ތ. އަތޮޅު ރުއްތިބިރަށުގައި ތަރައްޤީކުރާ ރިސޯޓުގެ ބިންގާ އަޅައިފިއެވެ. ދަ އިންޑަސް މޯލްޑިވްސް ރިސޯޓް އެންޑް ސްޕާގެ ނަމުގައި ތަރައްޤީކުރާ މިރިސޯޓުގެ ބިންގާ އަޅުއްވައިދެއްވީ ރިސޯޓު ތަރައްޤީކުރާ ކުންފުނި، އެމްއެސްއެން ރިއަލިޓީ މޯލްޑިވްސް ޕްރައިވެޓް ލިމިޓެޑްގެ މެނޭޖިންގ ޑިރެކްޓަރ މަލްޑީ މުޒައްވިރު އާއި އެކުންފުނީގެ ބޯޑް ޑިރެކްޓަރ ފައިސަލް އިބްރާހީމެވެ.
ބިންގާ އެޅުމުގެ ރަސްމިއްޔާތަށްފަހު ޕީއެސްއެމް ނިއުސްއަށް މަޢުލޫމާތު ދެއްވަމުން އެމްއެސްއެން ރިއަލިޓީ މޯލްޑިވްސް ޕްރައިވެޓް ލިމިޓެޑްގެ ބޯޑް ޑިރެކްޓަރ ފައިސަލް އިބްރާހީމް ވިދާޅުވީ އަމާޒަކީ 2019 ވަނަ އަހަރުގެ ޑިސެމްބަރމަހު ރިސޯޓު ހުޅުވުން ކަމަށެވެ. މިއީ ފަސްތަރީގެ ރިސޯޓެއް ކަމަށާއި ރިސޯޓް ތަރައްޤީކޮށް ނިމޭއިރު 170 ކޮޓަރި ހުންނާނެ ކަމަށް އޭނާ ވިދާޅުވިއެވެ. ރުއްތިބިރަށުގައި ރިސޯޓު ތަރައްޤީކޮށް ނިމުމުން މި ސަރަހައްދަށް އިޤްތިސާދީ ގޮތުން ބޮޑެތި ކުރިއެރުންތައް ލިބޭނެކަން އޭނާ ފާހަގަކުރެއްވިއެވެ.
މި ރިސޯޓް ތަރައްޤީކޮށް ނިމޭއިރު 4 ރެސްޓޯރެންޓް ހުންނާނެކަމަށް ރިސޯޓް ތަރައްޤީކުރާ ފަރާތުން މައުލޫމާތުދެއެވެ. އޭގެ ތެރޭގައި ބޯޓެއްގެ ސިފައިގަ މޫދުގަ އަޅާ ފުލޯޓިންގ ރެސްޓޯރެންޓާއި ސަންސެޓް ބަރއާއި މެއިން ރެސްޓޯރެންޓް ހިމެނެއެވެ. އަދި ރިސޯޓާއި ކައިރީގައި 3 ޕްރައިވެޓް ރަށާއި ޕިކްނިކް ރަށެއް އޮންނާނެއެވެ.
ތ އަތޮޅު ރުއްތިބިރަށަކީ ރިސޯޓެއް ތަރައްޤީކުރުމަށް އައިލެންޑް އޭވިއޭޝަންއަށް ދޫކޮށްފައިވާ ރަށެކެވެ. އައިލެންޑް އޭވިއޭޝަނުން އެމްއެސްއެން ރިއަލިޓީ މޯލްޑިވްސް އާއިއެކު އެއްބަސްވުމުގައި ސޮއިކުރީ 2016 ވަނަ އަހަރުގައެވެ. ރުއްތިބިރަށަކީ ތ. ކިނބިދޫގެ ހުޅަނގު ދެކުނުން 1 ކިލޯމީޓަރު ދުރުގައި އޮންނަ ރަށެކެވެ. މިރަށް އެމްއެސްއެން ރިއަލިޓީ މޯލްޑިވްސްއަށް ރިސޯޓް ހިންގުމަށް ދޫކޮށްފައިވަނީ 50 އަހަރުދުވަހުގެ މުއްދަތަކަށެވެ.