މަދަނީ ވައިގެ ބަނދަރުތަކުގެ ސަލާމަތާބެހޭ ބައްދަލުވުމެއް ފަށައިފި

މަދަނީ ވައިގެ ބަނދަރުތަކުގެ ސަލާމަތީ ކަންކަން ބަލަހައްޓާ ފަރާތްތަކަށް ޚާއްޞަކޮށްގެން ބާއްވާ މަސައްކަތު ބައްދަލުވުމެއް ރާއްޖޭގައި ފަށައިފިއެވެ. 

މިއީ ސަރަޙައްދީ ޤައުމުތަކުން ބައިވެރިވާ ބައްދަލުވުމެކެވެ. މިއަދުން ފެށިގެން މިމަހުގެ އެގާރަ ވަނަ ދުވަހުގެ ނިޔަލަށް ކުރިއަށްގެންދާ ފުރަތަމަ މަސައްކަތު ބައްދަލުވުމަކީ މަދަނީ ވައިގެ ބަނދަރުތަކުގެ ސަލާމަތީ ޕްރޮގްރާމް ނުވަތަ އެއަރޕޯޓު ސެކިއުރިޓީ ޕްރޮގްރާމް ތައްޔާރުކުރުމުގައި ޢަމަލީ ގޮތުން ހަރަކާތްތެރިވާ ފަރާތްތަކަށާއި، އެއަރޕޯޓް ސެކިއުރިޓީ ޕްރޮގްރާމް ތަންފީޒް ކުރައްވާ ފަރާތްތަކަށް ޚައްޞަކޮށްގެން ހިންގާ މަސައްކަތު ބައްދަލުވުމެވެ. 

ދެވަނަ ބައްދަލުވުމަކީ، މަދަނީ ވައިގެ ބަނދަރުތަކުގައި އޭވިއޭޝަން ސެކިއުރިޓީ ކޮލިޓީ ކޮންޓްރޯލް ޕްރޮގްރާމް ހިންގުމަށްޓަކައި ބޭނުންވާ މީހުން ބިނާ ކުރުމަށް ހިންގާ މަސައްކަތު ބައްދަލުވުމެކެވެ. މި މަސައްކަތު ބައްދަލުވުމުގެ ބޭނުމަކީ، ނޭޝަނަލް ސިވިލް އޭވިއޭޝަން ސެކިއުރިޓީ ކޮލިޓީ ކޮންޓްރޯލް ޕްރޮގްރާމްގައި ކަނޑައެޅިފައިވާ މިންގަނޑުތަކާއި އެއްގޮތަށް މަދަނީ ވައިގެ ބަނދަރުތަކުގައި ކޮލިޓީ ކޮންޓްރޯލް ޕްރޮގްރާމް ހިންގާ ބެލެހެއްޓުމަށް ބޭނުންވާ ފަންނީ މުވައްޒަފުން އުފެއްދުމެވެ. މި ބައްދަލުވުން ކުރިއަށްދާނީ މިމަހުގެ ސާދައިން އަށާރަ ވަނަ ދުވަހުގެ ނިޔަލަށެވެ.

މި ބައްދަލުވުން ފެށުމަށް ކޯސްޓްގާޑް ބިލްޑިންގައި ބޭއްވި ރަސްމިއްޔާތުގައި ވާހަކަފުޅު ދައްކަވަމުން ޑިފެންސް މިނިސްޓަރ އާދަމް ޝަރީފް ޢުމަރު ވިދާޅުވީ، މި ބައްދަލުވުމަކީ މި ދާއިރާގައި މަސައްކަތްކުރާ ފަރާތްތަކުގެ ހުނަރާއި ތަޖުރިބާ ހިއްސާކޮށް މި ދާއިރާއިން ދިމާވާ ގޮންޖެހުންތަކާއި ދަތިތައް ހައްލުކުރާނެ ކަންކަން ދެނެގަނެވޭނެ ބައްދަލުވުމެއްކަމަށެވެ.

އެއަރޕޯޓް ސެކިއުރިޓީ ޕްރޮގްރާމް ޑިވެލޮޕްމަންޓް ބައްދަލުވުމުގައި އޭޝިއާ ޕެސިފިކްގެ ފަސް ޤައުމަކުން 8 ބައިވެރިންނާއި ރާއްޖެއިން 14 ބައިވެރިންނާއެކު ޖުމްލަ 25 ފަރާތަކުން މި ބައްދަލުވުމުގައި ބައިވެރިވެއެވެ. ރާއްޖެއިން ބޭރުން މި ބައްދަލުވުމުގައި ބައިވެރިވާ ޤައުމުތަކަކީ ބޫޓާން، އިންޑޮނޭޝިޔާ، ފިލިޕީންސް، ސްރީލަންކާ، ތައިލެންޑްއެވެ. މީގެ އިތުރުން ސްޕެޝަލް ކޮލިޓީ ކޮންޓްރޯލް މަސައްކަތު ބައްދަލުވުމުގައި ބައިވެރިވަނީ ޑިފެންސް މިނިސްޓްރީގެ އިތުރުން އޭވިއޭޝަން ސެކިއުރިޓީ ކޮމާންޑް، އައްޑޫ އިންޓަރނޭޝަނަލް އެއަރޕޯޓް، މޯލްޑިވްސް އެއަރޕޯޓްސް ކޮމްޕެނީ، ދާލު ޑޮމެސްޓިލް އެއަރޕޯޓް އަދި ޓީއެމްއޭ ހިމެނޭގޮތުން ވިހި ބައިވެރިންނެވެ.