ސޯޝަލް މީޑިއާ އެކްޓިވިސްޓް ޔާމީން ރަޝީދު މަރާލުމަކީ ރާއްޖޭގެ ޑިމޮކްރަސީއަށާއި މިނިވަން މީޑިޔާއަށް ދިން ޙަމަލާއެއްގޮތުގައި ސިފަކުރައްވައި، މި ޙަމަލާ ރައީސުލްޖުމްހޫރިއްޔާގެ އޮފީހުން ކުށްވެރިކުރައްވައިފިއެވެ.
ރާއްޖޭގެ ސޯޝަލް މީޑިއާގެ މަޝްހޫރު ބްލޮގަރ ޔާމީން ރަޝީދު މަރާލުމާގުޅިގެން ރައީސުލްޖުމްހޫރިއްޔާގެ އޮފީހުން ނެރުއްވި ބަޔާނުގައި ވަނީ، އޭނާ މަރާލި ޚަބަރު ރައީސުލްޖުމްހޫރިއްޔާއަށް ލިބިވަޑައިގަތީ ކުއްލިސިހުމާއި ހިތާމަޔާއެކުގައި ކަމަށާ، މިއީ ރާއްޖޭގެ ޝޯޝަލް މީޑިއާއަށް ލިބިގެންދިޔަ އުނިކަމެއްގެ ގޮތުގައި ސިފަކުރައްވާފައެވެ. އަދި މި ޢަމަލަކީ އަނިޔާވެރިކަމާއި، ރަޙުމްކުޑަކަމުގެ ދަށުދަރަޖައިގެ ޢަމަލެއް ކަމަށާއި، މި ޢަމަލު ރައީސުލްޖުމްހޫރިއްޔާގެ ނަންފުޅުގައާއި، ސަރުކާރުގެ ނަމުގައި އެންމެ ހަރުކަށި އިބާރާތުން ކުށްވެރިކުރައްވާކަމަށް މިބަޔާނުގައިވެއެވެ.
ރައީސުލްޖުމްހޫރިއްޔާގެ އޮފީހުގެ ބަޔާނުގައިވަނީ މިމައްސަލަ ފުލުހުން ތަޙްޤީޤް ކުރައްވަމުންދާކަމަށާއި، މިމައްސަލައިގެ ތަޙްޤީޤަށް ސަރުކާރުގެ ހުރިހާވަސީލަތްތައް ބޭނުންކުރެއްވޭނެކަން ހާމަކުރައްވާފައެވެ.
ދިވެހި ޒުވާނަކު މިފަދަ އަނިޔާވެރި ގޮތަކަށް މަރާލުމަކީ ދިވެހި ސަރުކާރުން އިންތިހާއަށް ހިތާމަކުރާކަމެއްކަމަށާއި، ރާއްޖޭގެ ނޫސްވެރިންންށާއި، ޢާންމުފަރުދުންނަށް ލިބޭ އިންޒާރުތަކަށް އަވަސް ފިޔަވަޅު އެޅުމަށް، މިފަދަ މައްސަތްތަކުގެ ތަޙްޤީޤަށް ބޭނުންވާ އޮޕަރޭޓިންގ ޕްރޮސީޖަރ މުޠާލިއާ ކުރެއްވުމުގެ މަސައްކަތް ކުރައްވަމުންދާކަމަށް ރައީސުލްޖުމްހޫރިއްޔާގެ އޮފީހުން ވިދާޅުވެއެވެ.
އަދި ދިވެހިރައްޔިތުންގެ ސަލާމަތާއި ރައްކާތެރިކަން ކަށަވަރުކުރެއްވުމަށް އެޅުއްވެންހުރި ހުރިހާ ފިޔަވަޅުތައް ސަރުކާރުން އަޅުއްވާނެކަމުގެ ޔަޤީންކަން ދެއްވާކަމަށް އެބަޔާނުގައިވެއެވެ. އަދި ރައީސުލްޖުމްހޫރިއްޔާގެ އަމިއްލަ ނަންފުޅުގައާއި، ސަރުކާރުގެ ނަމުގައި މަރުޙޫމް ޔާމީން ރަޝީދުގެ ޢާއިލާއަށް ސަރުކާރުން ތަޢުޒިޔާ ފޮނުއްވާފައިވެއެވެ.
tw:https://twitter.com/presidencymv/status/856070246771314688