ރާއްޖޭގައި ފުރަތަމަ ފަހަރަށް ތަރައްޤީކުރި ޓަރޝަރީ ހޮސްޕިޓަލް، ޓްރީޓޮޕް ހޮސްޕިޓަލް ހުޅުވާ މިއަދު ހިދުމަތް ދޭން ފަށައިފިއެވެ.
ހޮސްޕިޓަލުގެ ޚިދުމަތް މިއަދު ފަށާފައިވާއިރު އާއްމުބަލިތަކާއި، ކުއްލި ޙާލަތުގައިދޭ ފަރުވާއާއި، އަންހެނުންގެ ބަލިތަކާއި، ބްލަޑް ބޭންކްގެ ޚިދުމަތާ، ހިތުގެ ބައެއް ބަލިތަކާއި، ދަތުގެ ފަރުވާއާއި، ފިޒިއޮތެރަޕީއާއި، ލެބޭޓްރީގެ ޚިދުމަތްތައް ލިބޭނެކަމަށް ޓްރީ ޓޮޕުން ބުނެއެވެ.
ޓްރީޓޮޕްގެ ޚިދުމަތްތައް ފަށާފައިވަނީ 4 ފިޔަވައްސަކަށް ބަހާލައިގެންނެވެ. އެގޮތުން ހޮސްޕިޓަލް ހުޅުވީ 23 ޚިދުމަތާއެކު ނަމަވެސް އަންނަ އޭޕްރީލްމަހު އިތުރު 11 ޚިދުމަތަކެއް ދޭން ފަށާނެކަމަށާއި ޖޫންމަހުގެ ތެރޭގައި ހިތުގެ ސަރޖަރީގެ ޚިދުމަތްވެސް ދޭން ފަށާނެކަމަށް އެ ހޮސްޕިޓަލުން ބުނެއެވެ.
ޓްރީޓޮޕުން ސްޕެޝަލިސްޓުންނާއި ސުޕަރސްޕެޝަލިސްޓުންނަށް އެޕޮއިންޓްމަންޓް ހެއްދެނީ 750 ރުފިޔާއަށްކަމަށް އެ ހޮސްޕިޓަލުން ބުނެއެވެ. ނަމަވެސް ދިވެހިންނަށް އެޕޮއިންޓްމަންޓް ލިބޭނީ 30 އިންސައްތަ ޑިސްކައުންޓާއިއެކު،525 ރުފިޔާއަށެވެ.
ޓްރީޓޮޕުން ބުނީ އެ ހޮސްޕިޓަލުން މިވަގުތު އާސަންދަ ދެމުން އަންނަނީ އެޑްމިޓްކޮށްގެ ފަރުވާދޭ މީހުންނަށް އެކަނިކަމަށެވެ. އެހެންނަމަވެސް އެޑިމިޓް ނުކޮށް ފަރުވާ ހޯދާ މީހުނަށް އާސަންދައިގެ ޚިދުމަތް ވަރަށް އަވަހަށް ލިބިގެންދާނެކަމަށް އެ ހޮސްޕިޓަލުން ބުނެއެވެ.
ޓްރީޓޮޕް ހޮސްޕިޓަލުން ފަރުވާ ހޯދުމަށް ބޭނުންވާ ފަރާތްތަކަށް އެ ހޮސްޕިޓަލްގެ ކޯލްސެންޓަރ 1610 މެދުވެރިކޮށް މާލޭގައި ހުންނަ އެ ހޮސްޕިޓަލްގެ ކްލިނިކާއި ޓްރީޓޮޕް ހޮސްޕިޓަލް މެދުވެރިކޮށް އެޕޮއިންޓްމަންޓް ހެއްދޭނެއެވެ. އަދި ވަރަަށް އަވަހަށް އޮންލައިންކޮށް އެޕޮއިންޓްމަންޓް ހެއްދޭނެ އިންތިޒާމުވެސް ތަޢާރުފްކުރާނެކަމަށް އެ ހޮސްޕިޓަލުން ބުނެއެވެ.
ޓްރީޓޮޕުންވަނީ އެޕޮއިންޓްމަންޓް ހެއްދުމުގައި ފަސޭހަކުރުމަށް ޕޭޝަންޓް ކާޑެއް ތަޢާރަފްކޮށްފައެވެ. މި ކާޑް މެދުވެރިކޮށް ކިއުގައި މަޑުނުކޮށް ހޮސްޕިޓަލްގައި ބަހައްޓާފައި ހުރި ކިއޮސްކް މެޝިންތައް މެދުވެރިކޮށް މެމޯ ނެގުމުގެ ޚިދުމަތް ލިބޭނެއެވެ.
ޓްރީޓޮޕް ހޮސްޕިޓަލުގައި 35 ޤައުމަކުން 80 ޑޮކްޓަރުންނާއި ނަރުހުން މި ވަގުތު މަސައްކަތްކުރަމުން ދެއެވެ. ޓްރީޓޮޕް ހޮސްޕިޓަލަކީ 210 އެނދުގެ ޖާގައިގެ ހޮސްޕިޓަލެކެވެ. މިއީ 110 މިލިއަން ޑޮލަރުގެ އިންވެސްޓްމަންޓެކެވެ.