ދޮށީ އުމުރުގެ މީހުންނަށް ޢަމާޒުކޮށްގެން މިނިސްޓްރީ އޮފް ޖެންޑަރ އެންޑް ފެމިލީން ކުރިއަށްގެންދާ "ރަންވޭލާ" ކެމްޕެއިންގެ ޙަރަކާތްތައް ފ.އަތޮޅުގެ ހުރިހާ ރަށެއްގައި ކުރިއަށް ގެންގޮސްފިއެވެ. ފ އަތޮޅުގައި ކުރިއަށްގެންދިޔަ ސެޝަންތަކުގައި ދޮށީއުމުރުގެ ނުވަދިހަ ފަސް މީހުން ބައިވެރިވިކަމަށް ޖެންޑަރ މިނިސްޓްރީން ބުނެއެވެ.
ރަންވޭލާ ކެމްޕެއިނަކީ، މުޖުތަމުޢުގައި ދޮށީއުމުރުގެ މީހުންގެ ބައިވެރިވުން އިތުރުކޮށް، އެ ފަރާތްތަކަށް ބޭނުންވާ އަޅާލުމާއި އެހީތެރިކަން ފޯރުކޮށްދިނުމަށް މަގުފަހިކޮށްދިނުމުގެ ގޮތުން ކުރިއަށްގެންދާ ޕްރޮގްރާމެކެވެ. އެގޮތުން މިކެމްޕެއިންގެތެރެއިން ދޮށީ އުމުރުގެ މީހުންގެ ޖިސްމާނި އަދި ނަފްސާނީ ދުޅަހެޔޮކަން އިތުރުކުރުމުގެ މުހިންމުކަމާއި މެދު ހޭލުުންތެރިކުރުމުގެ ޕްރޮގްރާމުތަކެއް ފ.އަތޮޅުގައި ކުރިޔަށްގެންދިޔައެވެ.
މީގެއިތުރުން ފ.އަތޮޅު ހޮސްޕިޓަލާއި އެއަތޮޅުގެ އެހެން ރަށްތަކުގެ ހެލްތް ސެންޓަރުތަކާއި ގުޅިގެންވަނީ ހެލްތް ސްކްރީނިންގ ޕްރޮގްރާމެއްވެސް ކުރިއަށް ގެންގޮސްފައެވެ. ހެލްތް ސްކްރީނިންގ ޕްރޮގްރާމުގައި ދޮށީއުމުރުގެ ސަތޭކަ ތިރީސް ތިންމީހުން ސްކްރީންކޮށްފައިވާކަމަށް ޖެންޑަރ މިނިސްޓްރީން ބުނެއެވެ.
ރަންވޭލާ ޕްރޮގްރާމްގެތެރެއިން ދޮށީއުމުރުގެ މީހުންނާއި ޒުވާނުންނާއި ދެމެދު އޮންނަ ގުޅުން ބަދަހިކުރުމާއި، އެފަރާތްތަކަށް ޒުވާނުން ފަރާތުން ލިބޭ އެހީ އިތުރުކުރުމަށް، ޒުވާނުންނަށް ޢަމާޒުކޮށްގެންވެސް ސެޝަންތަކެއް ކުރިއަށް ގެންގޮސްފައިވެއެވެ. މި ޕްރޮގްރާމްގައި 149 ޒުވާނުން ބައިވެރިވެފައިވެއެވެ.
ރަންވޭލާ ކެމްޕެއިނަކީ 2016ވަނަ އަހަރު އިފްތިތާޙްކުރި ކެމްޕެއިނެކެވެ. މި ކެމްޕެއިންގެ ޙަރަކާތްތައް ބ.އަތޮޅާއި، ޅ.އަތޮޅާއި، ދ.އަތޮޅާއި، މ އަތޮޅުގައިވަނި ކުރިއަށް ގެންގޮސްފައިވެއެވެ.