ހަމަލާ ބަދަލުކުރުން އިތުރުވުމުގެ ނަތީޖާއެއްގެ ގޮތުން ޔަމަނުގެ ބައެއް ސަރަޙައްދުތަކުގައި ކޮންމެ ހަތަރު ޢާއިލާއަކުން ތިން ޢާއިލާ ދަނީ ބަނޑުހައިހޫނުކަމާ ކުރިމަތިލަމުން ކަމަށް ދުނިޔޭގެ ކާބޯތަކެއްޗާބެހޭ ޕްރޮގުރާމް، ޑަބްލިޔުއެފްޕީއިން ބުނެފިއެވެ.
ސަޢުދީ ޢަރަބިއްޔާއާއި ޔަމަނުގެ ޙޫޘީންނާ ދެމެދު ހަމަލާތައް ބަދަލުކުރަމުންދާ މިންވަރު މި ދުވަސްވަރު ވަނީ ވަރަށް ބޮޑަށް އިތުރުވެފައެވެ. މިއީ އދ މެދުވެރިވެ 2022ވަނަ
އަހަރު ހަމަލާ ބަދަލުކުރުން މެދުކަނޑައިލި ފަހުން ޙާލަތު އެންމެ ގޯސްވެފައިވާ ދުވަސްވަރެވެ. ހަމަލާތަކުގެ ސަބަބުން އެތައް ހާސް ބަޔަކަށް ގެދޮރު ދޫކޮށް ދިޔުމަށް މަޖުބޫރުވެފައިވާއިރު، އެތައް މިލިޔަން މީހުންނަށް ބޭނުންވާ ޒަރޫރީ ސާމާނު ލިބުމަށް ވަނީ ދަތިވެފައެވެ. ހަމަލާތަކުގެ ސަބަބުން ކުރިއަށް އޮތް ދުވަސްތަކުގައި ރަތްކަނޑު މެދުވެރިކޮށް މުދާ އުފުލުމަށް އިތުރަށް އަސަރުކުރާނެ ކަމަށް ބެލެވެއެވެ.
ޑަބްލިޔުއެފްޕީގެ އެސިސްޓަންޓް އެކްޒެކެޓިވް ޑިރެކްޓަރެއް ކަމަށްވާ ހޮލިންގވޯތު ވިދާޅުވީ، ސަރުކާރުގެ ބާރުގެ ދަށުގައި އޮންނަ އަދި ޑަބްލިޔުއެފްޕީއަށް ކާބޯތަކެތި ފޯރުކޮށްދެވޭ ސަރަޙައްދުތަކުގައި ހުރި އެދެވޭ މިންވަރަކަށް ކާބޯތަކެތި ނުލިބޭ ގޭބިސީގެ ޢަދަދު، ފާއިތުވި ހަފްތާތަކުގައި 74 އިންސައްތައަށް އިތުރުވެފައިވާ ކަމަށެވެ. ސަރުކާރުގެ ބާރުގެ ދަށުގައި އޮންނަ ސަރަޙައްދުތަކުގެ އާބާދީ ގާތްގަނޑަކަށް 10 މިލިއަނަށް އަރާ ކަމަށް އޭނާ ވިދާޅުވިއެވެ. ހަަމަލާތަކުގެ ސަބަބުން އެ އާބާދީއަށް ކާބޯތަކެތި ކަށަވަރު ކުރުމަށް އިތުރަށް ދަތިވާނެ ކަމަށް ކަމަށް އޭނާ ވިދާޅުވިއެވެ.
ޔަަމަނުގެ އުތުރުގެ ބޮޑު ސަރަޙައްދެއް އޮންނަނީ ޙޫޘީންގެ ބާރުގެ ދަށުގައެވެ. ފާއިތުވި ހަފްތާތަކުގައި ޙޫޘީން ވަނީ ސަރުކާރުގެ ފައުޖުތަކުގެ ބާރުގެ ދަށުގައި އޮތް ރަތް ކަނޑުގެ އައްސޭރީގައި އޮންނަ ޔަމަނުގެ ހުރިހާ ސަރަޙައްދެއް ޙޫޘީންގެ ބާރުގެ ދަށަށް ގެނެސްފައެވެ.
