އިންޖީނުލީ އުޅަނދުތައް ދުއްވުން މަދުކޮށް، ތިމާވެއްޓާ ރަށްޓެހި ކަންކަމަށް ޢާއްމުން ހޭލުންތެރިކުރުވުމުގައި ފުޅާ ދާއިރާއެއްގައި ހަރަކާތްތެރިވަމުން އަންނަ ޖަމިއްޔާއެއްކަމަށްވާ ބައިކް މޯލްޑިވްސްގެ ފުރަތަމަ އަހަރީ ޢާއްމު ޖަލްސާ ބާއްވައިފިއެވެ.
ބައިކް މޯލްޑިވްސްގެ ފުރަތަމަ އަހަރީ އާއްމު ޖަލްސާގައި އެ ޖަމިއްޔާގެ 2017 ވަނަ އަހަރުގެ އަހަރީ ރިޕޯޓް ހުށައަޅާއި، ފާސްކުރުން ވަނީ ކުރިއަށްގެންގޮސްފައެވެ. އަދި 2018 ވަނަ އަހަރަށް އެޖަމިއްޔާއިން ކަނޑައަޅާފައިވާ ބަޖެޓް ފާސްކުރުމާއި، ޖަމިއްޔާގެ ހިންގުން ހަރުދަނާކުރުމަށްޓަކާ އިތުރަށް ކުރެވިދާނެ ކަންތައްތަކާއި ގުޅޭގޮތުން އާއްމު މެންބަރުންގެ މެދުގައި މަޝްވަރާކޮށްފައިވެއެވެ. 2017 ވަނަ އަހަރު ބައިކް މޯލްޑިވްސްގެ ފަރާތުން ކުރިއަށްގެންގޮސްފައިވާ ތަފާތު ހަރަކާތްތަކަށް ބަލާލާއިރު، ކޮންމެ ހަފްތާ ބަންދެއްގައި ބާއްވާ ހަރަކާތްތަކުގެ އިތުރުންވެސް މާލެއާއި، އަތޮޅުތަކުގައި ބައިސިކަލް ދުއްވުމުގެ ތަފާތު އިވެންޓްތަކާއި، ތިމާވެށި ސާފުކުރުމުގެ ހަރަކާތްތައް ހިންގާފައިވެއެވެ. އަދި ހަމައެހެންމެ ނެޝެނަލް ބައިކް ޗެމްޕިއަންޝިޕްގެ ނަމުގައި ބައިސިކަލް ދުއްވުމުގެ ހާއްސަ މުބާރާތެއްވެސް ވަނީ ބާއްވާފައެވެ.
މީގެ އިތުރުން، ދުޅަހެޔޮ ސިއްޙަތެއްގައި ތިބުމަށް އާއްމުންނަށް ހިތްވަރު ދިނުމުގެގޮތުން ދަޢުލަތުގެ މީޑިއާ، ޕީ.އެސް.އެމްއާއި ދެމެދު އެއްބަސްވުމެއް ޤާއިމުކޮށް، އެ އެއްބަސްވުމުގެ ދަށުންވެސް ތަފާތު ކަންތައްތައް ކުރަމުންދާކަން ފާހަގަކޮށްލެވެއެވެ. ފާއިތުވި އަހަރު ބައިކް މޯލްޑިވްސްގެ ހިންގާ ކޮމެޓީގެ 7 ޖަލްސާއެއް ބާއްވާފައިވާއިރު، 2 އާއްމު ޖަލްސާއެއް ބާއްވާފައިވެއެވެ. ބައިކް މޯލްޑިވްސްގެ އަހަރީ އާއްމު ޖަލްސާގައި 2018 ވަނަ އަހަރަށް 4 ލައްކަ 20 ހާސް ރުފިޔާގެ ބަޖެޓެއް ފާސްކޮށްފައިވާއިރު، މި ބަޖެޓް ހަރަދުކުރުމަށް ހަމަޖެހިފައިވަނީ މައިގަނޑު 6 ދާއިރާއަކަށްކަމަށް އެ ޖަމިއްޔާއިން ބުނެއެވެ. އެގޮތުން، ސްކޫލް މުބާރާތްތަކާއި، ބައިކް ޗެމްޕިއަންޝިޕް މުބާރާތް ބޭއްވުމާއި، ބައިކް މޯލްޑިވްސްގެ ޑިނަރ ނައިޓް ބޭއްވުމާއި، ރާއްޖެއާއި ރާއްޖޭން ބޭރަށް ކުރުމަށް ހަމަޖެހިފައިވާ ދަތުރުތަކާއި، އިޖްތިމާޢީ ހަރަކާތްތަކުގެ އިތުރުން ޖަމިއްޔާ ހިންގުމުގެ މަސައްކަތަށެވެ.
