ދުނިޔޭގައި މަސްވެރިކަމުގެ އުފެއްދުމަކަށް މެރިން ސްޓެވޯޑްޝިޕް ކައުންސިލް، އެމް.އެސް.ސީ ސެޓިފިކެޓާއި، ފެއަރ ޓްރޭޑް ސެޓިފިކެޓް ލިބުނު ފުރަތަމަ ކުންފުންޏަކަށް ހޮރައިޒަން ފިޝަރީޒްގެ މާންދޫ ފިޝަރީޒް ކޮމްޕްލެކްސް ވެއްޖެއެވެ.
އެކުންފުނިން ވަނީ މި ދެ ސެޓްފިކެޓްގެ ލޯގޯ ބޭނުންކޮށްގެން ތައްޔާރުކޮށްފައިވާ ދަޅުމަސް ރާއްޖޭން ބޭރަށް އެކްސްޕޯޓު ކުރުމުގެ މަސައްކަތް މިހާރު ފަށާފައެވެ.
މާންދޫ ފިޝަރީޒް ކޮމްޕްލެކްސްގައި ބަންދުކުރާ ދަޅުމަހުގެ އުފެއްދުންތަކަށް ފެއަރ ޓްރޭޑް ސެޓިފިކެޓް ލިބިގެންދިޔުމުން، ބާޒާރުގައި އެ އުފެއްދުމަކަށް ލިބޭ އަގުގެ ތިން ޕަސެންޓް ސީދާ މަސްވެރިންނަށް ލިބިގެންދާނެ ކަމަށާއި، މިއީ ރާއްޖޭގެ މަސްވެރިކަމުގެ ސިނާޢަތަށް ލިބިގެންދިޔަ ވަރަށް ބޮޑު ކުރިއެރުމެއް ކަމަށް ފިޝަރީޒް މިނިސްޓްރީން ވިދާޅުވެއެވެ. img:http://s1.psmnews.mv/images/660x400/14881009872997.jpg|ފެއަރ ޓްރޭޑް ސެޓްފިކެޓްއާއި ބެހޭގޮތުން މިނިސްޓަރ ޝައިނީ މަޢުލޫމާތު ދެއްވަނީ - ފޮޓޯ: ޕީއެސްއެމް / ޢަލީ ނަޞީރު
މިކަން ފާހަގަކުރެއްވުމުގެ ގޮތުން ފިޝަރީޒް މިނިސްޓްރީގައި މިއަދު ބޭއްވި ނޫސްވެރިންގެ ބައްދަލުވުމުގައި ވާހަކަފުޅު ދައްކަވަމުން ފިޝަރީޒް މިނިސްޓަރ ޑރ. މުޙައްމަދު ޝައިނީ ވިދާޅުވީ، ރާއްޖޭގެ މަސްވެރިކަމުގެ އުފެއްދުންތައް ބޭރު ޤައުމުތަކަށް ވިހާވެސް ބޮޑުއަގެއްގައި ވިއްކާ، މަސްވެރިންނަށް އެކަމުން ނަފާ ލިބޭ މިންވަރު އިތުރުކުރެއްވުމަށް ސަރުކާރުން ހުއްޓުމެއްނެތި މަސައްކަތް ކުރައްވާކަމަށެވެ. އަދި ރާއްޖޭގެ މަސްވެރިކަމުގެ އުފެއްދުމަކަށް ފެއަރ ޓްރޭޑް ސެޓްފިކެޓް ލިބިގެން ދިއުމަކީ، ރާއްޖޭގެ މަސްވެރިކަން ބޭރު ޤައުމުތަކުގައި އިތުރަށް ފުޅާވެ، މަސްވެރިންގެ އުފެއްދުންތަކަށް ބޮޑެތި އަގުތަކެއް ލިބިގެންދާނެ ކަމެއްކަމަށެވެ.
