ބޮޑުތަކުރުފާނު މަގުގެ އިންޑަސްޓްރިއަލް ވިލެޖުން ފެށިގެން ބްރިޖާއި ހަމައަށް ހިމެނޭ ޞަރަޙައްދުގައި ތާރުއެޅުމުގެ މަސައްކަތް އަންނަމަހު ފަށާނެކަމަށް ހައުސިންގ މިނިސްޓަރ ޑރ މުޙައްމަދު މުޢިއްޒު ވިދާޅުވެއްޖެއެވެ. މިނިސްޓަރ ވިދާޅުވީ ބްރިޖާއި އިންޑަސްްޓްރިއަލް ވިލެޖުގެ މަސައްކަތް ނިންމައި ބޭނުންކުރަން ފަށާއިރު މާލޭގެ އެ ޞަރަޙައްދުގެ މަގުތަކަށް ބޮޑެތި ބަަލުތަކެއް އަންނާނެކަމަށެވެ. މަގުގައި ތާރުއެޅުމަށް ހަމަޖެހިފައިވަނީ ދެ ފިޔަވައްސަކަށް ބަހާލައިގެންނެވެ. އެގޮތުން ފުރަތަމަ ފިޔަވަހީގައި އިންޑަސްޓްރިއަލް ވިލެޖާއި ބްރިޖާއި ދެމެދު، އަދި ދެވަނަ ފިިޔަވަހީގައި ބްރިޖުން ފެށިގެން ކިންގ ސަލްމާން މިސްކިތާއި ހަމައަށް ބޮޑުތަކުރުފާނުމަގުގައި ތާރުއަޅާނެކަމަށް މިނިސްޓަރ ވިދާޅުވިއެވެ. އަދި އޯގަސްޓްމަހުގެ ނިޔަލަށް މި މަސައްކަތް ނިމޭނެކަމަށްވެސް މިނިސްޓަރ ވިދާޅުވިއެވެ.
"ބޮޑުތަކުރުފާނުމަގު އިންޑަސްޓްރިއަލް ވިލެޖު ސަރަޙައްދުން ބްރިޖް ސަރަޙައްދާއި ހަމައަށް މަގުގެ ޑިޒައިނަށް ބޮޑެތި ބަދަލުތަކެއްގެނެސް، ދުއްވާ ސަރަޙައްދު ފުޅާކޮށް ތާރުއަޅާނެ. ދެން ކިންގ ސަލްމާން މިސްކިތާއި ހަމައަށް ތާރުއަޅާއިރު އަރޓިފިޝަލް ބީޗްތެރެއަށް މަގު ފުޅާކުރާނެ." ހައުސިންގ މިނިސްޓަރ ވިދާޅުވިއެވެ.
މިނިސްޓަރ ވިދާޅުވީ އިއްޒުއްދީނުމަގަށް ބަދަލުގެނައުމަށް ނިންމާފައިވަނީ، އިންޑަސްޓްރިއަލް ވިލެޖުގެ މަސައްކަތް ނިމޭއިރު، އެމްޕީއެލުން މުދާނެރެ ގުދަންކުރުމަށް އެ ޞަރަޙައްދައް ގެންދިއުމަށް ފަސޭހަ ވާނެގޮތައް ކަމަށެވެ. މި ބަދަލުގެންނައިރު ޓްރެފިކަށް ދިމާވާ ކަންކަން ކުޑަކުރުމަށް ޢިއްޒުއްދީނުމަގަކީ ޕާކުނުުރެވޭ މަގަކަށް ހަދާނެކަމަށް މިނިސްޓަރ ވިދާޅުވިއެވެ. އަދި މީގެއިތުރުން އެ މަގަކީ ދެކޮޅަށް ދުއްވާ މަގަކަށް ބަދަލުކުރާނެކަމަށްވެސް މިނިސްޓަރ ވިދާޅުވިއެވެ.
" އިއްޒުއްދީން މަގުގެ މަސައްކަތް ނިމޭއިރު، އެސަރަހައްދުގައި ދެ ޕަރކިންގ ސިސްޓަމް ޤާއިމުކޮށް، އެ މަގަގީ ޕާކު ނުކުރެވޭ، ދެކޮޅަށް ދުއްވާ މަގަކަށް ބަދަލުކުރާނަން" ހައުސިންގ މިނިސްޓަރ ވިދާޅުވިއެވެ.
މިނިސްޓަރ ވިދާޅުވީ މިމަސް ނިމުގެކުރިން ބޮޑުތަކުރުފާނުމަގާއި އަމީނީމަގާއި ދެމެދުން އިއްޒުއްދީންމަގުގައި ތާރުއަޅާ ނިމެނޭކަމަށެވެ.