ރާއްޖޭގެ ބޮޑު ބަޔަކަށް ޔެލޯ އެލަރޓް ނެރެފި

ކުރިއަށް އޮތް 24 ގަޑިއިރު ރާއްޖޭގެ އެކިހިސާބަށް ވިއްސާރަކުރާނެކަމަށް ލަފާކުރެވޭތީ، ރާއްޖޭގެ ބޮޑު ބަޔަކަށް ޔެލޯ އެލަރޓް ނެރެފިއެވެ.

މޫސުމާބެހޭ ޤައުމީ އިދާރާއިން ޔެލޯ އެލަރޓް ނެރެފައިވަނީ، ހއ.އިން ފެށިގެން ލާމު އަތޮޅާ ދެމެދުގެ ހިސާބުތަކަށެވެ.

މޫސުމާބެހޭ ޤައުމީ އިދާރާއިން ލާފާކޮށްފައިވާގޮތުން، ހުޅަނގު ދެކުނާއި ހުޅަނގުން، އުތުރާއި މެދުތެރޭގެ އަތޮޅުތަކަށްގަޑިއަކު 15 މޭލާ 25 މޭލާދެމެދުގެ ބާރުމިނުގައި ވައިޖެހޭނެއެވެ. އަދި އެހެން ހިސާބުތަކުގައި ގަޑިއަކު 7 މޭލާ 17 މޭލާދެމެދުގެ ބާރުމިނުގައި ވައި ޖެހޭނެކަމަށް ލަފާކުރެވޭއިރު، ވިލާގަނޑުގައި ގަޑިއަކު 45 މޭލަށް ވައިގަދަވުން އެކަށީގެންވާކަމަށްވެސް އެ އިދާރާއިން ލަފާކުރެއެވެ.

ރާއްޖޭގެ އުތުރާއި މެދުތެރޭގެ ކަނޑުތައް ގަދަވާނެ ކަމަށް ލަފާކުރެވޭއިރު، އެހެން ހިސާބުތަކުގެ ކަނޑުތައް އާދައިގެ ވަރަކަށް ގަފަވެފައި ވިލާގަނޑުގައި އިތުރަށް ގަދަވާނެކަމަށް ލަފާކުރެވޭކަމަށްވެސް އެ އިދާރާއިން ބުނެއެވެ.

ވައިގަދަވެ ކަނޑުތައް ގަދަވާނެކަމަށް ލަފާކުރެވޭއިރު، މޫސުމާބެހޭ އިދާރާއިން ވަނީ، ކަނޑު ދަތުރުކުރާ ފަރާތްތަކުން މިކަމަށް ޚާއްޞަ ސަމާލުކަމެއްދިނުމަށްވެސް އިލްތިމާސް ކޮށްފައެވެ.

މީގެ އިތުރުން ދިޔަވަރު އެންމެ ބޮޑުވާ ވަގުތު ތަކުގައި ބައެއް ރަށްތަކަށް އުދައިގެ އަސަރުކުރުމަކީވެސް އެކަށާއިގެންވާކަމެއްކަމަށް މޫސުމާބެހޭ އިދާރާއިން ބުނެއެވެ.

ރާއްޖޭގެ އެކި ސަރަޙައްދުތަކަށް ދިޔަވަރު އެންމެ ބޮޑުވާނެކަމަށް ލާފާކުރެވޭ ގަޑިތަކަކީ:
އުތުރުގެ ސަރަހައްދުތަކަށް މިރޭ 7:45 އަދި މާދަމާ 09:26 ގައި
މެދުތެރޭގެ ސަރަހައްދުތަކަށް މިރޭ 09:08 އަދި މާދަމާ 10:27 ގައި
ދެކުނުގެ ސަރަހައްދުތަކަށް މިރޭ 10:25 އަދި މާދަމާ 11:20ގައި

ރާއްޖެއަށް މިހާރު ކުރަމުންދަނީ ހުޅަނގުމޫސުމުގެ ވިއްސާރަކަމަށް މޫސުމާބެހޭ ޤައުމީ އިދާރާއިން ބުނެއެވެ.