ލިބޭ ފުރުޞަތުތަކުގައި ރާއްޖޭގެ ފަތުރުވެރިކަން ޕްރޮމޯޓްކުރުމަށް މަސައްކަތް ކުރައްވާނެކަމަށް އޭޝިޔަން ވޮލީބޯޅަ ކޮންފެޑެރޭޝަންގެ ބޯޑަށް އިންތިޚާބުވި ރާއްޖޭގެ ވޮލީބޯޅަ އެސޯސިއޭޝަންގެ ރައީސް މުޙައްމަދު ލަތީފް ވިދާޅުވެއްޖެއެވެ.
ތައިލެންޑްގައި އޮތް އޭވީސީގެ ކޮންގްރެސްގެ ހަވާސާގައި އޭނާ ވިދާޅުވީ ބައްދަލުވުންތަކާއި، ކޮންގްރެސް ތަކުގައި ރާއްޖޭގެ ފަތުރުވެރިކަން ޕްރްމޯޓްކޮށް، ރާއްޖޭގެ ރީތިކަން އޭޝިޔާގެ ޤައުމުތަކަށް ދައްކާ އެމައުލޫމާތުތައްވެސް ޙިއްޞާކުރައްވާނެކަމަށެވެ. ލަތީފް ވަނީ ތައިލެންޑްގައި މިމަހުގެ ބާވީސް ވަނަ ދުވަހު އޮތް އޭވީސީ ކޮންގްރެސްގައިވެސް އެމަސައްކަތް ކުރައްވާފައެވެ. އެގޮތުން އޭޝިޔާގެ ޤައުމުތަކުގެ ވޮލީބޯޅަ އެސޯސިއޭޝަންތަކުގެ އެންމެ އިސްބޭފުޅުންނާ ރާއްޖޭގެ ފަތުރުވެރިކަން ޕްރޮމޯޓް ކުރުމަށް ލުއި މައުލޫމާތު ފޮތް ޙިއްޞާކޮށް، ރާއްޖޭގެ ރީތިކަން ދައްކުވައިދޭ ތަފާތު މަންޒަރުތައްވެސް ވަނީ ޙިއްޞާކުރައްވާފައެވެ.
ލަތީފް ވިދާޅުވީ ރާއްޖޭގައި ބީޗް ވޮލީބޯޅަ މުބާރާތްތައް ފަދަ އިވެންޓްތައް ބާއްވާނީވެސް ފަތުރުވެރިކަމުގެ ދާއިރާއާއި ގުޅިގެން، ފަތުރުވެތިކަން އިޝްތިހާރު ވާގޮތަށްކަމަށެވެ. އެގޮތުން އަންނަ އަހަރު އެފަދަ މުބާރާތެއް ބޭއްވުމުގައި މަސައްކަތް މިހާރުވެސް ކުރައްވަމުން ގެންދަވާކަމަށް ލަތީފް ވިދާޅުވިއެވެ.
" އަންނަ އަހަރު ރާއްޖޭގައި ބީޗް ވޮލީ މުބާރާތެއް ބާއްވަން މިދަނީ އޭވީސީއާއެކު މަޝްވަރާކުރަމުން. އެފުރުޞަތު ތަނަވަސްކުރާނީ ރާއްޖޭގެ ފަތުރުވެރިކަމުގެ ދާއިރާއާއި ގުޅިގެން. ރާއްޖޭގެ ރީތި ރިސޯރޓްތަކުގެ ބީޗް ބޭނުންކުރުން ވިސްނުމަކީ. ޓޫރިޒަމް ދާއިރާއާއި ސަރުކާރުގެ އެއްބާލުން ލިބޭނެކަމަށް ޔަޤީން ކުރަނީ. ސަރުކާރާ އަޅުގަނޑު މަޝްވަރާކުރާނަން. " ލަތީފް ވިދާޅުވިއެވެ.