ސްޕެނިޝް ލަލީގާގައި ރޭ ގެޓާފޭ އާއި ދެކޮޅަށް ބާސެލޯނާ ކުޅުނު މެޗު 3-0 ގެ ނަތީޖާއަކުން ބާސެލޯނާ މޮޅުވެ ތާވަލުގެ ކުރީގައި ލީޑު ދަމަހައްޓައިފިއެވެ.
މި މެޗުން ބާސެލޯނާ މޮޅުވުމާއިއެކު އެ ޓީމަށް ވަނީ ލީގުގައި މިހާތަނަށް ކުޅުނު 8 މެޗުން ޖުމްލަ 24 ޕޮއިންޓް ލިބިފައެވެ. އަދި ދެވަނައިގައި އޮތް އެތްލެޓިކޯ މެޑްރިޑާއި ދެމެދު 5 ޕޮއިންޓްގެ ލީޑެއް އޮތްއިރު ބާސެލޯނާ ވަނީ ހުރިހާ މެޗަކުންވެސް މޮޅުވެފައެވެ.
ބާސެލޯނާގެ ނޯކޭމްޕްގައި ކުޅުނު މި މެޗުގެ 2 ވަނަ މިނިޓުގައި އެ ޓީމުންވަނީ ލަނޑު ޖަހާ ކުރި ހޯދާފައެވެ. މި ލަނޑު އެ ޓީމަށް ކާމިޔާބުކޮށްދީފައިވަނީ 69 މިލިއަން ޕައުންޑްގެ ފީއަކަށް މި ސީޒަނުގައި އެ ޓީމާއި ގުޅުނު އިނގިރޭސި މިޑްފީލްޑަރ އެންތޮނީ ގޯޑަންއެވެ.
ބާސެލޯނާއިން މޮޅު ކުޅުމެއް ދައްކާފައިވާ މި މެޗުގައި އެ ޓީމުން ޖެހި ދެވަނަ ލަނޑަކީ މެޗުގެ 30 ވަނަ މިނިޓުގައި ގެބްރިއަލް ޖީސުސް ކާމިޔާބުކޮށްދީފައިވާ ލަނޑެކެވެ.
ހެންސީ ފްލިކްގެ އިރުޝާދުގެ ދަށުން ކުޅެމުންދާ ބާސެލޯނާއިން މި މެޗުގައި ޖެހި ތިންވަނަ ލަނޑަކީ މެޗުގެ 73 ވަނަ މިނިޓުގައި ލަމީން ޔަމާލްގެ އެސިސްޓަކުން ޖޫލްސް ކޯންޑޭ ކާމިޔާބުކޮށްދީފައިވާ ލަނޑެކެވެ.
މި ސީޒަނުގައި ބާސެލޯނާއިން ލީގުގައި ކުޅުނު ފުރަތަމަ 8 މެޗުން މޮޅުވެފައިވާއިރު މިއީ 14-2013 ވަނަ އަހަރުގެ ސީޒަނުގައި ޖެރާޑޯ މާޓިނޭޒްގެ އިރުޝާދުގެ ދަށުން އެ ޓީމުން ހޯދާފައިވާ ނަތީޖާއެކެވެ.