއި އައިޑީކާޑްގެ ފޮޓޯ ކޮޕީ އާއި ފައިސާ ބަލައިގަތުމުގެ އިންތިޒާމްވެސް ހުރަވީ ބިލްޑިންގްގައި މިހާރު ވަނީ ހަމަޖައްސާފައެވެ.
"އެއްލަކިން މަށަށް ލައިސަންސް" މި ޕްރޮގްރާމްވެސް ކުރިޔަށްދާނީ ކުރިންވެސް ލައިސެންސް ދޫކުރުމުގައި ހަދަންޖެހޭ ތިއަރީ އާއި ޕްރެކްޓިކަލް ޓެސްޓާއި އެކުއެވެ. މި ޕްރޮގްރާމުގައި ސައިކަލް ލައިސަންސްގެ އިތުރުން ކާރާއި، ޕިކަޕް ލައިސަންސްވެސް ލިބޭނޭކަމަށް އިކޮނޮމިކް މިނިސްޓްރީން ބުނެއެވެ. ލައިސަންސް ޙަވާލުކުރުން އޮންނާނީ ކޮންމެ ރެއެއްގެ ރޭގަނޑު 12 ޖަހާއިރު އޮންނަ ރަސްމިއްޔާތެއްގައި ކަމަށްވެސް އެމިނިސްޓްރީން ބުނެއެވެ. އަދި މި ޕްރިގްރާމުގައި ބައިވެރިވެ ފެއިލްވާ މީހުންނަށް، އަލުން އެމީހަކު ބޭނުންވާ ވަރަކަށް ޕްރޮގްރާމުގައި ބައިވެރިވުމުގެ ފުރުސަތު އޮންނާނެކަމަށްވެސް އެމިނިސްޓްރީން ބުނެއެވެ.
މިޕްރޮގްރާމުގައި ލައިންސަންސް ހޯދުމަށް އެއްވެސް ފީއެއް ދައްކަން ނުޖެހޭނެކަމަށް ބުނެ ސޯޝަލް މީޑިއާގައި ބައެއް ފަރާތްތަކުން ދަނީ ހަޤީޤަތާއި ޚިލާފު ވާހަކަތައް ފަތުރަމުން. އެހެންނަމަވެސް އިކޮނޮމިކް މިނިސްޓްރީން ބުނެފައިވަނީ މި ޕްރޮގްރާމްގައިވެސް ލައިސަންސް ދޫކުރުމަށް ހަމަޖެހިފައިވަނީ މިހާރުވެސް ލައިސަންސް ދޫކުރާ އުސޫލުން ތިއަރީ ޓެސްޓާއި ޕްރެކްޓިކަލް ބައިން ފާސްވާ ފަރާތްތަކަށް ކަމަށާއި، ހަމައެކަނި ތަފާތަކީ އެކަމަށް ހޭދަވާ ވަގުތު ކުޑަވުންކަމަށެވެ. ނަމަވެސް ޓްރެފިކް ޤަވާއިދާ ޚިލާފުވެގެން ޖޫރިމަނާ ފައިސާ ދައްކަން ޖެހިފައިވާ ޒުވާނުންނަށް އިންސްޓޯލްމަންޓް އުސޫލުން ފައިސާ ދެއްކުމުގެ ފުރުސަތު މި ޕްރޮގްރާމްގެ ދަށުން އެ މިނިސްޓްރީން ވަނީ ފަހިކޮށްދީފައެވެ.
އެގޮތުން ޓްރެފިކް ޤަވާއިދުތަކާ ޚިލާފުވެފައިވާ ޒުވާނުން ދައްކަންޖެހޭ ޖޫރިމަނާ ފައިސާ އެއް އަހަރުދުވަހުގެ ތެރޭގައި މުޅިއަހަރަށް ބަހާލައިގެން ދައްކާގޮތަށް ޙާއްސަ އެއްބަސްވުމެއް އެ މިނިސްޓްރީން ވަނީ އެކުލަވާލާފައެވެ. އަދި މިގޮތަށް އެއްބަސްވާ ޒުވާނުންނަށް ހޯމަ ދުވަހުގެރޭ އޮންނަ "އެއްލަކިން މަށަށް ލައިސަންސް" ޕްރޮގްރާމުގައި ލައިންސަންސް ހޯދުމުގެ ފުރުސަތު ލިބިގެންދާނެކަމަށްވެސް އެމިނިސްޓްރީން ބުނެއެވެ.
މި ޕްރޮގްރާމް ފުރަތަމަ މާލޭ ސިޓީގައި ފެށިއެއްކަމަކު، ކުރިއަށް އޮތްތާނގައި، ރާއްޖޭގެ އާބާދީ ބޮޑެތި ރަށްތަކުގައި މި ޕްރޮގްރާމް ކުރިއަށްގެންދިއުމަށް އިކޮނޮމިކް މިނިސްޓްރީން ވަނީ ނިންމާފައެވެ.