ސީ ލައިފް ގްލޯބަލް ކުންފުނިން ހުޅުމާލޭގައި ޢިމާރާތްކުރާ 3000 ހައުސިންގ ޔުނިޓްގެތެރެއިން ދެވަނަ ފިޔަވަހީގައި ހިމެނޭ 278 ފްލެޓް ޢިމާރާތްކުރުމަށްޓަކައި ކޮންޓްރެކްޓަރާ ބިން ހަވާލުކޮށްފިއެވެ.
މިމަސައްކަތް ހަވާލުކޮށްފައިވަނީ ޗައިނާ ސަރުކާރުގެ ކުންފުންޏެއްކަމަށްވާ، "ޓްވެންޓީ ތާރޑް އެމް.ސީ.ސީ" ކުންފުންޏާއެވެ. މިކުންފުނިން ވަނީ ހުޅުމާލޭގެ ފުރަތަމަ ފިޔަވަހީގެ ދަށުން ޢިމާރާތްކުރި 1500 ހައުސިންގ ޔުނިޓްގެ މަސައްކަތާ، ހުޅުމާލެ މަގު ހެދުމާއި ސެންޓްރަލް ޕާކް ތަރައްޤީކުރުމުގެ މަސައްކަތްވެސް ކޮށްފައެވެ.
ސަރުކާރުން ކުރިއަށްގެންދާ ބޯހިޔާވަހިކަމުގެ މަޝްރޫޢުގެ ދަށުން ހުޅުމާލޭގައި ޢިމާރާތްކުރާ 15000 ހައުސިންގ ޔުނިޓްގެ ތެރެއިން 7000 ހައުސިންގ ޔުނިޓް ޢިމާރާތްކުރުމަށް ސަރުކާރުން ޙަވާލުކޮށްފައިވަނީ އަމިއްލަ ކުންފުނިތަކާއެވެ. މިގޮތުން ހުޅުމާލޭގައި 3000 ހައުސިންގ ޔުނިޓާއި އޮފީސް ކޮމްޕްލެކްސް ޢިމާރާތްކުރުމަށް ހަވާލުކޮށްފައިވާ "ސީ ލައިފް ގްލޯބަލް" އިން މިމަޝްރޫޢު ބަހާލާފައިވަނީ ތިން ބަޔަކަށެވެ. މެދު ފަންތިއާއި، މަތީ ފަންތީގެ ފްލެޓްތަކެއް ހިމެނޭ މިމަޝްރޫޢުގެ ދަށުން ފުރަތަމަ ތަރައްޤީކުރުމަށް ހަމަޖެހިފައިވާ އެއްހާސް ހައުސިންގ ޔުނިޓްގެ ތެރެއިން ފުރަތަމަ ފިޔަވަހީގައި ހިމެނޭ 350 ހައުސިންގ ޔުނިޓްގެ ޢަމަލީ މަސައްކަތް ވަނީ ފަށާފައެވެ. އަދި މިމަޝްރޫޢުގެ ދެވަނަ ފިޔަވަހީގެ ދަށުން ޢިމާރާތްކުރާ 278 ހައުސިންގ ޔުނިޓްގެ މަސައްކަތް ޗައިނާ ސަރުކާރުގެ ކުންފުންޏެއްކަމަށްވާ، "ޓްވެންޓީ ތާރޑް އެމް.ސީ.ސީ" ކުންފުންޏާ ހަވާލުކޮށް ބިން ވަނީ ހަވާލުކޮށްފައެވެ.
މިކަމަށްޓަކާ ދަރުބާރުގޭގައި ބޭއްވި ރަސްމިއްޔާތު ޝަރަފުވެރިކޮށްދެއްވާ ވާހަކަފުޅުދައްކަވަމުން ހައުސިންގ މިނިސްޓަރ ޑރ.މުޙައްމަދު މުޢިއްޒު ވިދާޅުވީ ރާއްޖޭގައި ގެދޮރުވެރިކަމަކީ ކޮންމެ ރައްޔިތަކަށްވެސް ނުހަނު ބޭނުންވެފައިވާ ކަމެއްކަމަށާ، ހުރިހާ ފަންތިއެއްގެ މީހުންނަށްވެސް ގެދޮރު ބޭނުންވާކަމަށެވެ. އެހެންކަމުން ހައުސިންގ ޔުނިޓްތައް ތަރައްޤީކުރެވިގެންދާނީ ސޯޝަލް ހައުސިންގ އާއި މިޑް ރޭންޖް އަދި ލަގްޒަރީ ފެންވަރުގެ ހައުސިންގ ޔުނިޓްތަކެއްގެގޮތުގައިކަމަށް މިނިސްޓަރ ވިދާޅުވިއެވެ.
