އެސްޓީއޯ މިނިވަން ޗެންޕިއަންޝިޕްގެ ފައިނަލްބުރުގެ ސެމީފައިނަލުން ޖާގަ ކަށަވަރުކޮށް، ބ.ފެހެންދޫއާއި ތ.ތިމަރަފުށި ދިވެހި ޕްރިމިއަރ ލީގަށް ކޮލިފައިވެއްޖެއެވެ.
ފެހެންދޫ ދިވެހި ޕްރިމިއަރ ލީގަށް ކޮލިފައިވީ މިދިޔަ އަހަރު ލީގުގައި ވާދަކޮށް ރަނގަޅު ނަތީޖާތަކެއް ހޯދި އއ.މާޅޮސް ހިމެނޭ ގްރޫޕްގައި، މާޅޮސް ފަހަތަށް ޖައްސާލުމަށްފަހުއެވެ. ބިދޭސީ ހަތަރު ކުޅުންތެރިންނާއެކު ވާދަކުރި މާޅޮސް ކަޓުވާލާ، ފެހެންދޫ ދިވެހި ޕްރިމިއަރ ލީގުން ޖާގަ ހޯދިއިރު އެޓީމްގައި ކޯޗެއް އަދި ބޭރު ކުޅުންތެރިއެއްވެސް ނެތެވެ. ފެހެންދޫ ވަނީ މިއަދު 6-1 ން އދ.ފެންފުށި ބަލިކޮށްފައެވެ. މިގްރޫޕުން އެއްވަނަ ޓީމްގެ ގޮތުގައި ސެމީން ޖާގަ ހޯދާ ދިވެހި ޕްރިމިއަރ ލީގަށް ކޮލިފައިވީ ށ.ފޯކައިދޫއެވެ.
ތ.ތިމަރަފުށި ސެމީފައިނަލުން ޖާގަ ހޯދާ، ދިވެހި ޕްރިމިއަރ ލީގުން ޖާގަ ކަށަވަރުކުރީ އައްޑޫ ސިޓީގެ ހިތަދޫ ފަހަތަށް ޖައްސާލުމަށްފަހުއެވެ. މިއަދު 2-1 ން ހިތަދޫ ބަލިކޮށް، ގްރޫޕްގެ އެއްވަނަ ހޯދީވެސް ތިމަރަފުށްޓެވެ. ގްރޫޕްގެ ދެވަނަ ޓީމްގެ ގޮތުގައި ސެމީން ޖާގަ ހޯދާ، ރާއްޖޭގެ އެންމެ ބޮޑު ލީގަށް ކޮލިފައިވީ ފ.ނިލަންދޫއެވެ.
މިނަތީޖާތަކާއެކު މިދިޔަ އަހަރު ދިވެހި ޕްރިމިއަރ ލީގުގައި ވާދަކުރި އަތޮޅުތަކުގެ އެއްވެސް ޓީމެއް މިފަހަރުގެ ލީގުގައި ނުފެންނާނެއެވެ. އެއީ މާޅޮހާއި، މިދިޔަ އަހަރުގެ މިނިވަން ޗެންޕިއަންޝިޕްގެ ޗެމްޕިއަން ކުޑަހުވަދޫ ކެޓުމުންނެވެ. އަދި ތިނަދޫއާއި، މިލަންދޫ މިފަހަރު ވާދަނުކުރުމުންނެވެ.