ހިޔާ މަޝްރޫޢުގެދަށުން މޯލްޑިވްސް ޕޯޓްސް ލިމިޓެޑް އެމްޕީއެލުން އަޅާ ހައުސިންގ ޔުނިޓްތަކަށް ކުރިމަތިލުމުގެ ފުރުޞަތު މިމަހު ފަހުކޮޅު ހުޅުވާނެކަމަށް އެމްޕީއެލުން ބުނެފިއެވެ.
ހިޔާ މަޝްރޫޢުގެދަށުން އެމްޕީއެލުން ތިން ޓަވަރު އެޅުމުގެ މަސައްކަތް މިހާރު ކުރިއަށްދާއިރު ހައުސިންގ ޔުނިޓްތަށް ލިބޭ މުވައްޒަފުން ފްލެޓް ނަގަން ބޭނުންވާ މާލީ އެހީތެރިކަން ތަނަވަސްކޮށްދިނުމުގެ މަސައްކަތް ދަނީ ކުރަމުންނެވެ. އެގޮތުން ބޭންކުތަކާއި ކަމާގުޅުންހުރި އިދާރާތަކާއި މަޝްވަރާކުރަމުންދާ ކަމަށް އެމްޕީއެލުން ބުނެއެވެ. މީގެ ތެރޭގައި ޕެންޝަންފަންޑާއި ލޯނުގެ ޒަރިއްޔާއިން ހައުސިންގ ޔުނިޓްތަކަށް ފައިސާ ދެއްކޭނެ އިންތިޒާމް ހަމަޖެއްސުމަށް ބޭންކްތަކާއިއެކު ކުރިއަށްދާ މަޝްވަރާތައްވެސް ހިމެނެއެވެ.
ހިޔާ މަޝްރޫޢޫގެ ދަށުން އެމްޕީއެލުން އަޅަމުންދާ ޓަވަރުގެ ޢަމަލީ މަސައްކަތްތަށް ބަލާއިރު މިހާރު ކުރަމުންދަނީ ފައުންޑޭޝަން އެޅުމުގެ މަސައްކަތެވެ. އެމްޕީއެލުންއަޅާ ތިން ޓަވަރަކީ ސާދަ ފަންގިފިލާގެ ތިން ޓަވަރެވެ. މީގެތެރޭގައި ހިމެނެނީ އެއްކޮޓަރީގެ 204 އެޕާރޓްމެންޓާއި، ތިން ކޮޓަރީގެ 330 އެޕާރޓްމެންޓެވެ.
ހިޔާ މަޝްރޫޢުގެދަށުން ކުންފުނިތަކަށް ޢަމާޒުކޮށްގެން ޖުމްލަ 36 ޓަވަރު އެޅުމަށް ހަމަޖެހިފައިވެއެވެ. ކުންފުނިތަކުގެ މުވައްޒަފުންނަށް ޢަމާޒުކޮށްގެން ކުރިއަށްގެންދާ ބޯހިޔާވަހިކަމުގެ މަޝްރޫޢު "ހިޔާ މަޝާރޫއު"އަކީ ސަތޭކަ ހާސް މީހުންގެ އާބާދީއަކަށް ޢަމާޒުކޮށްގެން ކުރިއަށްގެންދާ މަޝްރޫޢުއެކެވެ. މިއީ ދައުލަތުގެ ކުންފުނިތަކާއި، ސަރުކާރު ހިއްސާވާ ކުންފުނިތަކުގެ މުވައްޒަފުންނަށް ބޯހިޔާވަހިކަން ފޯރުކޮށްދިނުމަށް ރަޢީސުލްޖުމްހޫރިއަޔާ ފައްޓަވައިދެއްވި މަޝްރޫޢެކެވެ.