img:http://s2.psmnews.mv/images/660x400/15205361253707.jpg|ބައިކް މޯލްޑިވްސްގެ އަހަރީ ޢާއްމު ޖަލްސާ
ޕީ.އެސް.އެމް ނިއުސްއަށް މަޢުލޫމާތު ދެއްވަމުން ބައިކް މޯލްޑިވްސް ސީ.އީ.އޯ އަޙްމަދު ޙަސަން ދީދީ ވިދާޅުވީ، ފާއިތުވި އަހަރަކީ އެ ޖަމިއްޔާއަށް ހުރިހާގޮތަކުންވެސް ކާމިޔާބު އަހަރެއްކަމަށާއި، ޖަމިއްޔާ އުފެއްދި މައިގަނޑު މަޤްޞަދު ހާސިލުކުރުމަށް ކާމިޔާބު ހަރަކާތްތަކެއްވެސް ހިންގުނު އަހަރެއްކަމަށެވެ. އޭނާ ވިދާޅުވީ، އެ ޖަމިއްޔާގެ އެކްޓިވިޓީ ކަލަންޑަރުގައި ޝެޑިއުލްކުރެވިގެން މިއަހަރުވެސް މުހިއްމު ހަރަކާތްތަކެއް ކުރިއަށްގެންދިއުމަށް ހަމަޖެހިފައިވާކަމަށެވެ. އަދި ޖަމިއްޔާއަށް މެމްބަރުން އިތުރުކުރުމަށްވެސް ހާއްސަ ކަންތައްތަކެއް މިއަހަރުގެ ތެރޭގައި ކުރުމަށް ހަމަޖެހިފައިވާކަމަށެވެ.
ބައިކް މޯލްޑިވްސްގެ އަހަރީ އާއްމު ޖަލްސާގައި، އެ ޖަމިއްޔާގެ ފަރާތުން މިދިޔަ އަހަރު ބޭއްވި "ނެޝެނަލް ބައިކް ޗެމްޕިއަންޝިޕް"ގެ ތަފާތު ވަނަ ވަނައަށް ދިޔަ ފަރާތްތަކާއި ހަނދާނީ ލިއުމާއި، ފައިސާގެ އިނާމް ވަނީ ހަވާލުކޮށްފައެވެ. އެގޮތުން މި މުބާރާތުން ހުރިހާގޮތަކުން އެންމެ މޮޅު އަންހެން ބައިސިކަލް ދުއްވުން ތެރިޔަކަށް ހޮވާފައިވަނީ ޒުލްފާ ޢަލީ އަދި މޫމިނާ މުޙައްމަދެވެ. އަދި އެންމެ މޮޅު ފިރިހެން ބައިސިކަލް ދުއްވުން ތެރިޔަކަށް ހޮވާފައިވަނީ މީސަލް ޢިބްރާހީމް ޝަރީފެވެ.
ބައިކް މޯލްޑިވްސްއަކީ އިންޖީނުލީ އުޅަނދުތައް ދުއްވުން މަދުކޮށް، ތިމާވެއްޓާ ރަށްޓެހި ކަންކަން ޕްރޮމޯޓްކުރުމުގެ މަޤްޞަދުގައި ހަރަކާތްތެރިވަމުން އަންނަ އަމިއްލަ ޖަމިއްޔާއެކެވެ. ބައިސިކަލް އެސޯސިއޭޝަން އޮފް މޯލްޑިވްސްގެ ނަމުގައި މި ޖަމިއްޔާ ރަސްމީކޮށް ރަޖިސްޓްރީކޮށްފައިވަނީ 20 ޑިސެމްބަރ 2016 ގައެވެ. އެހެންނަމަވެސް 2015 ވަނަ އަހަރުން ފެށިގެން ބައިކް މޯލްޑިވްސްއިން އަންނަނީ ބައިސިކަލް ދުއްވުމަށް އާއްމުންނަށް ހިތްވަރުދީ، ތިމާވެއްޓާމެދު އާއްމުން ހޭލުންތެރިކުރުވުމަށް ތަފާތު ހަރަކާތްތައް އިންތިޒާމްކޮށް، ހިންގަމުންނެވެ. އެގޮތުން ބައިކް މޯލްޑިވްސް އަމިއްލައަށް އިސްނަގައިގެން ތަފާތު ހަރަކާތްތައް ކުރިއަށްގެންގޮސްފައިވާއިރު، ދުނިޔޭގެ ފެންވަރުގައި ފާހަގަކުރާ މުހިއްމު ދުވަސްތަކާއި ގުޅުވައިގެން ސަރުކާރުގެ މުއައްސަސާތަކުން ކުރިއަށްގެންދާ ހަރަކާތްތަކުގައިވެސް އެ ޖަމިއްޔާއިން އަންނަނީ ބައިވެރިވެ އެހީތެރިކަން ފޯރުކޮށްދެމުންނެވެ.