ކާރިޘާއެއްގެ ވަގުތުގައި ދުރާލާ އިންޒާރުދޭ ނިޒާމާއި، އިމަރޖެންސީ ޙާލަތުގައި މުވާޞަލާތްކުރެވޭނެ ނިޒާމެއް ރާއްޖޭގެ އެކި ސަރަޙައްދުތަކުގައިި ޤާއިމުކުރުމަށް އެންޑީއެމްސީއާއި މޯލްޑިވްސް ނޭޝަނަލް ޑިފެންސް ފޯސްއާ ދެމެދު އެއްބަސްވުމެއްގައި ސޮއިކޮށްފިއެވެ.
މި ނިޒާމަކީ ރާއްޖޭގެ ހުރިހާ އަތޮޅުތަކެއް ހިމެނޭގޮތަށް ޤާއިމުކުރާ ނިޒާމެކެވެ. އެގޮތުން އެކި ސަރަޙައްދުތަކުން 33 ރަށުގައި މި ނިޒާމު ޤާއިމުކުރުމަށް ހަމަޖެހިފައިވެއެވެ. މި ނިޒާމުގެ ސަބަބުން ދިވެހިރާއްޖޭގައި ޤާއިމްކޮށްފައިވާ މުވާސަލާތީ ޚިދުމަތްދޭ ކުންފުނިތަކަށް ބަރޯސާނުވެ، ކާރިސާގެ ވަގުތުގައި، ސަރުކާރުގެ އިދާރާތަކާއި، ކާރިޘާގެ ކަންކަމުގައި ޙަރަކާތްތެރިވާ އިދާރާތަކަށް، މަދުވެގެން 6 ގަޑިއިރު މެދުކެނޑުމެއްނެތި ގުޅޭނެކަމަށް ނޭޝަނަލް ޑިޒާސްޓަރ މެނޭޖްމަންޓް ސެންޓަރުން މަޢުލޫމާތުދެއެވެ. މި މަސައްކަތަށް 1.7 މިލިއަން ރުފިޔާ ޚަރަދުކުރުމަށް ހަމަޖެހިފައިވެއެވެ.
މި އެއްބަސްވުމުގައި ސޮއިކުރުމަށް ބޭއްވި ރަސްމިއްޔާތުގައި ވާހަކަފުޅުދައްކަވަމުން ޑިފެންސް މިނިސްޓަރު އާދަމް ޝަރީފް ޢުމަރު ވިދާޅުވީ 2004ވަނަ އަހަރު ކުރިމަތިވި ސުނާމީ ކާރިސާގައިވެސް އެންމެ ބޮޑު ގޮންޖެހުމެއް ދިމާވީ މުވާސަލާތުކުރުމަށްކަމަށެވެ. އެގޮތުން މުވާޞަލާތް މެދުކެނޑުމުގެ ސަބަބުން ރަށްރަށަށް ކުރިމަތިވި ދަތިތައް ދެނެގަނެ، އެކަންކަން ޙައްލުކުރުމަށް ގިނަ ވަގުތުތަކެއް ހޭދަވިކަމަށެވެ. މިނިސްޓަރ ވިދާޅުވީ މި މަސައްކަތަކީ ސުނާމީ ކަރިޘާގެ ތަޖުރިބާއާއި، ރާއްޖެއަށް ދިމާވާ އެހެނިހެން ކުއްލި ނުރައްކަލުގެ ޙާލަތުގައި، މުވާސަލާތައް ބުރޫއަރާ މީހުން ސަލާމަތްްކުރުމުގެ މަސައްކަތައް ކުރިމަތިވި ގޮންޖެހުންތައް ކުޑަކުރުމަށްއެޅޭ މުހިންމު ފިޔަވަޅެއްކަމަށެވެ.
މުވާސަލާތުގެ މި ނެޓްވަރކް ޤާއިމުކުރުމަށް ހަމަޖެހިފައިވަނީ ޖަޕާނު ސަރުކާރުގެ ހިލޭ އެހީއާއި، އިންޑިއާގެ ސައުތް އޭޝިއާ ސެޓަލައިޓް މެދުވެރިކޮށެވެ. މިނިސްޓަރގެ ވާހަކަފުޅުގައިވަނީ، އިންޑިއާއާއި ޖަޕާނުން ރާއްޖޭގައި މިފަދަ މަޝްރޫޢުތައް ކުރިއަށްގެންދިއުމަށްދޭ އެއްބާރުލުން ފާހަގަކުރައްވާފައެވެ. މި ނިޒާމު ޤާއިމުކުރުމުގެ މަސައްކަތް އަންނަ މޭމަހުގެތެރޭގައި ނިންމުމަށް ވަނީ ހަމަޖެހިފައެވެ.