މިނިސްޓަރ އޮފް ޖެންޑަރ އެންޑް ފެމިލީ ޒެނީޝާ ޝަހީދު ޒަކީ ލާއޯސްގެ ފޮރިން މިނިސްޓަރ ސަލަމް ސޭކޮމަސިތާއި ބައްދަލުކުރައްވައިފިއެވެ.
ޖެންޑަރ މިނިސްޓަރ ލާއޯސްގެ ފޮރިން މިނިސްޓަރާއި ބައްދަލުކުރައްވާފައި ވަނީ އެކަމަނާ މިހާރު ލާއޯސްއަށް ކުރައްވަމުން ގެންދަވާ ރަސްމީ ދަތުރުފުޅުގެ ތެރެއިންނެވެ. މި ބައްދަލުކުރެއްވުމުގައި ރާއްޖެއާއި ލާއޯސްއާއި ދެމެދު އޮތް ގުޅުން އިތުރަށް ހަރުދަނާކޮށް، އެކި ދާއިރާތަކުން އެއްބާރުލުން ދިނުމާއި ގުޅޭގޮތުން ވަރަށް ފުޅާ ދާއިރާއެއްގައި މަޝްވަރާކުރައްވާފައިވެއެވެ.
img:http://s2.psmnews.mv/images/660x400/15168676094178.jpg|ޖެންޑަރ މިނިސްޓަރ ޒެނީޝާ ޝަހީދު ޒަކީ ލާއޯސްއަށް ކުރައްވާ ދަތުރުފުޅުގެ ތެރެއިން
ޖެންޑަރ މިނިސްޓަރ ލާއޯސްއަށް ކުރައްވަމުން ގެންދަވާ މި ދަތުރުފުޅުގައި އެ ޤައުމުގެ ލުއާންގ ޕްރަބާންގްގައި ހުންނަ "ޑީކް ކުމް ޕާ އޯފަނޭޖް" އަދި "ސޯންލުއާންގް ބޯޑިންގ ސްކޫލް" އަށް ވަނީ ޒިޔާރަތްކުރައްވާފައެވެ. އެކަމަނާގެ މި ޒިޔާރަތުގައި އެ ދެ ސެންޓަރުގެ އިސްވެރިންނާއި ބައްދަލުކުރައްވާ، ދަޢުލަތުގެ ބެލުމުގެ ދަށުގައި ތިބޭ ކުޑަކުދިން ތަރުބިއްޔަތުކުރުމާއި ގުޅޭގޮތުން އެބޭފުޅުންގެ ތަޖުރިބާ އޮޅުންފިލުއްވާފައިވެއެވެ. އަދި އެތަނުގެ ދަރިވަރުންނާއެކު ޖެންޑަރ މިނިސްޓަރ ވަނީ އުފާވެރި ވަގުތުކޮޅެއް ހޭދަކުރައްވާފައެވެ.