ހުރިހާ ރައްޔިތުންނާ ދޭތެރޭގައި އެއްވަރަކަށް ޤާނޫނާ ޤަވާއިދު ތަންފީޒުވާން މި ސަރުކާރުން ބޭނުންވާކަން ރައްޔިތުން މިހާރު ޔަޤީންކުރާކަމަށް ފިޝަރީޒް މިނިސްޓަރ ޑރ.މުޙައްމަދު ޝައިނީ ވިދާޅުވެއްޖެއެވެ.
ސިޔާސީ ޕާޓީތަކާއެކު ސަރުކާރުން ފަށްޓަވާފައިވާ މަޝްވަރާތަކަށް ސިޔާސީ ޕާޓީތަކަށް އަނެއްކާވެސް ދަޢުވަތު ދިނުމަށް ބޭއްވި ނޫސްވެރިންގެ ބައްދަލުވުމުގައި ވާހަކަފުޅު ދައްކަވަމުން، މިނިސްޓަރ ވިދާޅުވީ، މަޝްވަރާކުރުމަށް ސިޓީ ފޮނުވީ ޖަލުގައި ހުންނެވި މީހަކަށް ނޫންކަމަށާއި، ޕާޓީތަކުގެ ލީޑަރުންނަށްކަމަށެވެ.
ޖަލު ހުކުމް ތަންފީޒް ކުރުމަކީ އެހެން ލެވެލްއެއްގައި ހިނގާކަމެއްކަން ފާހަގަކުރައްވާ މިނިސްޓަރ ވިދާޅުވީ، ޕާޓީތަކުން ކަނޑައަޅާ ފަރާތްތަކާއެކު މަޝްވަރާކުރާނެކަމަށެވެ. މިނިސްޓަރ ޝައިނީގެ ވާހަކަފުޅުގައި ކުށެއް ކޮށްފިނަމަ، މިހާރު ހުރިހާ އެންމެންގެ މައްޗަށްވެސް ޝަރީޢަތްކުރެވި ޤާނޫނާ ޤަވާއިދު ތަންފީޒްވާން ބޭނުންވާކަން ރައްޔިތުންނަށް މިހާރު ޔަޤީންވާނެކަމަށެވެ.
ސަރުކާރުން ސިޔާސީ ޕާޓީތަކުގެ މަޝްވަރާތައް ކުރިޔަށް ގެންދިޔުމަށް އަނެއްކާވެސް ދައުވަތު ދިނީ، އިދިކޮޅު ފަރާތްތަކުން އިސްލާހީ ބަދަލުތަކެއްގެ ވާހަކަ ދައްކައި، އެކި ވަސީލަތްތައް މެދުވެރިކޮށް އެކަމަށް ގޮވާލަމުން ގެންދާތީ، މިފަދަ ފުރުޞަތަކަށް ޕާޓީތަކުން ތައްޔާރަށް ތިބިކަމަށް ސަރުކާރަށް ޤަބޫލުކުރެއްވޭތީކަމަށް ސަރުކާރުގެ ފަރާތުން މަޝްވަރާތަކަށް ކަނޑައަޅާފައިވާ އެންމެ އިސް މަންދޫބު ފިޝަރީޒް މިނިސްޓަރ މުޙައްމަދު ޝައިނީ ވަނީ ވިދާޅުވެފައެވެ. ނަމަވެސް މަޝްވަރާތައް އަދިވެސް ކުރިއަށް ގެންދެވޭނީ މަޝްވަރާ ތަކުގައި ބައިވެރިވާ ފަރާތްތަކުން އެއްވެސް ޝަރުތަކާއި ނުލައި ހެޔޮނިޔަތުގައި މަޝްވަރާ ތަކަށް އައުމުން ކަމުގައި ޑޮކްޓަރ ޝައިނީ ވިދާޅުވިއެވެ.