ސަރުކާރުގެ ސޯޝަލް ހައުސިންގ ސްކީމްގެ ދަށުން 3 ރަށެއްގައި 300 ހައުސިންގ ޔުނިޓް އިމާރާތްކުރާނެ ބަޔަކު ހޯދުމަށް އިޢުލާންކޮށްފިއެވެ.
މި 300 ހައުސިންގ ޔުނިޓް އެޅުމަށް ހަމަޖެހިފައިވާ 3 ރަށަކީ، ޅ. ނައިފަރު، ޅ. ހިންނަވަރު އަދި ސ. ފޭދޫއެވެ.
ޑިޒައިން، ބިލްޑް އަދި ކޮންޓްރެކްޓަރ ފައިނޭންސް އުޞޫލުން ތަރައްޤީކުރާ މި ހައުސިންގ ޔުނިޓްތައް އިމާރާތްކުރުމަށް ޝަޢުގުވެރިވާ ފަރާތްތަކަށް ބީލަން ހުށައެޅުމުގެ ފުރުޞަތު މާދަމާއިން ފެށިގެން އަންނަ މަހުގެ އެކާވީހާއި ހަމައަށް ހުޅުވާލާފައިވާކަމަށް ފިނޭންސް މިނިސްޓްރީން ބުނެއެވެ.
މި 300 ހައުސިންގ ޔުނިޓް ތަރައްޤީކުރުމުގެ މަސައްކަތަށް ބީލަން ހުށަހަޅަން ހަމަޖެހިފައިވަނީ 3 ލޮޓަކަށް ބަހައިލައިގެންނެވެ. މިއިން ކޮންމެ ލޮޓަކަށް ބިޑް ސެކިއުރިޓީގެ ގޮތުގައި 250،000 ރުފިޔާ ހުށައަޅަންޖެހެއެވެ. އަދި ބީލަން ހުށަހަޅާއިރު ވަކި ވަކި ލޮޓުތަކަށް ނުވަތަ ހުރިހާ ލޮޓަކަށްވެސް އަގު ހުށަހެޅިދާނެކަމަށާއި، ބިޑް ސެކިޔުރިޓީގެ މުއްދަތަކީ ބިޑް ހުޅުވާ ތާރީޚުން ފެށިގެން 148 ދުވަސްކަމަށް ފިނޭންސް މިނިސްޓްރީން ބުނެއެވެ. ބިޑް ހުޅުވުން އޮންނާނީ އަންނަ މަހުގެ 23 ވަނަ ދުވަހު ކަމަށްވެސް އެ މިނިސްޓްރީން ބުނެއެވެ.
ތިން ރަށެއްގައި 300 ހައުސިންގ ޔުނިޓް ތަރައްޤީކުރާނެ ފަރާތެއް ހޯދުމަށް އިޢުލާންކޮށްފައިވާއިރު، ބޯހިޔާވަހިކަމުގެ މައްސަލައަށް ހައްލެއް ގެނެއުމަށްޓަކާ ސޯޝަލް ހައުސިންގ ސްކީމްގެ ދަށުން ސަރުކާރުން މިހާރުވެސް އަންނަނީ ރާއްޖޭގެ އެކި ސަރަޙައްދުތަކުގައި ހައުސިންގ ޔުނިޓްތައް ތަރައްޤީކުރުމަށް އެތައް މިލިއަން ރުފިޔާގެ މަޝްރޫޢުތައް ހިންގަމުންނެވެ.