ދަތުރުފަތުރުގެ ދާއިރާއިން އެއްބާރުލުން ދިނުމަށް، ފެނަކަ ކޯރޕަރޭޝަނާއި އައިލެންޑް އޭވިއޭޝަން ސަރވިސަސްއާއި ދެމެދު އެއްބަސްވުމެއްގައި ސޮއިކޮށްފިއެވެ.
މިކަމަށްޓަކައި ފެނަކަ ކޯރޕަރޭޝަންގައި ބޭއްވި ރަސްމިއްޔާތުގައި މި އެއްބަސްވުމުގައި އެކުންފުނީގެ ފަރާތުން ސޮއިކުރެއްވީ މެނޭޖިންގ ޑިރެކްޓަރ އަޙްމަދު ޝަރީފްއެވެ. އަދި އައިލެންޑް އޭވިއޭޝަން ސަރވިސަސްގެ ފަރާތުން ސޮއިކުރެއްވީ އެތަނުގެ މެނޭޖިންގ ޑިރެކްޓަރ ޢަބްދުލް ހާރިސްއެވެ. މި އެއްބަސްވުމާއި ގުޅޭގޮތުން ވާހަކަދައްކަވަމުން ފެނަކަ ކޯރޕަރޭޝަންގެ މެނޭޖިންގ ޑިރެކްޓަރ އަޙްމަދު ޝަރީފް ވިދާޅުވީ، ފެނަކަ ކޯރޕަރޭޝަނުން ރާއްޖޭގެ އެކި ސަރަޙައްދުތަކަށް ކަރަންޓުގެ ޚިދުމަތް ދެމުންދާއިރު، ދިމާވާ ކުއްލި ޙާލަތްތަކުގައި އިންޖީނުގެތަކަށް ބޭނުންވާ ސާމާނު ފޮނުވުމުގައި ބައެއް ކަހަލަ ދަތިތައް ކުރިމަތިވާކަމަށެވެ. އެހެންކަމުން މިފަދަ އެއްބަސްވުމެއްގެ ސަބަބުން ދަތުރުފަތުރަށް ހޭދަވާ ވަގުތު ކުޑަވެ، ރައްޔިތުންނަށް ލުއިފަސޭހަ ޚިދުމަތްތަކެއް ދިނުމުގެ މަގު އިތުރަށް ތަނަވަސް ވެގެންދާނެކަމަށް ޝަރީފް ވިދާޅުވިއެވެ.
އައިލެންޑް އޭވިއޭޝަންގެ މެނޭޖިންގ ޑިރެކްޓަރ ޢަބްދުލް ހާރިސް ވިދާޅުވީ މިފަދަ އެއްބަސްވުމެއްގެ ސަބަބުން ދެ ފަރާތުގެ ވިޔަފާރިއަށްވެސް ބޮޑެތި ކުރިއެރުންތަކެއް ލިބި، އިތުރު ފަސޭހަތަކެއް ލިބިގެންދާނެކަމަށެވެ. މި އެއްބަސްވުމުގެ ދަށުން ފެނަކައިން ކުރާދަތުރުތަކުގެ ގެ ތެރެއިން އަތޮޅުތަކަށާއި ބޭރަށް ކުރާ ވައިގެ ދަތުރުތައް މެނޭޖްކުރާނީ އައިލެންޑް އޭވިއޭޝަނުންނެވެ.
ފެނަކަ ކޯރޕަރޭޝަނުން އަންނަނީ ރާއްޖޭގެ 148 ރަށެއްގައި ކަރަންޓުގެ ޚިދުމަތް ދެމުންދާއިރު، އައިލެންޑް އޭވިއޭޝަނުން ދަނީ ރާއްޖެއާއި ބޭރުގެ ބައެއް މަންޒިލްތަކަށް ދަތުރުކުރަމުންނެވެ.