ގެދޮރު ދޫކޮށް ދިޔުމަށް މަޖުބޫރުވެފައިވާ ގިނަ ޢަދަދެއްގެ ޢާއިލާތައް ދަނީ ރައްކާތެރިކަން ހޯދުމުގެ ގޮތުން އާޑެންއަށާއި ތާއިޒް ކިޔާ ފަރުބަދަ މަތީ ސިޓީއަކަށް ދަތުރުކުރަމުންނެވެ. އެ މީހުން ގެދޮރު ދޫކޮށް ދާން ޖެހިފައި ވަނީ ހުސްއަތާ ކަމުން، އެ މީހުންގެ އަތުގައި ކާބޯތަކެތި ނެތް ކަމަށް ޑަބްލިޔުއެފްޕީއިން ބުނެއެވެ.
ޔަމަނަކީ އެ ޤައުމަށް ބޭނުންވާ ކާބޯތަކެތީގެ 90 އިންސައްތަ އިމްޕޯޓުކުރާ ޤައުމަކަށްވި އިރު، ގޮދަން ފުށާއި ތަރުކާރީ ތެޔޮ ފަދަ ކާޑުގެ ބާވަތްތަކުގެ އަގު ދަނީ އުފުލެމުންނެވެ. ހޮލިންގޓަން ވިދާޅުވީ އަގުތައް އުފުލެމުންދާ ވަރަކަށް ބަނޑުހައިހޫނުކަމުގެ ޙާލަތު ދާނީ އިތުރަށް ގޯސްވަމުން ކަމަށެވެ. ތާއިޒް ފަދަ ސަރަޙައްދުތަކުގައި ހަމަލާ ބަދަލުކުރުން އިތުރުވެފައިވާތީ އެ ސަރަޙައްދުތަކުގައި ޑަބްލިޔުއެފްޕީއަށް ޙަރަކާތްތެރި ނުވެވޭ ކަމަށް ވެސް އޭނާ ވިދާޅުވިއެވެ.
ޑަބްލިޔުއެފްޕީއިން ބުނީ އެ އިދާރާއިން ކުރާ މަސައްކަތްތައް އިތުރު ކުރި ނަމަވެސް ކުރިއަށް އޮތް ހަފްތާތަކުގައި ގާތްގަނޑަކަށް 109 މިލިއަން ޑޮލަރު ނުލިބޭ ނަމަ އަލަށް ގެދޮރު ގެއްލިފައިވާ 152،000އެއްހާ މީހުންނަށާއި މިހާރު ވެސް އެހީތެރިކަން ފޯރުކޮށްދެމުންދާ 1.4 މިލިޔަން މީހުންނަށް އެހީތެރިވުމަށް ބޭނުންކުރަން ހުރި ކާބޯތަކެތީގެ ސްޓޮކްއާއި ފައިސާ ހުސްވާނެ ކަމަށެވެ.
ހޮލިންގވޯތު ވަނީ ޔަމަނުގެ ކައިރީގައި އޮންނަ ބާބުލް މަންދީބު ކަނޑުއޮޅިއާއި ހުރްމުޒް ކަނޑުއޮޅީގައި ހިނގަމުންދާ ކަންތައްތަކުގެ ސަބަބުން ޔަމަނަށް ކުރަމުންދާ އަސަރުތަކާ ގުޅޭ ގޮތުން ވެސް ވާހަކަ ދައްކަވައިފައެވެ. އޭގެ އިތުރުން ޔޫކްރެއިން-ރަޝިޔާ ހަނގުރާމައިގެ ސަބަބުން ބްލެކް ސީއަށް ކުރިމަތިވެފައިވާ ދަތިތަކުގެ ސަބަބުން ވެސް ކާބޯތަކެއްޗާއި ތެލުގެ އަގުތައް އިތުރަށް އުފުލުމުގެ ފުރުޞަތު އޮތް ކަމަށް އޭނާ ވިދާޅުވިއެވެ.
އދގެ އަންހެނުންގެ ގޮފިން ޝާއިޢުކޮށްފައިވާ ރިޕޯޓެއްގައި ބުނީ ޔަމަންއާއި ސޫދާންއާއި ލެބަނޮން ހިމެނޭ ގޮތަށް 28 ޤައުމެއްގައި ގާތްގަނޑަކަށް 11.7 މިލިޔަން އަންހެނުންނާއި އަންހެން ކުދިންނަށް މި އަހަރު ނިމޭއިރު ކާބޯތަކެތި ކަށަވަރު ނުވާނެ ކަމަށެވެ. އެއީ މެދުއިރުމަތީގެ ހަނގުރާމައާއި ހުރްމުޒް ކަނޑުއޮޅިއަށް ކުރިމަތިވެފައިވާ ހުރަސްތަކުގެ ސަބަބުން ކަމަށް އެ ރިޕޯޓުގައި ބުނެފައިވެއެވެ.