މާލޭގައި މާރާމާރި އިތުރުވެފައިވާތީ، އަމަން ބެލެހެއްޓުމަށް ފުލުހުންނާއި ސިފައިން ނެރުމަށް ނިންމާފައިވާކަމަށް ހޯމް މިނިސްޓަރ އަޒްލީން އަޙްމަދު ވިދާޅުވެއްޖެއެވެ.
ހޯމް މިނިސްޓްރީގައި ބޭއްވެވި ނޫސްވެރިންގެ ބައްދަލުވުމުގައި ވާހަކަފުޅު ދައްކަވަމުން ހޯމް މިނިސްޓަރ ވިދާޅުވީ މި ދިޔަ ދެތިން ދުވަހު މާލޭގައި ހިންގި މާރާމާރީތަކަކީ ގްރޫޕްތަކުގެ މެދުގައި ހިންގާފައިވާ މާރާމާރީތަކެއްކަން މިހާތަނަށް ބެލިބެލުމުން އެނގިފައިވާކަމަށެވެ. އަދި މި މާރާމާރީތަކާއި ގުޅިގެން މިހާތަނަށް ވިހި މީހަކު ހައްޔަރުކޮށްފައިވާކަމަށްވެސް ހޯމް މިނިސްޓާރ ވިދާޅުވިއެވެ. އަދި އެކަމުގައި ތުހުމަތުކުރެވޭ އިތުރު މީހުން ހޯދުމުގެ މަސައްކަތް ކުރަމުން ގެންދަވާކަމަށާއި އެކަމުގައި ބައިވެރިވި މީހުންނަށް ހަރުކަށި އަދަބު ދެއްވާނެކަމަށް މިނިސްޓަރ ވިދާޅުވިއެވެ.
img:http://s4.psmnews.mv/images/660x400/15015885155968.jpg|ހޯމް މިނިސްޓަރ އަޒްލީން އަހުމަދު ނޫސްވެރިންނަށް މަޢުލޫމާތުދެއްވަނީ - ފޮޓޯ: ޕީއެސްއެމް
ސިލްސިލާކޮށް ހިނގަމުންދާ މާރާމާރިތައް ހުއްޓުވުމަށް ފުލުހުން ކެނޑިނޭޅި މަސައްކަތްކުރައްވަމުން ގެންދަވާކަމަށާއި މިމައްސަލަތަކާ ގުޅިގެން އަޅަންޖެހޭ ފިޔަވަޅުތައް ސަރުކާރުން ގެންދަނީ އެއްވެސް ލަސްކުރުމެއް ނެތި އަޅަމުން އަންކަމަށާއި މިކަމުގައި އެއްވެސްވަރެއްގެ ދުލެއް ސަރުކާރުން ނުދޭނެކަމަށް ވިދާޅުވިއެވެ. މާރާމާރީގެ މައްސަލަތައް އިތުރުވަނީ ސިޔާސީ ގޮތުން ޤައުމު ހަލަބޮލި ދުވަސްވަރެއްގައިކަމަށާއި، މާރާމާރިއާއި ސިޔާސީ ބައެއް ފަރާތްތަކާއި ގުޅުވުމަށް ބައެއް ފަރާތްތަކުން މަސައްކަތްކުރާކަމަށެވެ. އަދި ސިޔާސީ ގޮތުން އެއްވެސް ގުޅުމެއް އޮތްތޯ ބެލުމުގެ މަސައްކަތްވެސް ކުރައްވަމުން ގެންދަވާކަމަށް ހޯމް މިނިސްޓަރ ވިދާޅުވިއެވެ.
ވޭތުވެދިޔަ ހަފްތާގެ ތެރޭގައި ހިނގާ ދިޔަ މާރާމާރީތަކުގައި މިހާތަނަށް ދެ ޒުވާނަކަށް ހަމަލާދީ މަރާލާފައިވެއެވެ. ގުރޫޕް މާރާމާރީތައް ހުއްޓުވާ ރައްޔިތުންނަށް އަމާންކަންމަތީ އުޅެވޭނެ މަގުފަހިކޮށްދޭނެކަމުގެ ޔަޤީންކަން ހޯމް މިނިސްޓަރ ދެއްވިއެވެ.
ޕްރެސް ކޮންފަރެންސްގައި ވާހަކަފުޅުދައްކަވަމުން މާރާމާރި ހުއްޓުވުމުގެ ޤާބިލްކަން ސަލާމަތީ ބަރުތަކުގައި އެބަހުރިކަން މިނިސްޓަރ ފާހަގަކުރެއްވިއެވެ. މާރާމާރީތަކާ ގުޅިގެން ފުލުހުން އަޅަންޖެހޭ ފިޔަވަޅުތައް ނާޅާކަމަށްބުނެ ބައެއް ފަރާތްތަކުން ދައްކަމުންދާ ވާހަކަތައް ހުއްޓާލުމަށާއި، އެއްވެސް ބާވަތެއްގެ ކުށަކަށް އަރައިގަންނަ މީހަކު ނުހުއްޓުވާ ފުލުހުން ނުތިބޭނެކަމަށްވެސް މިނިސްޓަރ އަޒްލީން ވިދާޅުވިއެވެ.