މޯލްޑިވިއަން އައިޑަލްގެ ބެލުންތެރިންގެ ހިތުގައި، އައްފާން އެނބުރި އަންނާނެތޯ އުފެދުނު ސުވާލަށް މިރޭ ޖަވާބް ލިބިއްޖެއެވެ.
މޯލްޑިވިއަން އައިޑަލްގެ އެއް ޖަޖު، އިސްމާޢީލް އައްފާން ޖަޖުންގެ ޕެނަލް ދޫކޮށް ދިޔައީ، މިދިޔަ ހަފްތާގެ ޕަރފޯމެންސް ނައިޓްގައި ބައެއް ބައިވެރިންގެ ހުށަހެޅުންތައް އިތުރަށް ފުރިހަމަ ކުރަންޖެހޭކަމަށްބުނެ ހުށަހެޅުންތަކާމެދު ހިންހަމަނުޖެހިގެންނެވެ.
މިރޭގެ އައިޑަލް ޝޯވއާ އައްފާން އަލުން ގުޅިފައިވާއިރު، އެހެން ޝޯވތަކާއި ޚިލާފަށް، މިރޭގެ ގާލާ ޝޯވގައި ބައިވެރިން ލަވަ ހުށައަޅާދީފައި ވަނީ 2 ތީމަކަށެވެ. މިރޭގެ ޝޯވއަށް ޙާއްސަކޮށްފައިވާ ދެ ތީމަކީ "އައްފާންސް ސްޕެޝަލް" އާއި "އެކޯސްޓިކް"އެވެ.
މިރޭގެ ޝޯވގައި މި ދެ ތީމާއި ގުޅޭ ރީތި ލަވަތަކެއް ބައިވެރިން ވަނީ ހުށައަޅާދީފައެވެ. ގަދަ ފަހެއްގައި މިހާރު ވާދަކުރާ ބައިވެރިންގެ ތެރެއިން ބެލުންތެރިންނަށް އެންމެ ކަމުދާ ހުށައެޅުމެއް ހުށައަޅައިދިން ބައިވެރިއަކަށް ވޯޓުލުމަށްޓަކާ އެސް.އެމް.އެސް ކުރުމުގެ ފުރުޞަތު މާދަމާ މެންދުރުފަހު 3 ޖެހުމާއި ހަމައަށްވަނީ ހުޅުވާލާފައެވެ.
ވޯޓުލުމަށްޓަކާ، MI ޖެހުމަށްފަހު ހުސްތަންކޮޅެއް ދޫކޮށްފައި، އެ ބައިވެރިއެއްގެ ނަން ޖެހުމަށްފަހު 303 އަކަށް އެސް.އެމް.އެސް ކުރެވޭނެއެވެ.
ބެލުންތެރިން މި ޝޯވއަށް ފޮނުވާ ކޮންމެ އެސް.އެމް.އެސްއަކަށް 3 ރުފިޔާ ޗާޖްކުރާނެއެވެ. އަދި ކޮންމެ ނަންބަރަކުންވެސް އެންމެ ގިނަވެގެން ފޮނުވޭނީ 50 އެސް.އެމް.އެސްއެވެ.
މޯލްޑިވިއަން އައިޑަލްގެ ގާލާ ރައުންޑުގައި މިހާރު ވާދަކުރާ ގަދަ 5 ބައިވެރިންނަކީ:
- މުޙައްމަދު ތަސްނީމް
- ޙަމޫދު އަޙްމަދު
- ޢަބްދުﷲ ހިޝާން
- ޝަމްވީލް މުޙައްމަދު އަދި
- ޢިބްރާހީމް ވަޙީދު
މިރޭގެ ޝޯވގައި ޕަރފޯމްކުރި 5 ބައިވެރިންގެ ތެރެއިން ޖަޖުންގެ 50 އިންސައްތަ މާކްސް އަދި ބެލުންތެރިން 50 އިންސައްތަ ވޯޓާއެކު، އެންމެ ގިނަ ޕޮއިންޓް ލިބޭ ބައިވެރިން ހިމެނޭހެން ގާލާ ރައުންޑުގެ އަށްވަނަ ޝޯވއަށް ދަތުރުކުރާ ގަދަ 4 ބައިވެރިން ކަނޑައެޅުން އޮންނާނީ މާދަމާ ރޭ ބާއްވާ އެލިމިނޭޝަން ނައިޓުގައެވެ.