މިނިސްޓަރ ވިދާޅުވީ މިގޮތުން ހުޅުމާލޭގައި މިހާރު ތަރައްޤީކުރުމަށް ހަވާލުކޮށްފައިވާ ހައުސިންގ ޔުނިޓްތަކަކީ ހުރިހާ ފަންތިތަކެއް ހިމެނޭނެހެން ތަރައްޤީކުރާ ހައުސިންގ ޔުނިޓްތަކެއްކަމަށާއި، ސަރުކާރާއި އަމިއްލަ ފަރާތްތަށް ގުޅިގެން ކުރިއަށްގެންދާ މަޝްރޫޢުތަކަށް ސަރުކާރުން ދޭންޖެހޭ އެއްބާރުލުންދޭނެކަމަށް ވިދާޅުވިއެވެ.
މިރަސްމިއްޔާތުގައި ވާހަކަދައްކަވަމުން ޗައިނާއިން ރާއްޖެއަށް ކަނޑައަޅުއްވާފައިވާ ސަފީރު ވަންގ ފޫ ކާންގ ވިދާޅުވީ މިމަސައްކަތް ހަވާލުކޮށްފައިވާ ޗައިނާގެ ޓުވެންޓީ ތާރޑް ކޮމްޕެނީއަކީ ދިގު ތާރީޚެއް އޮތް ކުންފުންޏެއްކަމަށެވެ. އެގޮތުން އެކުންފުންޏަކީ ޗައިނާ އާއި ދުނިޔޭގެ އެކިކަންކޮޅުތަކުގައި ތަރައްޤީގެ ގިނަ މަޝްރޫއުތަކެއް ކާމިޔާބުކަމާއެކީ ކުރިއަށްގެންގޮސްފައިވާ ކުންފުންޏެއްކަމަށް އޭނާ ވިދާޅުވިއެވެ. މިމަޝްރޫޢު ކުރިއަށްގެންދިޔުމުގައިވެސް ގުޅިގެން މަސައްކަތްކުރުމަށް ސަފީރު އެދިވަޑައިގެންނެވި.
ސީލައިފް ގްލޯބަލްގެ މެނޭޖިންގ ޑިރެކްޓަރ އަހުމަދު މޫސާ މުޙައްމަދު ވިދާޅުވީ އެކުންފުންޏާއި ހަވާލުކޮށްފައިވާ ހައުސިންގ ޔުނިޓްތަކުގެ ތެރޭގައި ފުރަތަމަ ތަރައްޤީކުރުމަށް ހަމަޖެހިފައިވާ އެއްހާސް ހައުސިންގ ޔުނިޓްގެ ދަށުން ތިން ވަނަ ފިޔަވަހީގެ މަސައްކަތް މިއަހަރުގެ ކުރިން ބަޔަކާއި ހަވާލުކުރެވޭނެކަމަށް. އަދި ދެހާސްއަށާރަ ވަނަ އަހަރަށް މިފްލެޓްތަކުގެ މަސައްކަތް ނިންމާ ފްލެޓަށް އެދިފައިވާ ފަރާތްތަކަށް ދިރިއުޅެން ފެށޭނެކަމަށާ މިމަސައްކަތް ކާމިޔާބުކަމާއެކީ ކުރިއަށްގެންދެވޭނެކަމުގައި އޭނާ ވިދާޅުވި.
ސީ ލައިފް ގްލޯބަލްއިން ހުޅުމާލޭގައި ޢިމާރާތްކުރުމަށް ހަމަޖެހިފައިވާ 3000 ހައުސިންގ ޔުނިޓް ތަރައްޤީކުރެވިގެންދާނީ 1 ކޮޓަރި، 2 ކޮޓަރި، އަދި 3 ކޮޓަރީގެ އެޕާޓްމަންޓްތަކާއި، އެންމެ މަތީ ފްލޯތަކުގައި ޕެންޓްހައުސް ހިމެނޭގޮތަށްކަމަށް ސީލައިފް ގްލޯބަލް އިން މަޢުލޫމާތުދެއެވެ.