އެންޓި ކޮރަޕްޝަން ކޮމިޝަނަށް 2017 ވަނަ އަހަރުގެ 4 ވަނަ ކުއާޓަރގައި 182 މައްސަލަ ހުށައަޅާފައިވާކަމަށް އެ ކޮމިޝަނުން ބުނެފިއެވެ.
އެންޓިކޮރަޕްޝަން ކޮމިޝަނުގެ ތަފާސް ހިސާބުތައް ދައްކާގޮތުން 2017 ވަނަ އަހަރުގެ ތެރޭގައި 775 މައްސަލަ އެކޮމިޝަނަށް ހުށައަޅާފައިވެއެވެ. މީގެތެރެއިން 182 މައްސަލައަކީ 4 ވަނަ ކުއާޓަރގައި ރަޖިސްޓްރީ ކޮށްފައިވާ މައްސަލަތަކެވެ. 2016 ވަނަ އަހަރުގެ މި މުއްދަތުގެ ތެރޭގައި އެ ކޮމިޝަނަށް 281 މައްސަލަ ހުށައަޅާފައިވެއެވެ.
އޭ.ސީ.ސީއަށް ހުށައެޅުނު މައްސަލަތަކުގެ ތެރެއިން އެ ކޮމިޝަނުން ދިރާސާ ކުރުމަށްފަހު، 2017 ވަނަ އަހަރުގެ 4 ވަނަ ކުއާޓަރުގައި ތަޙްޤީޤު ކުރުމަށް ނިންމާފައިވަނީ 143 މައްސަލައެެވެ. އަދި ކޮމިޝަނަށް ހުށަހަޅާ ޝަކުވާތަކުގެ ތެރެއިން ކޮމިޝަންގެ މެންޑޭޓަށް ނުފެތޭތީ 23 މައްސަލައެއް ދައުލަތުގެ ކަމާބެހޭ އިދާރާތަކަށް ފޮނުވާފައިވާއިރު، 2016 ވަނަ އަހަރުގެ އެމުއްދަތުގައި ކޮމިޝަނުން އެހެނިހެން އިދާރާތަކަށް ފޮނުވާފައިވަނީ 15 މައްސަލައެވެ.
މީގެއިތުރުން، ކޮމިޝަނުގެ މެންޑޭޓަށް ނުފެތޭތީއާއި އެކަށީގެންވާ ވަރަށް މަޢުލޫމާތު ލިބިފައިނުވާތީ 32 މައްސަލަ މިދިޔަ އަހަރުގެ 4 ވަނަ ކުއާޓަރގައި ނުބަލާ ދޫކޮށްލާފައިވެއެވެ.
2016 ވަނަ އަހަރެކޭ އެއްފަދައިން 2017 ވަނަ އަހަރުގެ 4 ވަނަ ކުއާރޓާގައި އެންމެ ގިނައިން އެންޓި ކޮރަޕްޝަން ކޮމިޝަނަށް ހުށައަޅާފައިވަނީ ޕްރޮކިޔުމަންޓާ ގުޅޭ މައްސަލަތަކެވެ. އެގޮތުން ޕްރޮކިއުމަންޓާ ގުޅޭ 69 މައްސަލަ އޭ.ސީ.ސީއަށް ހުށައަޅާފައިވެއެވެ. މިދިޔަ އަހަރުގެ 4 ވަނަ ކުއާރޓާގައި އޭ.ސީ.ސީއަށް ހުށައެޅުނު އިތުރު މައްސަލަތަކަށް ބަލާއިރު، ވަޒީފާއާގުޅޭ 37 މައްސަލަ، ގޯތިގެދޮރާއި ކުއްޔަށް ދޫކުރެވޭ ބިމާއި ރަށްތަކާއި ގުޅޭ ޖުމްލަ 30 މައްސަލަ އަދި އެހެނިހެން ތަފާތު ބާވަތްތަކުގެ 46 މައްސަލައެއް ހިމެނެއެވެ.