ލޯކަލް ކައުންސިލްތަކަށް އިންތިޚާބުވި ކައުންސިލަރުން ހުވާކުރުން ޖޫންމަހުގެ ތިންވަނަދުވަހު ބޭއްވުމަށް ލޯކަލް ގަވަރުމަންޓް އޮތޯރިޓީން ނިންމަވައިފިއެވެ. އެލްޖީއޭގެ ޑިރެކްޓަރ އާދަމް ޝަރީފް އަޙްމަދު ވިދާޅުވީ، އަލަށް އިންތިޚާބުވި ކައުންސިލްތަކުގެ ކައުންސިލަރުން ހުވާކުރުމުގެ އިންތިޒާމްތައް ހަމަޖައްސެވުމުގެ މަސައްކަތްތައް ވަރަށް ބާރަށް ކުރިއަށްދާކަމަށެވެ. އެގޮތުން ރާއްޖޭގެ ހުރިހާ ކައުންސިލްތަކެއް އެއްވަގުތެއްގައި ހުވާކުރުމަކީ ފަސޭހަކަމަށް ނުވާނެކަމަށާއި، ނަމަވެސް އެއް ދުވަހެއްގައި ހުވާކުރުމުގެ އިންތިޒާމްތައް ހަމަޖެއްސެވުމަށް މަސައްކަތްކުރައްވަމުން ގެންދަވާކަމަށެވެ.
ޤާނޫނު ބުނާ ގޮތުން ކައުންސިލަރުން ހުވާކުރަންޖެހޭނީ ފަނޑިޔާރެއްގެ ކުރިފުޅުމަތީގައެވެ. ޝަރީފް ވިދާޅުވީ، ރާއްޖޭގެ ހުރިހާ ރަށެއްގައި ފަނޑިޔާރުން ނުތިއްބަވާކަމަށާއި، ފަނޑިޔާރުން ތިއްބެވި ރަށްރަށުގައި އެއް ވަގުތެއްގައި ހުވާކުރުމުގެ އިންތިޒާމް ހަމަޖައްސަވާނެކަމަށެވެ. އަދި ފަނޑިޔާރުން ނުތިއްބަވާ ރަށްރަށަށް ފަނޑިޔާރުން ފޮނުއްވުމަށާއި، ހުވާކުރުމަށްޓަކައި ފަނޑިޔާރުންގެ ކަންކަން އިންތިޒާމްކުރުމަށް ސުޕްރީމް ކޯޓާއެކު މަޝްވަރާކުރައްވަމުން އަންނަކަމަށް ވިދާޅުވިއެވެ. މިހާރު ކުރިއަށްދަނީ ފަނޑިޔާރުން ތިއްބެވި ރަށްތައް ދެނެގަތުމުގެ މަސައްކަތްކަމަށާއި، ފަނޑިޔާރުން ނުތިއްބަވާ ރަށްރަށަށް ފަނޑިޔާރުން ފޮނުއްވާނެކަމަށާއި، އެއަށްފަހު ހުވާ ކުރާނެ ގަޑިތައް އިޢުލާން ކުރެވޭނެކަމަށް އާދަމް ޝަރީފް ވިދާޅުވިއެވެ.
އެލްޖީއޭގެ ޑިރެކްޓަރ އާދަމް ޝަރީފް އަޙްމަދު ވިދާޅުވީ، އަލަށް އިންތިޚާބުވި ކައުންސިލްތަކުން ކޮންމެ ކައުންސިލަކުންވެސް ތަރައްޤީގެ ފަސް އަހަރު ދުވަހުގެ ޕްލޭނެއް އެކުލަވާލައްވާ އެލީޖީއޭއަށް ފޮނުއްވަން ޖެހޭނެކަމަށެވެ.
ލޯކަލް ކައުންސިލް އިންތިޚާބުގައި ހަސަތޭކަ ފަސްދޮޅަސް ހަތަރު ކައުންސިލަރުން އިންތިޚާބުކޮށްފައިވެއެވެ.