އދ. މާމިގިލީގައި އެމް.ޕީ.އެލްގެ ފަރާތުން ތަރައްޤީކުރާ އިންޓަރނޭޝަނަލް ޕޯޓާއެކު މާލޭގެ މުދާ އުފުލާ ބަނދަރަށް ދިމާވެފައިވާ ތޮއްޖެހުމުގެ މައްސަލައަށް ހައްލެއް ލިބި، އެކުންފުނީގެ އޮޕަރޭޝަންތަކަށްވެސް ބޮޑެތި ކުރިއެރުންތަކެއް ލިބިގެންދާނެކަމަށް އެމް.ޕީ.އެލްގެ ސީ.އީ.އޯ އިބްރާހީމް ޢަބްދުއްރައްޒާޤް ހަލީމް ވިދާޅުވެއްޖެއެވެ.
ޕީ.އެސް.އެމްގެ ޒިންމާ ޕްރޮގްރާމުގައި ވާހަކަދައްކަވަމުން އެމް.ޕީ.އެލްގެ ސީ.އީ.އޯ ވިދާޅުވީ، މާމިގިލި ނިސްބަތްވާ ސަރަޙައްދަކީ ރާއްޖޭގައި ފަތުރުވެރިކަން އެންމެ ފުޅާ ދާއިރާއެއްގައި ކުރާ އެއް ސަރަޙައްދަށްވެފައި، އިންޓަރނޭޝަނަލް ޕޯޓެއް އޮޕަރޭޓްކުރުމުގެ އިތުރުން، އެ ސަރަޙައްދުގައި އިތުރު ހިދުމަތްތަކެއް ތަޢާރަފުކުރުމަކީވެސް އެމް.ޕީ.އެލްގެ އަމާޒެއްކަމަށެވެ.
ރާއްޖޭގެ އިޤްތިޞާދަށް އަންނަމުންދާ ހެޔޮ ބަދަލުތައް ރަމްޒުކޮށްދޭ އެއް ކަމަކީ ރާއްޖެއަށް އެތެރެކުރާ މުދަލުގެ ނިސްބަތް އަހަރުން އަހަރަށް އިތުރުވުމެވެ. މިކަމުގެ ސަބަބުން މާލޭ ވިޔަފާރި ބަނދަރަށް އޮންނަ ޑިމާންޑް އިތުރުވެފައިވާއިރު، އެމް.ޕީ.އެލުން އަންނަނީ އެކުންފުނީގެ ދައުރު މިހާރަށްވުރެ އިތުރަށް ފުޅާކުރުމަށް ގިނަ މަސައްކަތްތަކެއް ކުރަމުންނެވެ. އދ. މާމިގިލީގައި ތަރައްޤީކުރަމުންދާ އިންޓަރނޭޝަނަލް ޕޯޓަކީ މިގޮތުން ފާހަގަކޮށްލެވޭ އެއް މަސައްކަތް. މިއާއެކު މާލޭގެ ވިޔަފާރި ބަނދަރުގެ ތޮއްޖެހުން ކުޑަވެ، ރާއްޖޭގެ އެކި ސަރަޙައްދުތަކަށް އިޤްތިސާދީ ކުރިއެރުން ގެނެސްދިނުމަށް ސަރުކާރުން ކުރާ މަސައްކަތުގައި އެކުންފުނީގެ ދަޢުރު މިހާރަށްވުރެ ބޮޑުވެގެންދާނެކަމަށް އެމް.ޕީ.އެލްއިން ބުނެއެވެ.
ޕީ.އެސް.އެމްގެ ޒިންމާ ޕްރޮގްރާމުގައި ވާހަކަދައްކަވަމުން އެމް.ޕީ.އެލްގެ ސީ.އީ.އޯ އިބްރާހީމް ޢަބްދުއްރައްޒާޤް ހަލީމް ވިދާޅުވީ، މާމިގިލީގައި އިންޓަރނޭޝަނަލް ޕޯޓެއް ތަރައްޤީކުރުމުގެ އެންމެ ބޮޑު އެއް ބޭނުމަކީ އެ ސަރަޙައްދަށް ބްރޭކް-ބަލްކް ކާގޯ އެޓްރެކްޓްކުރުން ކަމަށެވެ. ހަމައެހެންމެ މާމިގިލީގައި ބޮޑު ފުން ބަނދަރެއް ޤާއިމުކުރެވިފައި އޮތުމުން، އެތަން ބޭކާރު ގޮތުގައި ދޫކޮށްލާފައި އޮތުމުގެ ބަދަލުގައި ބަނދަރުގެ ބޭނުން އެންމެ ހެޔޮގޮތުގައި ހިފުމަށް ކަމަށެވެ.
