އަތޮޅުތެރޭގައި ދިރިއުޅެމުންދާ ރައްޔިތުންނަށް ޚިދުމަތް ހޯދުމުގައި ލުއި ފަސޭހަކޮށްދެއްވުމަށްޓަކައި ސަރުކާރުން ގެންދަވަނީ އަތޮޅު ފެންވަރުގައާއި ރަށުފެންވަރުގައި އެކަށީގެންވާ ޚިދުމަތްތައް ރައްޔިތުންނަށް ލިބޭނެ އިންތިޒާމްތައް ހަމަޖައްސަވައިދެއްވަމުންނެވެ.
މިގޮތުން އަތޮޅު ތެރޭގައި އާބާދީ ބޮޑު ރަށްތަކުގައި ސަރުކާރުން ގެންދަވަނީ އެކި އެކި މަޝްރޫޢުތަށް ކުރިއަށް ގެންދަވަން ފައްޓަވާފައެވެ. ދެކުނުގެ އަތޮޅުތަކަށް ޚާއްސަކޮށްގެން ސަރުކާރުން ކުރިއަށް ގެންދަވާ މަޝްރޫޢުގެ ތެރޭގައި ހުވަދު އަތޮޅަށް ޚާއްސަކުރައްވައިގެން ސަރުކާރުން ހިންގަވާ މަޝްރޫޢުތައް ފާހަގަކޮށްލެވެއެވެ.
img:http://s2.psmnews.mv/images/660x400/8406.jpg|ގދ. ތިނަދޫ - ފޮޓޯ: ޕީއެސްއެމް ފައިލް
ސަރުކާރުން ހުވަދު އަތޮޅުގައި ތަރައްޤީގެ ގިނަ މަޝްރޫޢުތަކެއް ގެންދަވަނީ ހިންގަވަމުންނެވެ. މީގެތެރެއިންވެސް ހުވަދުއަތޮޅު ދެކުނުބުރީ ތިނަދޫގައި ކުރިއަށް ގެންދަވާ ތަރައްޤީގެ ގިނަ މަޝްރޫޢުތައް ފާހަގަކޮށްލެވެއެވެ. ރާއްޖޭގެ ރަށްތަކުގެ ތެރެއިން ނަމޫނާ ރަށްތަކެއް ތަރައްޤީކުރެއްވުމުގެ ގޮތުން ރާއްޖޭގައި މިހާރު އެންމެ ގިނަ މަޝްރޫއުތަކެއް އެއްފަހަރާ ކުރިއަށްގެންދަވާ އެއްރަށަކީ ތިނަދޫއެވެ. ތިނަދޫގައި 55 ހެކްޓަރުގެ ބިންހިއްކެވުމުގެ މަޝްރޫޢު މިއަހަރުގެ ޖޫން މަހުގެ އެއްވަނަ ދުވަހު ފަށްޓަވާ 22 ދުވަހުގެ ތެރޭގައިވަނީ ނިންމަވާފައެވެ. މިއާއިއެކު އެރަށުގެ ބޮޑުމިނަކީ މިހާރު 167 ހެކްޓަރެވެ. ތިނަދޫގެ އާބާދީއަށް އެކަށީގެންވާ ބޯހިޔާވަހިކަން ފޯރުކޮއްދެއްވުމައްޓަކައި ސަރުކާރުން އެރަށުގައި އަޅުއްވާ 120 ހައުސިންގ ޔުނިޓްގެ މަސައްކަތުގެ 95 އިންސައްތަ މިހާރުވަނީ ނިންމަވާފައެވެ.
img:http://s4.psmnews.mv/images/660x400/14614884610712.jpg|ތިނަދޫ އިސްލާމި މަރުކަޒުގެ ކުރެހުމެއް
މީގެ އިތުރުން މާލެފިޔަވާ އެއްމެ ބޮޑު އިސްލާމީ މަރުކަޒެއް ޤާއިމުކުރައްވަން ސަރުކާރުން ފައްޓަވާފައި ވަނީވެސް ގދ ތިނަދޫގައެވެ. ސަޢޫދީ ޢަރަބިއްޔާގެ ރަސްގެފާނު ސަލްމާން ބިން ޢަބްދުލް ޢަޒީޒްގެ ހިލޭ އެހީއާއި، ދިވެހި ސަރުކާރުގެ ބަޖެޓުން ޚަރަދު ކުރައްވައިގެން ތިނަދޫގައި ބިނާކުރައްވާ އިސްލާމީ މަރުކަޒުގެ މަޝްރޫޢަށް 34.4 މިލިޔަން ދިވެހި ރުފިޔާ ޚަރަދުވާނެކަމަށް އިސްލާމިކް މިނިސްޓްރީން ވިދާޅުވެއެވެ.
