"ވަސީލަތްތަކާއެކު ކަނޑުގެ ސަރަޙައްދު ބެލެހެއްޓުމަށް ފުރިހަމައަށް ތައްޔާރު"

ވަސީލަތްތައް އިތުރުކޮށް، ރާއްޖޭގެ ކަނޑުގެ ސަރަޙައްދުގެ ސަލާމަތާއި ރައްކާތެރިކަށް ކަށަވަރުކޮށް ބެލެހެއްޓުމަށް ދިވެހި އަސްކަރިއްޔާ އޮތީ ފުރިހަމައަށް ތައްޔާރަށްކަމަށް ދިފާޢީ އަދި ވަޠަނީ ޚިދުމަތާބެހޭ ވަޒީރު ޙަސަން ރަޝީދު ވިދާޅުވެއްޖެއެވެ.

މިރޭ ބޭއްވި އަހާ ފޯރަމްގައި އާއްމު ފަރާޓަކުން ވަނީ ރާއްޖޭގެ ކަނޑުގެ ސަރަޙައްދު ޚާއްސަކޮށް ރާއްޖޭގެ އިޤްތިޞާދީ ސަރަހައްދު ރައްކާތެރިކުރުމަށް ދިވެހި ސިފައިން ކިހާވަރަކަށް ތައްޔާރުތޯ ސުވާލުކޮށްފައެވެ. އަދި ރާއްޖޭގެ ސަރަޙައްދަށް ބޭރުގެ ފަރާތްތަކުން ވަދެދާނެ ފަދަ ޙާލަތަކަށް ކިހާވަރަކަށް ތައްޔާރުތޯ ސުވާލުކޮށްފައިވެއެވެ.

ވަޒީރު ވިދާޅުވީ ރާއްޖޭގެ ކަނޑުގެ ސަރަހައްދުގެ ރައްކާތެރިކަން ކަށަވަރުކުރުމަށް، ސިފައިން ތިއްބަވަނީ އަބަދުވެސް ތައްޔާރީ ޙާލަތުގައިކަމަށެވެ. އަދި ފުރިހަމަކަމާއެކު ސިފައިންގެ މަސައްކަތް ކުރެވޭނީ އެކަމަށް ބޭނުންވާ ވަސީލަތްތައް ހަމަޖައްސައިގެން ކަމަށް ވަޒީރު ވިދާޅުވިއެވެ.

ރައީސުލްޖުމްހޫރިއްޔާ ޑރ.މުޙައްމަދު މުޢިއްޒު ވެރިކަމާއި ހަވާލުވެވަޑައިގެންނެވުމަށް ފަހު ޤައުމީ ދިފާޢީ ބާރުގެ ވަސީލަތްތައް އިތުރުކުރުމަށް ގިނަ މަސައްކަތްތަކެއް ކުރައްވާފައިވާކަމަށް ވަޒީރު ވިދާޅުވިއެވެ. އެގޮތުން ތުރުކީން މަނަވަރެއް ހޯއްދެވުމާއި، ވައިގެ ސަރަހައްދު ބެލެހެއްޓުމަށް އަސްކަރީ ޑްރޯން ބޭނުންކުރުމުގެ އިތުރަށް އޮސްޓްރޭލިއާ ސަރުކާރުން ދެއްވި މަނަވަރު ފަދަ ވަސީލަތްތައް ހޯދެވުމުގެ މުހިންމުކަން ވަޒީރު ފާހަގަކުރެއްވިއެވެ.

"ވަސީލަތްތައް އިތުރުކުރުމަށް ރައީސް ޑރ.މުޙައްމަދު މުޢިއްޒު ގިނަ މަސައްކަތްތަކެއް ކުރައްވާ. އިތުރު އުޅަނދުތަކާއި އިތުރު ވަސީލަތްތައް އިތުރުކޮށް ކެޕޭސިޓީ ވަރުގަދަކުރައްވަން އިސްކަން ދެއްވާ." ދިފާޢީ އަދި ވަޠަނީ ޚިދުމަތާބެހޭ ވަޒީރު ޙަސަން ރަޝީދު ވިދާޅުވިއެވެ.

ކޯސްޓްގާޑަށް ބޭނުންވާ ގިނަ އުޅަނދުތައް ހޯދުމުގެ މަސައްކަތް މިހާރުވެސް ކުރަމުންދާކަމަށާއި، މިހާތަނަށް ޕެޓްރޯލްކުރުމަށް އިތުރު 3 އުޅަނދު ހޯދާފައިވާކަމަށް ވަޒީރު ވިދާޅުވިއެވެ. ކުރިއަށް އޮތްތަނުގައި އިތުރު 17 އުޅަނދު ގެންނަވާނެކަމަށާ، އޭގެ ތެރެއިން ބައެއް އުޅަނދުތައް އަންނަ ނޮވެމްބަރު މަހު ރާއްޖެ ގެނެވޭނެކަމަށް ވަޒީރު ވިދާޅުވިއެވެ. ހަމައެހެންމެ 12 ސީއެމްބިއުލާންސް ބަނުމުގެ މަސައްކަތްވެސް ކުރިއަށްދާކަމަށް ވަޒީރު ވިދާޅުވިއެވެ.

ވަޒީރު ވިދާޅުވީ ރާއްޖޭގެ ސަލާމަތާއި ރައްކާތެރިކަން އިތުރުކުރެވި، ބޭރުގެ ފަރާތަކުން ދީފާނެ ހަމަލާއަކަށް ނުވަތަ އެފަދަ އެހެން ހާލަތަކަށް ފުރިހަމައަށް ތައްޔާރަށް އޮތްކަމަށް ވަޒީރު ވިދާޅުވިއެވެ.

ރާއްޖޭގެ ބޮޑު ސަރަޙައްދަކީ ކަނޑުގެ ސަރަޙައްދުކަމަށްވުމާއެކު ކަނޑުތައް ބެލެހެއްޓުމަށްޓަކައި ރާއްޖޭގެ ކެޕޭސިޓީ އިތުރުކުރުމަށް މަސައްކަތް ކުރަމުންދާއިރު ކަނޑުތަކުން ލިބޭ ނަފާ އިތުރުކުރުމަށް ސަރުކާރުން ދަނީ މަސައްކަތްކުރަމުންނެވެ.