"މަމިގިލީ ލޮކޭޓްވެފައިވަނީ އިޤްތިޞާދީގޮތުން ވަރަށް ރަނގަޅު ސަރަޙައްދެއްގައި. އެރަށުގައި އިންޓަރނޭޝަނަލް ޕޯޓެއްގެ ތަރައްޤީކުރުމުގެ އެއް ބޭނުމަކީ އެ ސަރަޙައްދަށް ބްރޭކް-ބަލްކް ކާގޯ އެޓްރެކްޓްކުރުން، އަދި މާމިގިލީ ބަނދަރު ބޭކާރު ގޮތުގައި ދޫކޮށްލާފައި އޮތުމުގެ ބަދަލުގައި ބަނދަރުގެ ބޭނުން އެންމެ ހެޔޮގޮތުގައި ހިފުން. ހަމަ އެހެންމެ، މި ބަނދަރާއެކު އިތުރު ވަޒީފާގެ ފުރުޞަތުތަކެއް ތަނަވަސްވެ، މާމިގިލީ ރައްޔިތުންނަށްވެސް ބޮޑެތި ކުރިއެރުންތަކެއް ލިބިގެންދާނެ" އެމް.ޕީ.އެލްގެ ސީ.އީ.އޯ އިބްރާހީމް ޢަބްދުއްރައްޒާޤް ހަލީމް ވިދާޅުވިއެވެ.
އދ. އަތޮޅަކީ ފަތުރުވެރިކަމުގެ ސިނާއަތް ފުޅާދާއިރާއެއްގައި ކުރިއަރަމުން އަންނަ އެއް ސަރަޙައްދަށްވެފައި، ޕޯޓު އޮޕަރޭޓްކުރުމުގެ އިތުރުންވެސް، އިތުރު ޙިދުމަތްތައް ތަޢާރަފުކުރުމުގެ ވިސްނުން އެމް.ޕީ.އެލުން ގެންގުޅޭކަން އެމް.ޕީ.އެލްގެ ސީ.އީ.އޯ އިބްރާހީމް ޢަބްދުއްރައްޒާޤް ހަލީމް ވަނީ ފާހަގަކުރައްވާފައެވެ. އެގޮތުން އެތަނުގައި ބޮންޑް ފެސިލިޓީއަކާއި ވެއަރ ހައުސް ފެސިލިޓީއެއް ޤާއިމުކުރުމުގެ އިތުރުން ކާގޯ ބޯޓުފަހަރަށް ބޭނުންވާ ތެލާއި ފެން ލިބޭނެ ނިޒާމެއް ޤާއިމުކުރުން ފަދަ ކަންކަން މަމިގިލީ ޕޯޓާއެކު ހަމަޖެހިގެންދާނެކަމަށް އިބްރާހީމް ޢަބްދުއްރައްޒާޤް ވިދާޅުވިއެވެ.
"ބަނދަރު ސަރަޙައްދުގައި ޕޯޓް އޮޕަރޭޓްކުރުމުގެ އިތުރުން، އަޅުގަނޑުމެންގެ ވިސްނުން އެބަހުރި އެތަނުގައި އިތުރު ޙިދުމަތްތަކެއްވެސް ދިނުން. މިސާލަކަށް ޓޫރިޒަމް ޒޯނަކަށް ވާތީއާއެކު އެތަނުގައި ބޮންޑް ފެސިލިޓީ ޤާއިމުކުރުން، އަދި ވެއަރ ހައުސް ފެސިލިޓީ ޤާއިމުކުރުން. އެތަނުގައި އެކި އެކި އުޅަނދުތަކަށް ބޭނުންވާ ޙިދުމަތްތައް ދެވޭނެކަހަލަ މަގުތައް ފަހިކޮށްދިނުން. މީގެ ތެރޭގައި ތެލާއި، ފެން ލިބޭނެ އިންތިޒާމް ހަމަޖެއްސުން. އަދި އެކި އެކި މަރާމާތުގެ މަސައްކަތްތައްވެސް ކުރެވޭނެ އިންތިޒާމް ހަމަޖެއްސުން ހިމެނޭ" އެމް.ޕީ.އެލްގެ ސީ.އީ.އޯ އިބްރާހީމް ޢަބްދުއްރައްޒާޤް ހަލީމް ވިދާޅުވިއެވެ.
މާމިގިލީ ޕޯޓް ތަރައްޤީކޮށް ނިމޭއިރު ބައިންލްއަޤްވާމީ ބަނދަރަކުން ލިބޭނެ ގިނަ ޚިދުމަތްތަކެއް އެތަނުން ލިބެން ހުންނާނެކަމަށް އެމް.ޕީ.އެލުން ބުނެއެވެ. އެގޮތުން ޢިމާރާތް ކުރުމަށް ބޭނުންވާ ހިލަޔާއި ހިލަވެލި ފަދަ ސާމާނު އަންލޯޑް ކުރުމާއި، ފެން ޕްލާންޓެއްގެ ޚިދުމަތާއި، ކޯލްޑް ސްޓޯރޭޖާއި، ޔޮޓް މެރީނާ އަދި ބޯޓް ޔާޑެއްގެ ޙިދުމަތްވެސް ލިބިގެންދާނެކަމަށް އެކުންފުނިން ބުނެއެވެ.