ނ. ވެލިދޫ ބަނދަރު ހެދުމުގެ މަޝްރޫޢުގެ މަސައްކަތުގެ ބޮޑުބައެއް ނިމިފައިވާކަމަށް އެރަށު ކައުންސިލުން ވިދާޅުވެއްޖެއެވެ.
ޕީއެސްއެމްއަށް މަޢުލޫމާތުދެއްވަމުން ވެލިދޫ ކައުންސިލުގެ ނައިބު ރައީސް އިބްރާހީމް ޢަލީ ވިދާޅުވީ ބަނދަރުގެ އެއްގަމު ޖެޓީގެ 80 އިންސައްތަ މަސައްކަތް ނިމިފައިވާކަމަށެވެ. އަދި ބޭރު ތޮށީގެ 60 އިންސައްތަ މަސައްކަތް ނިމިފައިވާކަމަށްވެސް އޭނާ ވިދާޅުވިއެވެ.
މިމަސައްކަތާއެކު ބަނދަރު ފުންކުރުމުގެ މަސައްކަތް ކުރިއަށްދާކަމަށްވެސް އިބްރާހީމް ޢަލީ ވިދާޅުވިއެވެ.
ކޮންޓްރެކްޓަރާ ހަވާލާދީ ކައުންސިލް އިދާރާއިން ވިދާޅުވީ މިމަޝްރޫޢުގެ މަސައްކަތް ނިންމަން ކަނޑައަޅާފައިވާ ތާރީޚުގެ ކުރިން މަސައްކަތް އެއްކޮށް ނިންމާލެވޭނެކަމަށެވެ. އެމްޓީސީސީއާ ހަވާލުކޮށްގެން ކުރިއަށްގެންދާ މިމަޝްރޫއުގެ މަސައްކަތް ނިންމަންޖެހެނީ ޖުލައިމަހުގެ ކުރިންނެވެ.
މިދިޔަ އަހަރުގެ މާރޗް މަހުގެ ތެރޭގައި މަސައްކަތް ފެށި ވެލިދޫ ބަނދަރަކީ 1000 ފޫޓް ދިގު 550 ފޫޓް ފުޅާ ބަނދަރެކެވެ. ނ.ވެލިދޫ އަކީ ދެހާސް ހަތްސަތޭކައެއްހާ މީހުންގެ އާބާދީއެއް ދިރިއުޅެމުންދާ ރަށެކެވެ.