ޕޯސްޓްގެ ޒަރިއްޔާއިން ރާއްޖެއަށް އެތެރެކުރަން އުޅުނު 1.74 ކިލޯގްރާމްގެ މަސްތުވާތަކެތި އަތުލައިގެންފިއެވެ.
މިއީ ޕޯސްޓްގެމަގުން ގެންނަ ތަކެއްޗަށް ޚާއްޞަކުރެވިގެން، ހިންގުނު އޮޕަރޭޝަންތަކުގައި ޕާރުސަލްތަކުގެ ތެރޭގައި ފޮރުވައިގެން ރާއްޖެއަށް އެތެރެކުރަން އުޅެނިކޮށް 24 ފަހަރެއްގެމަތީން އަތުލައިގަތް ތަކެތިކަމަށް މޯލްޑިވްސް ކަސްޓަމްސް ސާވިސްއިން ބުނެއެވެ.
މި އޮޕަރޭޝަންތަކުގައި އަތުލައިގަތް މަސްތުވާތަކެތި ބަންދުކޮށްފައިވާ ޕާރުސަލްތައް މައިގަނޑުގޮތެއްގައި އައިސްފައިވަނީ ޔޫރަޕްގެ ޤައުމުތަކުންކަމަށް ކަސްޓަމްސްއިން މަޢުލޫމާތުދެއެވެ. އޭގެތެރޭގައި ހިމެނެނީ އިނގިރޭސިވިލާތް، ގްރީސް، ޖަރުމަންވިލާތް، ބެލްޖިއަމް، ނެދަރލޭންޑްސްއެވެ.
އަތުލައިގަނެވުނު މަސްތުވާތަކެތި މިހާރު މޯލްޑިވްސް ޕޮލިސް ސަރވިސްއާ ޙަވާލުކޮށްފައިވާއިރު މިމައްސަލަ ދަނީ އިތުރަށް ތަޙްޤީގްކުރަމުންނެވެ.