"ނޯއެލިމިނޭޝަން ޕަވަރ" އާއެކު މޯލްޑިވިއަން އައިޑަލް ސީޒަން ދޭއްގެ ގަދަ 5 ބައިވެރިންވެސް ކުރިއަށް އޮތް ރައުންޑަށް ދަތުރުކޮށްފިއެވެ.
ނޯ އެލިމިނޭޝަން ޕަވަރއަކީ އައިޑަލް ފްރެންޗައިޒް ކުރިއަށްގެންދާ އެހެން ޤައުމުތަކުގައިވެސް ޖަޖުންނަށް ލިބޭ ފުރުސަތެކެވެ. ޖަޖުންނަށް ލިބޭ މި ބާރާއެކު، އެލިމިނޭޝަން ނައިޓުގައި އެއްވެސް ބައިވެރިއަކު ނުކަޓައި ކުރިއަށްއޮތް ޝޯވއަށް ދަތުރުކުރުމުގެ ފުރުސަތު ލިބިގެންދާނެއެވެ. އެހެންކަމުން މިރޭގެ ޝޯވގައި ގާލާ ރައުންޑުގައި މިހާރު ވާދަކުރާ 5 ގަދަ ބައިވެރިންވެސް ވަނީ ކުރިއަށް އޮތް ޝޯވއަށް ދަތުރުކޮށްފައެވެ.
އެހެންނަމަވެސް އަންނަ ހަފްތާގެ ޝޯވް އިން މިފަސް ބައިވެރިންގެ ތެރެއިން 2 ބައިވެރިޔަކު އައިޑަލްއާ ވަކިވާނެއެވެ.
މިހާރު މި ޝޯވގައި ވާދަކުރާ ގަދަ 5 ބައިވެރިންނަކީ: ޢިބްރާހީމް ވަޙީދު، މުޙައްމަދު ތަސްނީމް، ޢަބްދުﷲ ހިޝާން، ޙަމޫދު އަޙްމަދު އަދި ޝަމްވީލް މުޙައްމަދު. މިބައިވެރިންނެވެ.
މި މުބާރާތުގެ ފޯރި، ދުވަހެއް ދުވަހަކަށް ގަދަވަމުންދާއިރު، މިރޭގެ އެލިމިނޭޝަން ނައިޓުގައިވެސް ބެލުންތެރިންނަށް ޚާއްސަ ކަންތައްތަކެއް ވަނީ ފެނިގެންގޮސްފައެވެ.
އެގޮތުން މިރޭގެ ޝޯވގައި އައިޑަލް ސީޒަން އެކަކުން ވިދާލި ބައެއް ފަންނާނުންނާއެކު، އައިޑަލް ސީޒަން ދޭއްގެ ގަދަ 5 ބައިވެރިން ވަނީ ހިތްގައިމު ރީތި ލަވަތަކެއް ހުށައަޅާދީފައެވެ. "ސީޒަން ވަން އައިޑަލްސް" މި ތީމަށް މިރޭގެ ޝޯވގައި މިއިން ކޮންމެ ބައިވެރިއަކުވެސް ވަނީ ފޯރިގަދަ މެޑްލީތަކެއް ހުށައަޅާދީފައެވެ.
މިރޭގެ ޝޯވގައި އައިޑަލްގެ އޮފިޝަލް ބޭންކިންގ ޕާރޓްނަރ، ބޭންކް އޮފް މޯލްޑިވްސްގެ ފަރާތުން އައިޑަލްގެ ގަދަ 5 ބައިވެރިންގެ ތެރެއިން ކޮންމެ ބައިވެރިއަކަށްވެސް، އެ ބައިވެރިއެއްގެ ފޮޓޯ ޖަހާފައިވާ 10،000 ރުފިޔާގެ އަގުހުރި މާސްޓަރ ކާޑެއް ވަނީ ހަދިޔާކޮށްފައެވެ.