ތޫނު އެއްޗަކުން ހަމަލާދީ މަރާލާފައި އޮއްވާ ނުނު ޔާމީން ރަޝީދުގެ މަރުގެ މައްސަލައިގެ ތުހުމަތުގައި އިތުރު ހަތަރު މީހަކު ހައްޔަރުކޮށްފިއެވެ. މި މައްސަލައިގެ ތުހުމަތުގައި ކުރިންވެސް ދެ މީހަކު ހައްޔަރުކޮށް ޕާސްޕޯޓް ހިފަހައްޓަފައިވެއެވެ. އެހެންކަމުން މިހާތަނަށް ފުލުހުންގެ ބެލުމުގެ ދަށަށް 6 މީހަކު މިވަނީ ގެންގޮސްފައެވެ.
މޯލްޑިވްސް ޕޮލިސް ސާރވިސް އިން ވިދާޅުވެފައިވަނީ، ޔާމީންގެ މަރުގެ މައްސަލައިގެ ތަޙްޤީޤަށް ބޮޑެތި ކުރިއެރުންތަކެއް ލިބެމުންއަންނަކަމަށާ، މި މައްސަލައިގެ ތަޙްޤީޤަށް ލިބެމުންދާ ކުރިއެރުމާއެކު ތަޙްޤީޤު ކާމިޔާބުކުރެވޭނެކަމުގެ އުންމީދު ބޮޑުވެފައިވާކަމަށެވެ. އަދި ލިބިފައިވާ ހެކި އިތުރަށް ތަޙްލީލްކުރުމަށްޓަކައި ބައިނަލްއަޤްވާމީ އެހީތެރިކަމަށް އެދި، ޔޫރަޕާއި އާސިއާންގެ ޤައުމުތަކުގެ ކުރިއަރާފައިވާ ފޮރެންސިކް ލެބޯޓްރީތަކަށް ފޮނުވާ ތަޙްލީލްކުރަމުން އަންނަކަމަށް ފުލުހުން ވިދާޅުވިއެވެ.
މި ދަނޑިވަޅުގައި ތަޙްޤީޤްގެ ފޯކަސް ބަދަލުކޮށް އެހެނިހެން މަޤްޞަދުތައް ހިމެނޭގޮތަށް ތަޙްޤީޤަށް ހުރަސްއެޅޭގޮތަށް އެކި ފަރާތްތަކުން ކުރަމުންދާ މަސައްކަތުގެ ނަތީޖާއަކީ ޤާތިލުންނަށް ފިލައިގެން އުޅުމަށް މަގުފަހިވާނެކަމެއްކަމަށް ޤަބޫލުކުރެވޭތީ އެފަދަ ޢަމަލުތައް ހުއްޓާލުމަށް ފުލުހުން އިލްތިމާސްކުރައްވައެވެ.
ޔާމީން ރަޝީދުގެ މަރުގެ މައްސަލައިގެ ތުހުމަތުގައި އެކަކު ހައްޔަރުކޮށްފައިވަނީ ޔާމީން ރަޝީދު މަރާލާފައި އޮއްވައި ފެނެނު ގެކައިރީގައި ހުންނަ ގެއަކުންނެވެ. ޔާމީން ރަޝީދުގެ މަރުގެ މައްސަލާގައި ފުރަތަމަ ހައްޔަރުކުރި މީހާ ދިރިއުޅޭ ގެވެސް ފުލުހުން ބަލައި ފާސްކޮށްފައިވެއެވެ. ޕީއެސްއެމްގެ ނިއުސްއަށް އެނގިފައިވާގޮތުގައި އެ ގެ ބަލައި ފާސްކުރުމަށް ކޯޓުން ނެރުއްވި އަމުރުގައި ވަނީ މިދިޔަ މަހުގެ ތޭވީސްވަނަ ދުވަހުގެ ރޭ ޔާމީން ރަޝީދުގެ ފަހަތުން އޭނައަށް ފާރަލުންގޮސް އޭނާ ދިރިއުޅޭ މ.ސްޕެޓިއުލާ ތެރެއަށް ވަނުމުން ޔާމީން ހިފަހައްޓާ އޭނާއަށް ތޫނު އެއްޗަކުން ޙަމަލާދިނުމުގެ ސަބަބުން ޔާމީން ރަޝީދު މަރުވެފައިވާތީ، މައްސަލައާއި ގުޅުން ހުރި ހެއްކާއި ޤަރީނާ ހޯދުމަށްކަމަށެވެ.