ދިވެހިރާއްޖޭގެ ޖުމްހޫރިއްޔަތަށް 50 އަހަރު ފުރުމާއި ދިވެހި ސިވިލް ސާރވިސްއަށް 10 އަހަރު ފުރުން ފާހަގަކުރުމުގެ ގޮތުން ހޯމް މިނިސްޓްރީއާއި ސިވިލް ސާވިސް ކޮމިޝަން ގުޅިގެން ހަރަކާތްތަކެއް ބާއްވަން ނިންމައިފިއެވެ.
ހަރަކާތްތަކާއިބެހޭ ގޮތުން މަޢުލޫމާތު ދިނުމަށް ސިވިލް ސާރވިސް ކޮމިޝަނުގައި ބޭއްވި ޕްރެސް ކޮންފަރެންސްގައި ވާހަކަދައްކަވަމުން ސިވިލް ސާރވިސް ކޮމިޝަންގެ ރައީސް ޑރ ޢަލީ ޝަމީމް ވިދާޅުވީ މިދެމުނާސަބާ އެހާ ކުލަގަދަކޮށް ފާހަގަކުރަނީ ދިވެހިންގެ މެދުގައި ޖުމްހޫރީ ވެރިކަމުގެ ނިޒާމާމެދު ހޭލުންތެރިކަން އިތުރުކުރުމަށާއި ސިވިލް ސާރވިސް ކޮމިޝަނުން ކުރަމުންދާ މަސައްކަތް ފާހަގަކުރުމަށް ކަމަށެވެ.
"މިދެމުނާސަބާ ފާހަގަކުރުމުގެ މަޤްސަދަކީ ދިވެހިންގެ މެދުގައި ޖުމްހޫރީ ވެރިކަމުގެ ނިޒާމަށް ހޭލުންތެރިކަން އިތުރުކޮށް މިނިޒާމުގެ މަޢުލޫމާތު އާންމުނަށް ދިނުން. އަދި ސިވިލް ސާރވިސްގެ އަހަރީ ދުވަސް ފާހަގަކުރުމުގެ ބެނުމަކީ އެކި މުއައްސަސާތަކުން ކުރާ މަސައްކަތް ދެނެގަނެ، ސިވިލް ސާރވަންޓުންގެ އިޖުތިމާއީ ހުނަރުތައް ހަރުދަނާކޮށް، އެހުނަރުތައް އާންމުކޮށް ދައްކާލުމަށް ފުރުސަތުދިނުމަށް" ޑރ. ޢަލީ ޝަމީމް ވިދާޅުވިއެވެ.
މިހަރަކާތްތަކާ ބެހޭ ތަފްސީލް ހާމަކުރަމުން ހޯމް މިނިސްޓްރީގެ ފަރާތުން ވިދާޅުވީ އޭޕްރިލް މަހުގެ 5 ވަނަ ދުވަހު ސީ.އެސް.ސީގެ އަހަރީ ދުވަސް ފާހަގަކުރުމަށް މުވައްޒަފުންގެ އިޖްތިމާއީ ހުނަރުތައް ދައްކާލުމަށް ޓެލެންޓް ޝޯވއެއް އޮލިންޕަހުގައި ބާއްވަން މަސައްކަތް ކުރަމުންދާކަމަށެވެ. އަދި ޖުމްހޫރިއްޔަތަށް 50 އަހަރު ފުރުން ފާހަގަކުރުމަށް ބާއްވާ ޙާއްޞަ ކުޑަކުދިންގެ ހަވީރެއް އޭޕްރިލް 6 ވަނަ ދުވަހު ހަވީރު ޓްރެކް ސަރަހައްދުގައި އޮންނާނެކަމަށެވެ. މި ހަވީރުގައި ސިވިލް ސާރވިސްއާ އަމިއްލަ މުވައްސަސާތައް ހިމެނޭހެން 28 ފަރާތަކުން ބައިވެރިވާނެކަމަށާއި، ޓެލެންޓް ޝޯވގައި 11 އައިޓަމެއް މިހާތަނަށް ސިވިލް ސާރވިސްގެ އެކިއެކި މުވައްސަސާތަކުން ބައިވެރިކޮށްފައިވާކަމަށް ސިވިލް ސަރވިސްއިން ބުނެއެވެ.
"މުޅި އަހަރަށް ބަހާލައިގެން މާލެއާ އަތޮޅުތަކުގައި މިދެދުވަސް ފާހަގަކުރުމަށް 13 ކަމެއް ކުރުމަށް ހަމަޖެހިފައިވޭ. މިގޮތުން އޭޕްރިލް 5ވަނަ ދުވަހު އޮންނާނީ ސިވިލް ސާރވިސްގެ ޓެލެންޓް ޝޯވ އަދި 6 ވަނަ ދުވަހު ކުޑަކުދިންގެ ހަވީރު. މީގެ އިތުރުން މޭމަހުގެ 10-11 އަށް ސިވިލް ސާރވިސް ނޭޝަނަލް ކޮންފަރެންސެއް ބޭއްވުމަށް މިދަނީ މަސައްކަތްކުރަމުން. އަދި މިއަހަރުގެ ތެރޭގައި ސިވިލް ސާރވިސްގެ އެކި އިދާރާތަކުގައި އޯޕަން ޑޭވެސް ބޭއްވުމަށް ވަނީ ހަމަޖެހިފައި. މީގެއިތުރުން މުޅި އަހަރަށް ބަހާލައިގެން ކުޅިވަރުގެ ހަރަކާތްތައްވެސް ކުރިޔަށްދާނެ. 1 މޭގައި ސިވިލް ސާރވިސްގެ އަހަރީ ދުވަސް ފާހަގަކުރުމަށް ބާއްވާ ރަސްމީ ޖަލްސާވެސް އޮންނާނެ. އަދި ރޯދަމަހަށް ޙާއްޞަކޮށް ޤުރުއާން އަދި މަދަހަ މުބާރާތް ބޭއްވުމަށް ދަނީ ތައްޔާރުވަމުން" ޢަލީ ޝަމީމް ވިދާޅުވިއެވެ.
މިހަރަކާތްތަކުގައި ވީހާވެސް ގިނަ ރައްޔިތުން ބައިވެރިވުމަށް ހޯމް މިނިސްޓްރީ އާއި ސިވިލް ސާރވިސް ކޮމިޝަނުން އެދެއެވެ.