ތިނަދޫގައި ފޯރުކޮށްދެއް ކަރަންޓުގެ ޚިދުމަތް ތަރައްޤީކުރެއްވުމަށް ސަރުކާރުން ކުރައްވަމުންގެންދަވާ މަސައްކަތަށް ބަލާއިރު، ކަރަންޓުގެ ޚިދުމަތް ތިނަދޫގެ ހުރިހާ ރައްޔިތުންނަށް ފޯރުކޮށްދެއްވުމުގެ ގޮތުން ސަރުކާރުން ގެންދަވަނީ ތިނަދޫގައި 11 މިލިއަނަށްވުރެ ގިނަ ރުފިޔާ ޚަރަދު ކުރައްވައިގެން، އިންޖީން އުފުލާ ކެރޭނު ސިސްޓަމަކާއެކު ޒަމާނީ ފެންވަރުގެ އިންޖީނުގެއެއް ޢިމާރާތް ކުރެއްވުމުގެ މަސައްކަތް ކުރައްވަމުންނެވެ.
img:http://s3.psmnews.mv/images/660x400/14727095535928.jpg|ތިނަދޫ މިއުޒިއަމް ޕާކުގެ ކުރެހުމެއް / ފޮޓޯ: ހައުސިން މިނިސްޓްރީ
ތިނަދޫގައި ސަރުކާރުން ހިންގަވާ ޢުމްރާނީ ތަރައްޤީގެ މަޝްރޫޢުތަކާއި އެކު ޒުވާނުންނާއި ކުޑަކުދިންނަށް އަމާޒުކޮށްގެން މުނިފޫހިފިލުވުމާއި ކުޅިވަރުގެ ދާއިރާއިންވެސް ގިނަ މަޝްރޫޢުތަކެއް ގެންދަވަނީ ހިންގަވަމުންނެވެ. މިގޮތުން ތިނަދޫގައި ސްވިމިންގ ޓްރެކެއް ތަރައްޤީކުރައްވައި، ބޭނުންކުރަން ވަނީ ފަށާފައެވެ. ދިގުމިނުގައި 25 މީޓަރު އަދި ފުޅާމިނުގައި 20 މީޓަރު ހުންނަ މިޓްރެކަކީ މާލެ އާއި އައްޑޫ ސިޓީ ފިޔަވައި ރާއްޖޭގެ ރަށެއްގައި ފުރަތަމަ ފަހަރަށް ޤާއިމް ކުރެއްވި ސްވިމިންގ ޓްރެކެވެ.
މީގެ އިތުރުން ސަރުކާރުން ވަނީ ތިނަދޫގައި ސްޕޯރޓްސް އެރީނާ އިންޑޯ ކޮމްޕްލެކްސްއާއި، ވޯޓަރ ތީމް ޕާކަކާއި، މިއުޒިއަމް ޕާކެއް ތަރައްޤީކުރެއްވުމުގެ މަސައްކަތްވެސް ފައްޓަވާފައެވެ. ތިނަދޫގައި ކުރިއަށް ގެންދަވާ ސްޕޯޓްސް އެރީނާ އިންޑޯ ކޮމްޕްލެކްސްގެ މަސައްކަތް ނިމުމަކާއި ކައިރިވެފައިވާއިރު، މިމަޝްރޫއަށް 21 މިލިޔަނަށްވުރެ ގިނަ ރުފިޔާ ޚަރަދުކުރައްވާފައިވާކަމަށް ސަރުކާރުން ވިދާޅުވެއެވެ.
ތިނަދޫގެ ތަރައްޤީއަށް އިސްކަމެއް ދެއްވައިގެން ސަރުކާރުން ކުރިއަށްގެންދެވާ މަޝްރޫޢުތަކުން އެދެވޭ ނަތީޖާއެއް ހާސިލްވެ، އެރަށް ހިމެނޭ ދެކުނު ސަރަޙައްދުގެ ރައްޔިތުންނަށް ފުރިހަމަ ޚިދުމަތްތަކެއް ލިބިގެންދާނެއެވެ.