މުޖުތަމަޢަށް ފައިދާހުރި، ބޭނުންތެރި ދާއިރާތަކުން ޒުވާނުން ތަމްރީނުކޮށް، ހުނަރާއި ޤާބިލްކަން އިތުރުކުރުމަށް އެހީތެރިވުމަށްޓަކައި ކްލީކް ކޮލެޖާއި ނޭޝަނަލް ކެރިއަރ ގައިޑެންސް ގުޅިގެން ޚާއްސަ މަސައްކަތު ބައްދަލުވުމެއް މިއަދު ބާއްވައިފިއެވެ.
"ޕާރސަނަލް ބްރޭންޑިން" ގެ ނަމުގައި ބިލަބޮންގް އިންޓަރނޭޝަނަލް ސްކޫލްގައި ބޭއްވި މި މަސައްކަތު ބައްދަލުވުމަކީ ސަރުކާރާއި އާންމު ކުންފުނިތަކަށާއި އާންމުންނަށް ހުޅުވާލައިގެން ބޭއްވި މަސައްކަތު ބައްދަލުވުމެކެވެ. img:http://s2.psmnews.mv/images/660x400/14843271137034.jpg|އަމިއްލަ ޝަޚްސިއްޔަތެއް ބިނާކުރުމުގެ މުހިންމުކަމާބެހޭ މަސައްކަތު ބައްދަލުވުމުގެ ތެރެއިން - ފޮޓޯ: ޕީއެސްއެމް
މި މަސައްކަތު ބައްދަލުވުމުގެ މަޤްޞަދަކީ ކްލީކް ކޮލެޖުން ފޯރުކޮށްދޭ ތަމްރީނާއި ތަޢުލީމީ ޚިދުމަތްތައް ތަޖުރިބާ ކޮށްލުމުގެ ފުރުޞަތު ދިވެހި މުޖުތަމައަށް ފަހިކޮށްދެއްވުމަށް ކަމަށް ކްލީކް ކޮލެޖުން މަޢުލޫމާތުދެއެވެ. އަދި މަސައްކަތު ބައްދަލުވުމުގެ ސަބަބުން ވަޒީފާގެ މައިދާނުގައި ޙަރަކާތްތެރިވާ ޒުވާނުންނާއި، މަތީ ތަޢުލީމު ޙާސިލްކުރަމުންދާ ފަރާތްތަކަށް އެކަށޭނަ ޢިލްމީ، ފަންނީ ފުރުޞަތުތައް ފަހިވެގެން ދާނެ ކަމަށް އެ ކޮލެޖުން ހާމަކުރެއެވެ.
މި މަސައްކަތު ބައްދަލުވުމުގައި އަމިއްލަ ޝަޚްސިއްޔަތެއް ބިނާކުރުމުގެ މުހިންމުކަމާއި ޕަރސަނަލް ބްރޭންޑިންގ ގެ އެހީގައި ވަޒީފާގެ ބާޒާރުގައި ތިމާގެ އަގު އުފުލާނެ ގޮތްތަކާއި އެކި ސިނާޢަތްތަކުގައި ޕަރސަނަލް ބްރޭންޑިންގ ގެ ބޭނުން ހިފޭނެ ގޮތްތަކާއި ގުޅޭ ގޮތުން ބައިވެރިންނަށް މަޢުލޫމާތު ދީފައިވެއެވެ.
އެއްދުވަހުގެ މުއްދަތަށް ކުރިއަށް ގެންދިޔަ މި މަސައްކަތު ބައްދަލުވުމުގައި ކިޔަވައިދެއްވީ ސްރީލަންކާގެ މައި މުވާޞަލާތީ ކުންފުނިކަމަށްވާ "ޑައިލޮގް" ގެ އިސްޓްރެއިނަރ، ރެކްސް ޕިޓިޔާގޭއެވެ. ކްލީކް ކޮލެޖަކީ ތަޢުލީމީ ދާއިރާއިން ޚިދުމަތް ކުރުމުގެ ރޮނގުން 2009 ވަނަ އަހަރު ޤައުމީ އިނާމު ލިބިފައިވާ ކޮލެޖެއްކަން ފާހަގަކޮށްލެވެއެވެ.