އައްޑޫ ސްކޫލްތަކުގެ ޓީޗަރުންނަށް އަމާޒުކުރައްވައިގެން ބޭއްވެވި މަސައްކަތު ބައްދަލުވުން ނިންމަވާލައިފިއެވެ.
މިއީ ސްކޫތަކުގެ ޓީޗަރުންގެ ދިރާސާކުރުމުގެ ހުނަރު އާލާކޮށް، އައު މަންހަޖަށް ޢަމުލުކުރުމުގައި ދިމާވާ ގޮންޖެހުތައް ދެނެގަނެގަތުމުގެ މަޤްޞަދުގައި ބޭއްވެވި ބައްދަލުވުމެކެވެ.
ނޭޝަނަލް އިންސްޓިޓިއުޓް އޮފް އެޑިއުކޭޝަނުން އައްޑޫ ސްކޫލްތަކުގެ ޓީޗަރުންނަށް އަމާޒުކޮށް ކުރިއަށް ގެންދެވި މި މަސައްކަތު ބައްދަލުވުމަކީ، އައު މަންހަޖު ތަންފީޒްކުރަމުން ދާއިރު ދިމާވާ ގޮންޖެހުންތައް ދެނެގަތުމަށާއި، މަންޙަޖަށް އަޙްލުވެރިކުރެއްވުމަށް ބޭއްވެވި މަސައްކަތު ބައްދަލުވުމެކެވެ. މި ބައްދަލުވުމުގައި ޓީޗަރުންނާ ޙިއްސާކުރި މަޢުލޫމާތުގެ ތެރޭގައި ތަފާތު ދިރާސާތަކުގެ ބަހާތަކާއި، ދިރާސާތައް ކުރިއަށް ގެންދެވޭނެ ގޮތާއި ދިރާސާ ކުރިއަށް ގެންގޮސް މައްސަލަތައް ދެނެގަނެގަނެ ރިޕޯޓް ތައްޔާރުކޮށް އެފަދަ މަޢުލޫމާތު ހިއްސާ ކުރާނެ ގޮތުގެ މަޢުލޫމާތުދެއްވާފައިވެއެވެ.
މި މަސައްކަތު ބައްދަލުވުމުގައި އައްޑޫ ސިޓީގެ ހުރިހާ ސްކޫލެއްގެ ކީސްޓޭޖް އެކެއް ދޭއް ގެ ދުއިސައްތަ ޓީޗަރުން ބައިވެރިވެފައިވެއެވެ. މި ބައްދަލުވުމުގެ ބޭނުން ހިފާނެކަމުގެ ޔަޤީންކަން ބައިވެރިން ވަނީ ދެއްވާފައެވެ.
މި މަސައްކަތު ބައްދަލުވުންތަކަކީ، 2015 އަހަރުން ފެށިގެން ރާއްޖޭގެ ސްކޫލްތަކުގެ ޓީޗަރުންގެ ދިރާސާކުރުމުގެ ހުނަރު އާލާކުރުމަށް ސިލްސިލާކޮށް ކުރިއަށްގެންދަވާ މަސައްކަތު ބައްދަލުވުމެއްކަމަށް އެންއައިއީން މަޢުލޫމާތުދެއްވައެވެ. މި ބައްދަލުވުންތަކުގައި، މިއަހަރު އޮންނަ އިންޓަރނޭޝަނަލް ޓީޗާސް ކޮންފަރެންސަށް ތައްޔާރުވުމަށް ހުނަރުތައް ދަސްކޮށްދޭނެކަމަށް އެންއައިއީން މަޢުލޫމާތުދެއްވައެވެ.