18 ވަނަ ރައްޔިތުންގެ މަޖިލިސް ފަށާފައިވަނީ 2014 ވަނަ އަހަރުގެ މެއި މަހުގެ 28 ވަނަ ދުވަހުއެވެ. އެދުވަހުން ފެށިގެން މިހާތަނަށް މަޖިލީހުގެ ތަޅުމަށް 143 ބިލެއް ހުށަހަޅާފައިވެއެވެ. އޭގެ ތެރެއިން މިހާތަނަށް 138 ބިލެއް މަޖިލީހުގެ ތަޅުމުން ފާސްކޮށްފައިވާއިރު، ނުނިމި މިހާރު ތަޅުމުގައި އޮތީ އެންމެ 5 ބިލެވެ. މިހާތަނަށް އަށާރަ ވަނަ ރައްޔިތުންގެ މަޖިލީހަށް 6 ޤަރާރެއް ހުށަހަޅައި ގޮތެއް ނިންމަވާފައިވާއިރު، ސަރުކާރުގެ ފަރާތުން 122 މައްސަލައެއް ހުށައަޅާ ނިންމަވާފައިވެއެވެ. އަދި 3 ބަޖެޓް ފާސްކޮށްފައިވާއިރު، ރިޔާސަތުން 18 މައްސަލައެއް ހުށައަޅާ ގޮތެއް ނިންމަވާފައިވެއެވެ. އަދި މެންބަރުން ހުށައެޅި 16 މައްސަލައަކަށް ގޮތެއް ނިންމާފައިވާއިރު، އެހެނިހެން މައްސަލަތަކާ ގުޅޭ 39 މައްސަލައެއް ނިންމާފައިވެއެވެ. އަދި 53 ފަހަރެއްގެ މަތިން މަޖިލީހުގެ ތަޅުމަށް މިނިސްޓަރުން ހާޒިރުކޮށް ސުވާލުކޮށްފައިވެއެވެ.
އަށާރަ ވަނަ ރައްޔިތުންގެ މަޖިލީހުގައި މިހާތަނަށް ކުރި މަސައްކަތުގެ އުފެއްދުންތެރިކަމުގެ ނިސްބަތަކީ 98.8 އިންސައްތައެވެ. އަދި ނުނިމިހުރި މަސައްކަތްތަކުގެ ނިސްބަތަކީ 1.3 އިންސައްތައެވެ.
2017 ވަނަ އަހަރުގެ ފުރަތަމަ ދައުރުގެ ފެށުނުއިރު މަޖިލީހުގެ ތަޅުމުގައި ކުރީ ދައުރުން ލިބުނު 4 ބިލެއްގެ މަސައްކަތް ނުނިމި ތަޅުމުގައި އޮތެވެ. އަދި މި ދައުރުގެ ތެރޭގައި ހުށައެޅި 6 ބިލާއެކު ޖުމްލަ 10 ބިލްގެ ތެރެއިން 5 ބިލެއްގެ މަސައްކަތް ނިންމާފައިވެއެވެ.
މި ދައުރުގައި އެއް ޤަރާރު ހުށައަޅާ ގޮތެއް ނިންމާފައިވެއެވެ. އަދި ސަރުކާރުން ހުށައެޅި 7 މައްސަލައަކާމެދުވެސް ތަޅުމުން ގޮތެއް ނިންމާފައިވާއިރު މެންބަރުން ހުށައެޅި އެއް މައްސަލަ ނިންމާފައިވެއެވެ. އެހެނިހެން މައްސަލަތަކާ ގުޅޭ 4 މައްސަލައެއް ތަޅުމުން ގޮތެއް ނިންމާފައިވާއިރު، މިނިސްޓަރުންނާއި ސުވާލުކުރުން އެއްފަހަރު ކުރިއަށް ގެންދަވާފައިވެއެވެ.