މޯލްޑިވިއަން އައިޑަލް ސީޒަން ދޭއްގެ ޕިއާނޯ ރައުންޑުގައި މިރޭ ލަވަ ހުށައަޅައިދިން 8 ބައިވެރިންގެ ތެރެއިން ބެލުންތެރިންނަށް އެންމެ ކަމުދާ ބައިވެރިއަކު ހޮވުމަށް އެސް.އެމް.އެސް ކުރުމުގެ ފުރުޞަތު ހުޅުވާލައިފިއެވެ.
ޕިޔާނޯ ރައުންޑްގެ ފުރަތަމަ ޝޯވ މިރޭ ޓީ.ވީ.އެމުން ދައްކާފައިވާއިރު، މިރޭގެ ޝޯވގައި ތިއޭޓަރ ރައުންޑުން ގަދަ 16 އަށް ދަތުރުކުރި ބައިވެރިންގެ ތެރެއިން 8 ބައިވެރިއަކު ލަވަ ހުށައަޅާދީފައިވެއެވެ.
މި 8 ބައިވެރިންނަކީ:-
- ޝަމްވީލް މުޙައްމަދު
- ޢިބްރާހީމް ވަޙީދު
- މުޙައްމަދު ތަސްނީމް
- ޝަނީޒާ ޝަރީފް
- އަޙްމަދު ސައްޔާޙު
- މުޙައްމަދު ރީހާން
- ޝަޒާ ޢަބްދުﷲ ރަޝީދު
- މުޙައްމަދު ހަމްދާން
މި 8 ބައިވެރިންގެ ފަރާތުން މިރޭގެ ޝޯވގައި ހިތްގައިމު ހުށައެޅުންތަކެއް ފެނިގެންދިޔައިރު، މީގެތެރެއިން ބެލުންތެރިންނަށް އެންމެ ކަމުދާ ބައިވެރިއަކަށް ވޯޓުލުމަށްޓަކާ އެސް.އެމް.އެސް ކުރުމުގެ ފުރުޞަތު މާދަމާ މެންދުރުފަހު 3 ޖެހުމާއި ހަމައަށް ވަނީ ހުޅުވާލާފައެވެ. ވޯޓުލުމަށްޓަކާ، MI ޖެހުމަށްފަހު ހުސްތަންކޮޅެއް ދޫކުރައްވާ، އެ ބައިވެރިއަކަށް ދީފައިވާ ކޯޑު ޖެހުމަށްފަހު 303 އަކަށް އެސް.އެމް.އެސް ކުރެވޭނެއެވެ. މިއިން ކޮންމެ އެސް.އެމް.އެސްއަކަށް 3 ރުފިޔާ ޗާޖުކުރާނެއެވެ. އަދި ކޮންމެ ނަންބަރަކުންވެސް އެންމެ ގިނަވެގެން ފޮނުވޭނީ 50 އެސް.އެމް.އެސްއެވެ.
މި 8 ބައިވެރިންގެ ތެރެއިން ޖަޖުންގެ 50 އިންސައްތަ މާކްސް އަދި ބެލުންތެރިންގެ 50 އިންސައްތަ ވޯޓާއެކު، އެންމެ ގިނަ ޕޮއިންޓު ލިބޭ ބައިވެރިން ހިމެނޭހެން ގާލާ ރައުންޑަށް ދަތުރުކުރާ ފުރަތަމަ 6 ބައިވެރިން އިޢުލާން ކުރުން އޮންނާނީ މާދަމާ ރޭ ބާއްވާ އެލިމިނޭޝަން ނައިޓުގައެވެ. އެލިމިނޭޝަން ޝޯވ ޓީ.ވީ.އެމުން ލައިވްކޮށް ދެއްކުމަށް ވަނީ ހަމަޖެހިފައެވެ. މި ޝޯވއަށް ބެލުންތެރިން ފޮނުވާ ވޯޓުގެ ކަންކަން ބެލެހެއްޓުމުގެ މަސައްކަތް ޙަވާލުކޮށްފައިވަނީ "ކްރޯވް ހޮވަތް އެލް.އެލް.ޕީ" އޮޑިޓް ފަރމާއެވެ.