ދިވެހިބަހަކީ ޓެކްނޮލޮޖީއަށް ފަހި ބަހަކަށް ހެދުމަށް ކުރަމުންދާ މަސައްކަތުގެ ދަށުން، ދިވެހިބަހުގެ އެކެޑަމީއާއި މޯލްޑިވްސް ކޮމްޕިއުޓަރ ސޮސައިޓީއާއި ދެމެދު އެއްބަސްވުމުގައި ސޮއިކޮށްފިއެވެ.
ދިވެހިބަހުގެ އެކެޑަމީގައި ބޭއްވި ރަސްމިއްޔާތެއްގައި އެކެޑަމީގެ ފަރާތުން މި އެއްބަސްވުމުގައި ސޮއިކުރެއްވީ ދިވެހިބަހުގެ އެކެޑަމީގެ ރައީސް އަޝްރަފު ޢަލީއެވެ. މޯލްޑިވްސް ކޮމްޕިއުޓަރ ސޮސައިޓީގެ ފަރާތުން ސޮއިކުރެއްވީ އެ ޖަމިއްޔާގެ ރައީސް އަޙްމަދު ނަދީމްއެވެ.
މި އެއްބަސްވުމާއި ސޮއިކުރެއްވުމަށްފަހު އަޝްރަފު ޢަލީ ވިދާޅުވީ، ދިވެހިބަހަކީ ޓެކްނޮލޮޖީއާއި ރައްޓެހި އެއްޗަކަށް ހެދުމަށް ކުރަމުންދާ މަސައްކަތުގެ ތެރެއިން މި އެއްބަސްވުމުގެ ދަށުން އެކި އުމުރުފުރާގެ މީހުންނަށް ފަސޭހަކަމާއެކު ބޭނުންކުރެވޭނެހެން ބަސްފޮތެއް އެކުލަވާލުމަށް ހަމަޖެހިފައިވާކަމަށެވެ. އަދި ތާނަ ފޮންޓް ސްޓްރީމް ލައިންކޮށް އެއްގޮތްކުރުމާއި، އައު ފޮންޓުތަކެއް ފަރުމާކުރުމުގެ މަސައްކަތް ދެފަރާތުން ގުޅިގެން ކުރުމަށް ހަމަޖެހިފައިވާކަމަށްވެސް އަޝްރަފް ވިދާޅުވިއެވެ.
މޯލްޑިވްސް ކޮމްޕިއުޓަރ ސޮސައިޓީގެ ފަރާތުން ވާހަކަދައްކަވަމުން އެ ޖަމިއްޔާގެ ރައީސް އަޙްމަދު ނަދީމް ވިދާޅުވީ، އިންފޮމޭޝަން ޓެކްނޮލޮޖީގެ ދާއިރާއިން ދުނިޔޭގެ ފެންވަރުގައިވެސް ގުނާލެވޭފަދަ ތަޢުލީމީ ޤާބިލު ޒުވާނުން ރާއްޖޭގައިވެސް ތިބިކަމަށެވެ. އަދި އެފަދަ ފަރާތްތަކަށް މި ދާއިރާއިން އިތުރަށް ކުރިއަށްދެވޭނެ ފުރުޞަތުތައް ހޯދައިދިނުމަކީ އެޖަމިއްޔާއިން ވަރަށް ބޮޑު އިސްކަމެއްދޭ ކަމެއްކަން ނަދީމް ފާހަގަކުރެއްވިއެވެ.
ދިވެހިބަހަކީ ޓެކްނޮލޮޖީއާއި ރައްޓެހި އަދި އެންމެ މެދުގައިވެސް މަޤުބޫލު ބަހަކަށް ހެދުމަށް ދިވެހިބަހުގެ އެކެޑަމީއިން އަންނަނީ ތަފާތު ގިނަ މަސައްކަތްތަކެއް ކުރަމުންނެވެ. މޯލްޑިވްސް ކޮމްޕިއުޓަރ ސޮސައިޓީއާއެކު 5 އަހަރު ދުވަހުގެ މުއްދަތަކަށް ވެވުނު މި އެއްބަސްވުމުގެ ދަށުން، މި ދާއިރާގައި ހުރި ގޮންޖެހުންތަކަކީ ކޮބައިކަން ދެނެގަނެ، ދެ ފަރާތުން ގުޅިގެން މަސައްކަތްތަކެއް ކުރުމަށް ވަނީ ހަމަޖެހިފައެވެ.