އެއަރޕޯޓް ތަރައްޤީކުރުމަށް އިންޑިއާގެ ޖީ.އެމް.އާރު ކުންފުނިން ގެންގުޅުނު މާސްޓަރ ޕްލޭނާއި އެއްގޮތަށް މަސައްކަތް ކުރިއަށްދިޔަނަމަ، އެއަރޕޯޓުން މިއަދު މި ފެންނަ ފަދަ ތަރައްޤީގެ ހިތްގައިމު ކުލަވަރުތައް ނުފެންނާނެކަމަށް އެމް.އޭ.ސީ.އެލްގެ މެނޭޖިންގ ޑިރެޓްކަރ އާދިލް މޫސާ ވިދާޅުވެއްޖެއެވެ.
ވެލާނާ އިންޓަރނޭޝަނަލް އެއަރޕޯޓާއި ގުޅޭގޮތުން ބައެއް ފަރާތްތަކުން ކިޔަމުންދާ ފާޑުކިއުންތަކަށް ރައްދުދެއްވަފައި ޕީ.އެސް.އެމްގެ ޒިންމާ ޕްރޮގްރާމުގައި ވާހަކަދައްކަވަމުން މޯލްޑިވްސް އެއަރޕޯޓްސް ކޮމްޕެނީ ލިމިޓެޑްގެ މެނޭޖިންގ ޑިރެކްޓަރ އާދިލް މޫސާ ވިދާޅުވީ، އެއަރޕޯޓުގެ 50 އަށްވުރެ ގިނަ އަހަރުވީ ދިގު ތާރީޚުގައި، ގިނަ ކުރިއެރުންތަކެއް ހޯދިފައިވީނަމަވެސް، އެއަރޕޯޓު އެންމެ އެކަށީގެންވާ މިންވަރަށް ތަރައްޤީކުރެވިފައިވާކަމަށް ޤަބޫލުނުކުރައްވާކަމަށެވެ.
ޢާދިލް ވިދާޅުވީ، ކުރީގެ ސަރުކާރުތަކުންވެސް އެއަރޕޯޓް ތަރައްޤީކުރުމަށް ވިސްނުންތަކެއް ގެންގުޅުއްވިކަމަށާއި، ނަމަވެސް ޢަމަލީގޮތުން އެކަންކަން ތަންފީޒުކުރަން ކެރުނު ހަމައެކަނި ސަރުކާރަކީ ރައީސް ޢަބްދުﷲ ޔާމީންގެ ސަރުކާރުކަމަށް. އެހެންކަމުން އެއަރޕޯޓު ތަރައްޤީކުރުމަށް ސަރުކާރުން ކުރިއަށްގެންދާ އެއް ބިލިއަން ޑޮލަރުގެ ބިޔަ މަޝްރޫޢާއެކު، އެއަރޕޯޓަށް މިހާރު ދިމާވެފައިވާ މައްސަލަތަކަށް ބޮޑެތި ހައްލުތަކެއް ލިބި، އިތުރު ކުރިއެރުންތަކެއް ލިބިގެންދާނެކަމަށް ޢާދިލް ވިދާޅުވިއެވެ.
ޖީ.އެމް.އާރުގެ މައްސަލައަށް އިޝާރާތްކުރައްވަމުން ޢާދިލް މޫސާ ވިދާޅުވީ، އެއަރޕޯޓް ތަރައްޤީކުރުމަށް ޖީ.އެމް.އާރުން ގެންގުޅުނު މާސްޓަރ ޕްލޭންއަކީ، ދެމެހެއްޓެނިވިގޮތެއްގައި އެއަރޕޯޓު ހިންގުމުގައި ބޮޑެތި މައްސަލަތަކެއް ކުރިމަތިވާނެފަދަ ގޮތަކަށް ފަރުމާކޮށްފައިވާ ޕްލޭނެއްކަމަށެވެ. އަދި އެ ޕްލޭނަކީ ދިވެހި ދަޢުލަތަށްވެސް ފޫނުބެދޭވަރުގެ ބޮޑެތި ގެއްލުންތަކަކާއި ކުރިމަތިލާންޖެހޭނެ ފަދަ ގޮތަކަށް ތައްޔާރުކޮށްފައިވާ ޕްލޭނެއްކަމަށެވެ. އެކަމުގެ މިސާލެއްގެ ގޮތުގައި ޖީ.އެމް.އާރުން އެއަރޕޯޓުގައި އައު ޓަރމިނަލް އަޅަން ނިންމާފައިވަނީ، އިތުރު ރަންވޭއަކަށް ޖާގަ ލިބޭނެފަދަ ގޮތަކަށް ނޫންކަމަށް ވިދާޅުވެ، އެކަމުގެ ތަފްސީލް ޒިންމާ ޕްރޮގްރާމުގައި އާދިލް ވަނީ ދެއްވާފައެވެ.
24 ގަޑިއިރު ޚިދުމަތް ދެމުން އަންނަ އެއަރޕޯޓެއްގައި، އެއްވެސް އޮޕަރޭޝަނަކަށް ބުރުނާރާނޭހެން، ތަރައްޤީގެ ބިޔަ މަޝްރޫޢެއް ހިންގުމަކީ ފަސޭހަކަމަކަށް ނުވާނެކަމަށާއި، ނަމަވެސް، މި ސަރުކާރުން އެކަން ވަރަށް ފުރިހަމަކަމާއެކު ކުރަމުން އަންނަކަމަށް ޢާދިލް ވިދާޅުވި. އެގޮތުން އެއަރޕޯޓު ތަރައްޤީކުރުމުގެ މަޝްރޫޢުގައި ހިމެނޭ ހުރިހާ މަސައްކަތެއްހެން ކަނޑައެޅިފައިވާ ތާވަލާއެއްގޮތަށް، އެއްވެސް މެދުކެނޑުމެއްނެތި ކުރިއަށްދާކަން އާދިލް ވަނީ ފާހަގަކުރައްވާފައެވެ.