ރާއްޖޭގެ ރީތިކަން ދައްކުވައިދޭ ފޮޓޯ ނަގައިގެން 25 ހާސް ރުފިޔާ ހޯދުމުގެ ފުރުސަތު ބެންކް އޮފް މޯލްޑިވްސް އިން ހުޅުވާލައިފިއެވެ.
މުބާރާތެއްގެ ގޮތުގައި އާންމުންނަށް ހުޅުވާލި މި ހަރަކާތަށް ފޮޓޯ އަޕްލޯޑްކުރަންޖެހެނީ ސޯޝަލް މީޑިއާގެ މަޝްހޫރު ޕްލެޓްފޯމެއް ކަމަށްވާ އިންސްޓަގްރާމްގައެވެ. ޝާއިޢުކުރާ ފޮޓޯތަކުން ދައްކުވައިދޭންޖެހެނީ ރާއްޖޭގެ ރީތިކަން ކަމަށް ބީއެމްއެލްއިން ބުނެއެވެ. އަދި ކޮންމެ ފޮޓޯއެއް ޝާއިޢުކުރާއިރު "ހޭޝްޓެގް އަހަރެންގެ ރާއްޖެ" ހިމަނަން ޖެހެއެވެ.
މި މުބާރާތުން އެއްވަނައަށް އިނާމެއްގެ ގޮތުގައި ކަނޑައަޅާފައިވަނީ 25،000 ރުފިޔާއެވެ. ދެވަނައަށް ދާ ފަސް ފަރާތަކަށްވެސް އިނާމު ކަނޑައެޅިފައިވާކަމަށް ބީއެމްއެލްއިން ބުނެއެވެ.
މިއީ 'އަހަރެންގެ ބޭންކް' ކެމްޕޭންގެ ދަށުން ބޭންކް އޮފް މޯލްޑިވްސް އިން ހިންގުމަށް ހަމަޖެހިފައިވާ ޙަރަކާތެކެވެ.
މި ކަމާ ގުޅޭގޮތުން ބީއެމްއެލްގެ ސީއީއޯ އަދި މެނޭޖިންގ ޑައިރެކްޓަރ އެންޑްރޫ ހީލީ ވިދާޅުވީ އަމާޒަކީ މުޅި ރާއްޖެ ޝާމިލްވާ ގޮތަށް މިއަހަރުތެރޭ މުޖުތަމަޢަށް އެހީތެރިކަން ފޯރުކޮށްދިނުމުގެ 60 ޕްރޮގްރާމް ހިންގުންކަމަށެވެ.
އެގޮތުން މި ހިނގާ ފެބްރުއަރީ މަހުގެ ކޮންމެ ދުވަހެއްގައި އަދި މުޅި އަހަރު ތެރޭގައި، ތަޢުލީމާއި ކުޅިވަރާއި ތިމާވެށީގެ އެކިއެކި ހަރަކާތްތަކަށާއި ހިލޭ ސާބަހަށް މަސައްކަތްކުރާ ފަރާތްތަކަށް، އެ ބޭންކުގެ އެހީތެރިކަން ލިބިގެންދާނެކަން އެންޑްރޫ ވިދާޅުވިއެވެ.