މަރުކަޒީ ބޭންކް، އެމް.އެމް.އޭގެ ގަވަރުނަރުގެ މަޤާމަށް ޢައްޔަންކުރެއްވުމަށް ރައީސުލްޖުމްހޫރިއްޔާ ރައްޔިތުންގެ މަޖިލީހަށް ފޮނުއްވެވި އެސިސްޓެންޓް ގަވަރުނަރުގެ މަޤާމުގައި ހުންނެވި ނީޒާ ޢިމާދު ނަން އަނބުރާ ނަންގަވާ، ކ.މާފުށި މުސްތަރީގެ، އަޙްމަދު ނަޞީރުގެ ނަން މަޖިލީހަށް ފޮނުއްވައިފިއެވެ.
ރައީސުލްޖުމްހޫރިއްޔާގެ އޮފީހުގެ ތަރުޖަމާން އިބްރާހީމް މުޢާޒް ޢަލީ ވަނީ އެކަން ކަށަވަރުކޮށްދެއްވާފައެވެ. ގަވަރުނަރަކަށް ޢައްޔަންކުރެއްވުމަށް ރައީސުލްޖުމްހޫރިއްޔާ ރައްޔިތުންގެ މަޖިލީހަށް ފޮނުއްވެވި އަޙްމަދު ނަޞީރަކީ، ގިނަ ދުވަސްތަކެއް ވަންދެން ކެޕިޓަލް މާކެޓް ޑިވެލޮޕްމަންޓް އޮތޯރިޓީ، ސީއެމްޑީއޭ، އަދި އެމްއެމްއޭގައި ވެސް މަސައްކަތް ކުރެއްވި ބޭފުޅެކެވެ. އަދި އޭނާ ފިނޭންސް މިނިސްޓްރީގެ ސްޓޭޓް މިނިސްޓަރުކަންވެސް ކުރައްވާފައިވެއެވެ.
ނީޒާ ޢިމާދުގެ ނަން މަޖިލީހަށް ފޮނުއްވުމަށްފަހު ނެންގެވި ސަބަބެއް ސަރުކާރުން ހާމއެއްނުކުރައްވައެވެ. ގަވަރުނަރުގެ މަޤާމަށް އަޙްމަދު ނަޞީރު ޢައްޔަންކުރުމަށް ރައީސުލްޖުމްހޫރިއްޔާ ނިންމެވީ، އެ މަޤާމްގައި ކުރިން ހުންނެވި ޑރ.އަޒީމާ އާދަމް އިސްތިއުފާދެއްވުމާ ގުޅިގެންނެވެ. މަރުކަޒީ ބޭންކްގެ ގަވަރުނަރުގެ މަޤާމަށް އަޙްމަދު ނަޞީރު ރަސްމީކޮށް އައްޔަންކުރެވޭނީ ރައްޔިތުންގެ މަޖިލީހުން އޭނާއަށް ރުހުންދިނުމުންނެވެ.
ދިވެހިރާއްޖޭގެ ފައިސާއާއި މާލީ ކަންކަމާ ގުޅޭ އެންމެ ބޮޑެތި އަދި މުހިންމު މުޢާމަލާތްތަކާއި، ނިންމުންތައް ނިންމާމީ މަރުކަޒީ ބޭންކުންނެވެ.