"ދުނިޔޭގެ މިހާތަނަށް މަހުގެ ޕްރޮޑަކްޓަކަށް އެމް.އެސް.ސީއާއި ފެއަރ ޓްރޭޑް ސެޓްފިކެޓް ލިބުނު ފުރަތަމަ ފަހަރު މިއީ. މިކަން ވެގެންދާނީ ރާއްޖޭގައި ބާނާ މަހަށް އިތުރު އަގެއް ލިބި، ރާއްޖޭގެ މަސްވެރިކަން ބޭރު ޤައުމުތަކުގައި އިތުރަށް އިޝްތިހާރު ކުރުމަށް ލިބިގެންދާ ފުރުޞަތަކަށް. ވަރަށް ބޮޑެތި އަގުތަކެއް މަހުގެ އުފެއްދުންތަކަށް ލިބިގެންދާނެ ކަމަކަށް މިކަން ވެގެންދާނެ. މި ދެ ލޯގޯ ބޭނުންކޮށްގެން ތައްޔާރުކުރާ މަސްދަޅުތަކުގައިވާ ކިޔު.އާރ ކޯޑު ސްކޭންކޮށްލީމަ އެނގޭނެ މިއީ ކޮން އަތޮޅެއްގައި، ކޮން ރަށެއްގެ ކޮން ދޯންޏަކުން ބާނާފައިވާ މަހެއްކަންވެސް" ޑރ. ޝައިނީ ވިދާޅުވިއެވެ.
މި ބައްދަލުކުރެއްވުމުގައި ވާހަކަދައްކަވަމުން ހޮރައިޒަން ފިޝަރީޒްގެ މެނޭޖިންގ ޑިރެކްޓަރ އަދްނާން ޢަލީ ވިދާޅުވީ، މިފަދަ ސެޓްފިކެޓެއް އެކުންފުނީގެ އުފެއްދުމަކަށް ލިބިގެންދިޔުން ވެގެންދާނީ، އެކުންފުންޏަށް މަސް ވިއްކާ ފާރާތްތަކަށް ލިބިގެންދާނެ ވަރަށް ބޮޑު ފައިދާއެއް ކަމަށެވެ. އަދި މިވަގުތު މި ސްކީމްގައި ބައިވެރިކޮށްފައިވަނީ ލ. އަތޮޅުގެ 3 ރަށެއްގެ މަސްދޯނިތަކުން ބާނާ މަސްކަމަށާއި، އިތުރު ފަރާތްތައް މި ސްކީމްގައި ބައިވެރިކުރުމުގެ މަސައްކަތް އެކުންފުނިން މިހާރުވެސް ކުރަމުން އަންނަ ކަމަށް އަދްނާން ވިދާޅުވިއެވެ.
"މީގެ ލިބޭ އެންމެ ބޮޑު ފައިދާއަކީ މަސްވެރިން އަތުން އަޅުގަނޑުމެން ގަންނަ މަހަށް، އަޅުގަނޑުމެން މިދޭ އަގުގެ އިތުރު %3 އެމީހުންގެ ސީދާ އެކައުންޓަށް އެ އުފެއްދުމެއް ގަންނަ ފަރާތަކުން ފޮނުވައިދޭނެ. މިވަގުތު މީގައި ބައިވެރިކޮށްފައި މިވަނީ ލ. އަތޮޅުގެ ތިން ރަށެއް. އެއީ ލ.ގަމާއި، ލ. ކުނަހަންދޫ އަދި ލ. ހިތަދޫ. ނަމަވެސް އިތުރު ރަށްރަށް މީގެ ތެރެއަށް ވެއްދުމަށްޓަކާ މަސައްކަތް ކުރަމުން މިދަނީ" އަދްނާން ވިދާޅުވިއެވެ.
ފަސް އަހަރުދުވަހުގެ މުއްދަތަކަށް ދޫކުރާ ފެއަރ ޓްރޭޑް ސެޓްފިކެޓް ދޫކުރުމުގައި މައިގަނޑުގޮތެއްގައި ބަލަނީ މުވައްޒަފުންގެ ހާލަތާއި، އެ ފަރާތްތަކަށް މަސައްކަތުގެ މާހައުލުގައި ލިބެންޖެހޭ ރައްކާތެރިކަމުގެ އިތުރުން، ލިބޭ ފައިދާއަށެވެ. 5 އަހަރު ދުވަހުގެ މުއްދަތަކަށް މި ސެޓްފިކެޓް ދޫކުރި ނަމަވެސް، އަހަރަކު އެއް ފަހަރު އެތަންތަން އޮޑިޓް ކުރާނެއެވެ. އަދި އެއްވެސް މައްސަލައެއް ފާހަގަކުރެވޭނަމަ، ސެޓްފިކެޓް ބާޠިލްކުރާނެއެވެ.