ޤައުމީ ދިފާޢީ ބާރަށް އަމާޒުކޮށް ސިފައިންގެ އަނބުރު ގެއްލޭގޮތަށް ފަތުރަމުންދާ ހަޤީޤަތާއި ޚިލާފު ވާހަކަތަކުގެ ސަބަބުން ދިވެހި އަސްކަރިއްޔާގެ ބަދަހި ލަޝްކަރު ފޫ އަޅުވާނުލެވޭނެކަމަށް ޑިފެންސް މިނިސްޓަރ ޢާދަމް ޝަރީފް ޢުމަރު ވިދާޅުވެއްޖެއެވެ.
ޕީ.އެސް.އެމް ނިއުސްއަށް ދެއްވި ހާއްސަ އިންޓަރވިއުއެއްގައި ޑިފެންސް މިނިސްޓަރ ޢާދަމް ޝަރީފް ޢުމަރު ވިދާޅުވީ، ރާއްޖޭގައި ސިޔާސީ ހަލަބޮލިކަން ހިނގާ ކޮންމެ ދަނޑިވަޅެއްގައި، އެކަންކަމާއި ގުޅުވައި ދިފާޢީ ބާރުގައި ހަރަކާތްތެރިވާ ސިފައިންނަށް އަމާޒުކޮށް، ހަޤީޤަތެއް ނެތް ދޮގު މަޢުލޫމާތު ފެތުރުމާއި، ސިފައިންގެ އަނބުރު ކަތިލުމަށް އެކި ކަހަލަ ޢަމަލުތައް ހިންގާކަމީ އައު މަންޒަރުތަކެއް ނޫންކަމަށެވެ. އެހެންނަމަވެސް އެފަދަ ޢަމަލުތަކުގެ ސަބަބުން، ދިވެހި އަސްކަރިއްޔާގެ ލަޝްކަރު ފޫ އަޅުވައިނުލެވޭނެކަމަށާއި، ރާއްޖޭގެ މިނިވަންކަން ނެގެހެއްޓުމުގައި ޤައުމީ ދިފާޢީ ބާރަކީ ނަމޫނާ ދައްކަމުންދާ ބައެއްކަމަށް މިނިސްޓަރ ވިދާޅުވިއެވެ."ޤައުމީ ދިފާޢީ ބާރުގެ އެކި ބޭބޭފުޅުންނަށް އަމާޒުކުރައްވައިގެން އެކިކަހަލަ ކަންތައްތައް ކުރަމުންދާކަން އަޅުގަނޑުމެންނަށް އެނގޭ. އެހެންނަމަވެސް ދިވެހި އަސްކަރިއްޔާއިން މިހާރުވެސް އަޅުގަނޑުމެންނަށް ލިބިފައިވާ ޔަޤީންކަމަކީ އެހެން އަދި ކުރާ ކަމެއްގެ ސަބަބުން ރާއްޖޭގެ ޤައުމީ ދިފާއީ ބާރުގެ ލަޝްކަރު ފޫއަޅުވައެއް ނުލެވޭނެކަން. އެއަށްވުރެ ސާބިތުކަމާއި، އަޒުމާއި، ހިތްވަރާއެކީގައި އެބޭފުޅުން ތިއްބެވީ" ޑިފެންސް މިނިސްޓަރ އާދަމް ޝަރީފް އުމަރު ވިދާޅުވިއެވެ.ޑިފެންސް މިނިސްޓަރ ވިދާޅުވީ، ޤައުމީ ދިފާޢީ ބާރުގައި މަސައްކަތްކުރާ ސިފައިންގެ ޒާތީ ދިރިއުޅުމައި ގުޅުވާ، ސޯޝަލް މީޑިއާއާއި އެހެނިހެން ވަސީލަތްތައް މެދުވެރިކޮށް ފަތުރާ ހަޤީޤަތާއި ޚިލާފު ވާހަކައެއްގެ ސަބަބުން، ސިފައިންގެ ހިތްވަރަށް އަދި އަޒުމަކަށްވެސް އެއްވެސް ގުނޑުމެއް ނާރާނެކަމަށެވެ. އަދި ޤައުމީ ދިފާޢީ ބާރަކީ ހިނގާފާނެ ކޮންމެކަމަށްކަށްވެސް ވަރަށް ދުރާލާ ތައްޔާރުވެގެން ތިބޭ ބައެއްކަމަށެވެ.
"އެގޮތަށް ސޯޝަލް މީޑިއާ ނުވަތަ ޙަބަރު ފަތުރާ ވަސީލަތްތަކުގައި ޤައުމީ ދިފާޢީ ބާރުގެ އެކި ބޭބޭފުޅުންގެ ޒާތީ ކަންތައްތަކާއި ގުޅުވައިގެން، ނުވަތަ އެބޭފުޅުންނާއި ބެހޭގޮތުން ދައްކާ ވާހަކައަކުން އެބޭފުޅުންގެ ހިތްވަރަކަށް އެއްވެސް ބަދަލެއް ނާންނާނެ. އަދި އޭގެ ސަބަބުން އެއްވެސް ނަތީޖާއެއް ނުނިކުންނާނެ. ރާއްޖޭގެ ޤައުމީ ދިފާޢީ ބާރު މިއޮތީ ވަރަށް ރަނގަޅަށް ހުށިއާރުވެ، ވަރަށް ބަދަހިކަންމަތީ" ޑިފެންސް މިނިސްޓަރ އާދަމް ޝަރީފް އުމަރު ވިދާޅުވިއެވެ.ޑިފެންސް މިނިސްޓަރ ވަނީ ސިޔާސީ މަންފާތަކެއް ޙާސިލްކުރުމުގެ މަޤްޞަދުގައި ހިންގާ މިފަދަ ޢަމަލުތައް ކުރާ ފަރާތްތަކުން، އެކަންކަން ކުރުން ހުއްޓާލުމަށް ގޮވާލައްވާފައެވެ. އަދި ވަކި ފަރުދެއްގެ މަސްލަހަތައްވުރެ، ޤައުމުގެ މަސްލަޙަތު އަބަދުވެސް މުހިއްމުވާނެކަން ދިވެހި ކޮންމެ ރައްޔިތަކުމެ އަބަދުވެސް ހަނދާންކުރަންވާނެކަމަށް މިނިސްޓަރ ވިދާޅުވިއެވެ.