ޒުވާނުންގެ ޤައުމީ އިނާމަށް ނަން ހުށައެޅުމުގެ މުއްދަތު އަންނަ ނޮވެމްބަރުމަހުގެ 7 ވަނަ ދުވަހުގެ ނިޔަލަށް އިތުރުކޮށްފިއެވެ.
ޔޫތް މިނިސްޓްރީން ވިދާޅުވީ ޒުވާނުންގެ ޤައުމީ އިނާމަށް ނަން ހުށައެޅުމުގެ މުއްދަތު އަލުން އިތުރުކޮށްފައިވަނީ ގިނަ ޒުވާނުންތަކެއްގެ އެދުމުގެ މަތިންކަމަށެވެ.
ޒުވާނުންގެ ޤައުމީ އިނާމަކީ ތަފާތު ދާއިރާތަކުން ޤައުމުގެ ތަރައްގީއަށް ޒުވާނުން ކުރާ މަސައްކަތްތައް ފާހަގަކޮށް ހިތްވަރު ދިނުމުގެ ގޮތުން ދޭ އިނާމެކެވެ. 18 އަހާރާއި 35 އަހަރާ ދެމެދުގެ އުމުރުފުރާގެ ކޮންމެ ޒުވާނަކަށްވެސް މި އިނާމަށް ކުރިމަތިލުމުގެ ފުރުޞަތު ހުޅުވާލާފައިވާއިރު، މިއަހަރުގެ ޒުވާނުންގެ ޤައުމީ އިނާމް ތަފާތު 11 ދާއިރާއަކުން ދިނުމަށް ހަމަޖެހިފައިވާކަމަށް ޔޫތް މިނިސްޓްރީން ވިދާޅުވެއެވެ.
މި ދާއިރާތަކަކީ ވިޔަފާރިއާއި އިޤްތިޞާދީ ރޮނގުން ހިދުމަތްކުރުން، އާރޓްސް އެންޑް ކަލްޗަރ ނުވަތަ އުފެއްދުންތެރިކަމުގެ ދާއިރާ، މަސްތުވާތަކެއްޗާއި ދެކޮޅަށް މަސައްކަތްކުރުން، ކުށްމަދުކުރުމަށް މަސައްކަތް ކުރުން، ކުޅިވަރަށް ޚިދުމަތް ކުރުމުގެ ދާއިރާ، ދަރުމަވެރިން، ވޮކޭޝަނަލް ޓްރެއިނިންގ ދަސްކޮށްދިނުން، ދުންފަތުގެ އިސްތިއުމާލު ކުރުމާދެކޮޅަށް މަސައްކަތް ކުރުން، ދުޅަހެޔޮ އާއިލާއެއް ބިނާކުރުން، ތިމާވެށި ހިމާޔަތްކުރުމަށް މަސައްކަތް ކުރުން އަދި ޝަހީދު ޖަވާދު ޢުމަރުގެ ހަނދާނީ ފިލާއެވެ.
ޒުވާނުންގެ ޤައުމީ އިނާމް 2017 އަށް ކުރިމަތިލުމަށް ބޭނުންވާ ފަރާތްތަކަށް މިނިސްޓްރީގެ ވެބްސައިޓުންނާއި، މިނިސްޓްރީގެ ކައުންޓަރުން އެޕްލިކޭޝަން ފޯމް ލިބެން ހުންނާނެކަމަށާއި، ވެލާނާގޭ ތިން ވަނަ ފަންގިފިލާއިން ފޯމް ބަލައިގަތުމުގެ ކަންކަން ކުރިއަށްދާނެކަމަށް ޔޫތް މިނިސްޓްރީން ވިދާޅުވެއެވެ. އަދި އަތޮޅުތަކުގައި ދިރިއުޅޭ ޒުވާނުންނަށް [email protected] އަށް އެޕްލިކޭޝަން ފޯމް ފުރުމަށްފަހު މެއިލްކުރެވޭނެކަމަށްވެސް ޔޫތް މިނިސްޓްރީން ވިދާޅުވެއެވެ.
މިއަހަރުގެ ޒުވާނުންގެ ދުވަހާއި ގުޅުވައިގެން، ރާއްޖޭގެ އެކި ކަންކޮޅުތަކުގައި ތަފާތު ހަރަކާތްތަކެއް ހިންގުމަށް ނިންމާފައިވާއިރު، ޒުވާނުންގެ ޤައުމީ އިނާމް ދިނުމަށް ހަމަޖެހިފައިވަނީ އަންނަ މަހުގެ 26 ވަނަ ދުވަހުގެ ރޭ ބާއްވާ ޙާއްސަ ހަފްލާއެއްގައެވެ. ރާއްޖޭގައި ޒުވާނުންގެ ދުވަސް ފާހަގަ ކުރަނީ ކޮންމެ އަހަރެއްގެ ނޮވެމްބަރު މަހުގެ 17 ވަނަ ދުވަހުއެވެ.