ކުރިޔަށް އޮތް ފަސް އަހަރަށް ނޭޝަނަލް ހިޔުމަން ރައިޓްސް އެކްޝަން ޕްލޭންއެއް އެކުލަވާލުމުގެ މަސައްކަތް ކުރަމުން އަންނަކަމަށް މިނިސްޓަރ އޮފް ޖެންޑަރ އެންޑް ފެމިލީ ޒެނީޝާ ޝަހީދު ޒަކީ ވިދާޅުވެއްޖެއެވެ.
ބައިނަލްއަޤްވާމީ އިންސާނީ ޙައްޤުތަކުގެ ދުވަހުގެ މުނާސަބަތުގައި ބޭއްވި ޙާއްސަ ރަސްމިއްޔާތު ޝަރަފްވެރިކޮށްދެއްވައި ވާހަކަފުޅުދައްކަވަމުން ޒެނީޝާ ވިދާޅުވީ ނޭޝަނަލް ހިޔުމަން ރައިޓްސް އެކްޝަން ޕްލޭން އެކުލަވާލުމަށް ބޭނުންވާ ފްރޭމް ވޯކްގެ މަސައްކަތް މިހާރު ނިމިފައިވާކަމަށެވެ. މި ފްރޭމް ވޯކްގައި ނޭޝަނަލް ހިޔުމަން ރައިޓްސް އެކްޝަން ޕްލޭންގެ މައިގަޑު ދާއިރާތައް ހިމެނޭކަމަށާއި މި ދާއިރާތައް ކަނޑައަޅާފައިވަނީ ކަމާގުޅުންހުރި އިދާރާތަކުގެ ލަފަޔާއެކުކަން ޖެންޑަރ މިނިސްޓަރ ޒެނީޝާ ފާހަގަކުރެއްވިއެވެ. އަލަށް އެކުލަވާލާ ނޭޝަނަލް ހިޔުމަން ރައިޓްސް އެކްޝަން ޕްލޭން ވެގެންދާނީ ރާއްޖޭގައި އިންސާނީ ހައްޤުތައް ހިމާޔަތްކޮށް ރައްކާތެރިކޮށްދިނުމަށް މިހާތަނަށް އަޅާ އެންމެ މުހިންމު ފިޔަވަޅުކަމަށް މިނިސްޓަރ ޒެނީޝާ ވިދާޅުވިއެވެ.
ބައިނަލްއަޤްވާމީ އިންސާނީ ޙައްޤުތަކުގެ ދުވަހުގެ މުނާސަބަތުގައި ބޭއްވި ރަސްމިއްޔާތުގައި ހިޔުމަން ރައިޓްސް ކޮމިޝަންގެ ރައީސާ އައިމިނަތު އީނާސްގެ ހާއްސަ މެސެޖެއް ވަނީ އިއްވާފައެވެ. އީނާސްގެ މެސެޖްގައި ވިދާޅުވީ ޒަމާނުންސުރެ ދިވެހިންގެ މެދުގައި އޮތް އެކުވެރިކަމާއި އެކަކު އަނެކަކަށް އިހްތިރާމްކުރުމުގެ އާދަ ނެތެމުންދާކަމަށެވެ. އަދި ޒަމާނާއި ވިސްނުމަށް އަންނަ ބަދަލުތަކާއި އެކީ އެހެން މުޖްތަމައުތަކުން ފެންނަމުންދާ ނުރަނގަޅު އާދަތައް މިއަދު ދިވެހި މި ކުޑަ މުޖްތަމައުން ފެންނަމުންދާކަންވެސް އީނާސް ފާހަގަކުރެއްވިއެވެ.
އިންސާނީ ކޮންމެވެސް ހައްޤެއް ގެއްލިގެން ޖުމްލަ 342 މައްސަލަ އެ ކޮމިޝަނަށް މިއަހަރުގެ ނޮވެމްބަރު މަހުގެ ނިޔަލަށް ހުށަހަޅާފައިވާއިރު އޭގެތެރެއިން 246 މައްސަލައެއް ތަޙްޤީގް ކޮށްފައިވާކަމަށް އިނާސް ވިދާޅުވިއެވެ. އަދި އިންސާނީ ހައްޤުތައް ގެއްލެން މެދުވެރިވާ ސަބަބުތައް ދެނެގަނެ އެކަންކަން ހައްލުކުރުމަށް ގިނަ މަސައްކަތްތަކެއް އެ ކޮމިޝަނުން ކުރަމުން ގެންދާކަންވެސް އީނާސްގެ މެސެޖްގައިވަނީ ފާހަގަކުރައްވާފައެވެ.
img:http://s1.psmnews.mv/images/660x400/15129671740444.jpg|
އިންސާނީ ހައްގުތަކުގެ މައްސަލަތަކުގެ ތެރެއިން މި އަހަރުގެ ތެރޭގައި އެންމެ ގިނައިން ހުށަހަޅާފައިވަނީ ސިއްހީ ޙިދުމަތްނުލިބުމާއި، އުމުރުން ދުވަސްވީ މީހުންނާއި ޙާއްސަ އެހީއަށް ބޭނުންވާ މީހުންނަށް އިހްމާލުވުމުގެ މައްސަލަތަކެވެ. އަދި ކުޑަކުދިންނާއި އާއިލާއާއި ގުޅުންހުރި މައްސަލަތަށްވެސް ގިނަކަން ފާހަގަކޮށްލެވެއެވެ. އެގޮތުން ކުޑަކުދިންނަށް ކުރާ އަނިޔާއާއި އިހުމާލުގެ 600 މައްސަލަ ހުށަހަޅާފައިވެއެވެ.
ބައިނަލްއަޤްވާމީ އިންސާނީ ޙައްޤުތަކުގެ ދުވަހުގެ މުނާސަބަތުގައި ބޭއްވި ރަސްމިއްޔާތުގައި ހިޔުމަން ރައިޓްސް ކޮމިޝަނަށް އެކި ގޮތްގޮތުން އެހީތެރިވެފައިވާ 30 ފަރާތަކަށް ވަނީ ހަނދާނީލިޔުން ދީފައެވެ. ކޮންމެ އަހަރެއްގެވެސް ޑިސެމްބަރ މަހުގެ 10 ވަނަ ދުވަސް ފާހަގަކުރަނީ ބައިނަލްއަޤްވާމީ އިންސާނީ ޙައްޤުތަކުގެ ދުވަހުގެ ގޮތުގައެވެ. ހިޔުމަން ރައިޓްސް ކޮމިޝަން އޮފް ދަ މޯލްޑިވްސް އުފެދި ޙިދުމަތް ދޭން ފެށިތާ މިހާރުވަނީ 14 އަހަރުވެފައެވެ. ރާއްޖޭގައި އިންސާނީ ހައްޤުތައް ކަށަވަރުކޮށްދިނުމަށް އެޗްއާރިސީއެމުން އަންނަނީ ގިނަ މަސައްކަތްތަކެއް ކުރަމުންނެވެ.