މާލޭގެ ކުނި މެނޭޖްކުރުން-ކުރު މުއްދަތެއްގެ ތެރޭގައި ހެޔޮ ބަދަލެއް

މާލޭގެ ކުނީގެ މައްސަލައަކީ ޒަމާންތަކެއް ވަންދެން ޙައްލުނުކުރެވި އޮތް، ރައްޔިތުންގެ ކަންބޮޑުވުންތަކާވެސް ގުޅިފައިވާ ބޮޑު މައްސަލައެކެވެ.

މާލޭގެ އެކި ސަރަޙައްދުތަކަށް ކުނި ޖަމާކުރުމަށްފަހު، ހަރުދަނާ އުޞޫލެއްގެ ތެރެއިން އެތަންތަން ނުބެލެހެއްޓި، ދުވަހުން ދުވަހަށް މާލެއިން ކުނި ބޭރުނުކުރެވުމުގެ ނަތީޖާއަކަށް ވެގެންދިޔައީ، ދޭތެރެ ދޭތެރެއިން އެފަދަ ތަންތަނުގައި އަލިފާނުގެ ޙާދިސާތައް ހިނގުމެވެ. ހަމައެހެންމެ ދުމުގެ އަސަރުކުރުމާއި، މެހީގެ އުނދަގޫ ކުރިމަތިވުމާއި، ނުބައިވަސް ފެތުރުންފަދަ ކަންކަން އެ ސަރަޙައްދުތަކުގައި ދިރިއުޅޭ ރައްޔިތުން ދިޔައީ ތަޙައްމަލުކުރަމުންނެވެ. އަދި މިފަދަ ކަންކަންކަމާ ގުޅިގެން ސްކޫލްތަކުގެ ކިޔެވުން މެދުކަނޑާލަންޖެހި، ޢާއްމުން ރައްޔިތުން މުޒާހަރާކުރާ ހިސާބަށްވެސް ކަންކަން ދިޔައެވެ.

img:http://s4.psmnews.mv/images/660x400/14825143105454.jpg|މާލޭގައި ކުނި މެނޭޖްކުރުމަށް، ތިލަފުއްޓަށް ކުނި ގެންދިއުމަށް ބޭނުންކުރާ ކަނޑު އުޅަނދުތަކެއް- ފޮޓޯ: ޕިއެސްއެމް

މި މައްސަލައަށް ޙައްލެއް ގެންނެވުމުގެ ގޮތުން ކުރީގެ ރައީސް ނަޝީދުގެ ސަރުކާރުން ވަނީ އިންޑިޔާގެ ޓަޓުވާ ކުންފުންޏާ މާލޭ ސަރަޙައްދުގެ ކުނި މެނޭޖްކުރުމުގެ މަސައްކަތް ޙަވާލުކުރައްވާފައެވެ. ނަމަވެސް އޭގެ ފަހުންވެސް އެ މައްސަލައަށް އެދޭވަރެއްގެ ޙައްލެއް ނުލިބުމުގެ ސަބަބުން، އެކުންފުންޏާއެކު ސަރުކާރުން ވެވަޑައިގެންފައިވާ އެއްބަސްވުން އުވާލެއްވިއެވެ. އަދި އެ މަސައްކަތް ވޭސްޓް މެނޭޖްމަންޓް ކޯރޕަރޭޝަން، ވެމްކޯއާ ސަރުކާރުން ޙަވާލުކުރެއްވިއެވެ.

img:http://s3.psmnews.mv/images/660x400/14825142912234.jpg|މާލޭގައި ކުނި މެނޭޖްކުރުމަށް، ތިލަފުއްޓަށް ކުނި ގެންދިއުމަށް ބޭނުންކުރާ ކަނޑު އުޅަނދުތަކެއް- ފޮޓޯ: ޕިއެސްއެމް

މިއީ ބޮޑު ޚަރަދެއް ހިނގާނެ، އަދި ވަގުތުވެސް ބޭނުންވާނެ ކަމަކަށްވާތީ، މި މައްސަލައަށް އަވަސް ޙައްލެއް ގެންނެވުމުގެ ގޮތުން ސަރުކާރުން އެންމެ ފުރަތަމަވެސް އެޅުއްވި ފިޔަވަޅަކީ މާލޭގައި އުފެދޭ ކުނި ދުވަހުން ދުވަހަށް ތިލަފުށްޓަށް ގެންދެވޭނެ އިންތިޒާމެއް ޤާއިމުކުރެއްވުމެވެ. އަދި މާލެއަށް ދިމާވެފައިވާ ކުނީގެ މައްސަލަ ޙައްލުކުރެއްވުމަށް ދެމެހެއްޓެނެވި ނިޒާމެއް ޤާއިމްކުރުމަށް ބޭނުންވާ ޕްލޭންތައް އެކުލަވާލައި، އެކަމަށް ބޭނުންވާ ވެހިކަލްތަކާއި، އިންސާނީ ވަޞީލަތް ހޯދުމުގެ މަސައްކަތް ވެމްކޯއިން މިހާރު އަންނަނީ ކުރަމުންނެވެ.

img:http://s1.psmnews.mv/images/660x400/14740295787640.jpg|ހުޅުލެއާއި މާލެއާއި ދެމެދުގައި އަޅާ ބްރިޖްގެ މަސައްކަތާއި މާލޭގެ އިންޑަސްޓްރިއަލް ވިލެޖްގެ މަސައްކަތް ފެންނަ ފޮޓޮއެއް- ފޮޓޯ: އަޙްމަދު މައިމޫން، ޕީއެސްއެމް

ހަމައެހެންމެ މާލޭ އިރުދެކުނު ފަރާތުގައި ސަރުކާރުން ތަރައްޤީކުރައްވާފައިވާ އިންޑަސްޓްރިއަލް ވިލެޖްގައި ކުނި މެނޭޖްކުރުމުގެ މަސައްކަތް ކުރުމަށް ޚާއްޞަ ސަރަޙައްދެއް ޤާއިމުކުރައްވައި، އެތަނުގައި ވެމްކޯގެ އޮޕަރޭޝަންތައް މިހާރު ވަނީ ފަށާފައެވެ.